ខេត្តព្រះសីហនុ ៖ តម្រូវការរបស់យុវជនមិនត្រឹមតែការសិក្សាក្រេបយកចំណេះដឹង និងជំនាញដើម្បីទទួលបាននូវការងារមួយសមរម្យនៅពេលអនាគតនោះទេ ថែមទាំងត្រូវការលេងកីឡាផ្សេងៗដើម្បីឱ្យសុខភាពរាងកាយរបស់ពួកគេមានការរហ័សរហួន និងរឹងប៉ឹង ជាពិសេសអាចឱ្យពួកគេចៀសផុតពីការសេពគ្រឿងញៀន និងការប្រព្រឹត្តអំពើពាលាផ្សេងៗដែលប៉ះពាល់ដល់សង្គមផងដែរ។
ផូង សុផា ជាសិស្សនៃសាលាបច្ចេកទេសដុនបូស្កូខេត្តព្រះសីហនុ ឱ្យដឹងថា ស្ទើរតែរៀងរាល់ថ្ងៃខ្លួនតែងលេងកីឡាផ្សេងៗក្រោយពេលសម្រាកពីការសិក្សាមានដូចជា បាល់ទាត់ បាល់បោះ និងបាល់ទះ ដែលខ្លួនចូលចិត្តជាងគេ ។ មុនពេលខ្លួនមកសិក្សានៅទីនេះ (សាលាបច្ចេកទេសដុនបូស្កូ) ខ្លួនមិនសូវចេះលេងកីឡាដូចពេលនេះទេ លុះមកសិក្សានៅទីនេះខ្លួនមានពេលលេងកីឡាបានច្រើន និងពូកែទៀតផង ។
ផូង សុផា បានបញ្ជាក់បន្ថែមទៀតថា ខ្លួនឱ្យតម្លៃលើការលេងកីឡាជាខ្លាំង ព្រោះនៅពេលខ្លួនប្រើកុំព្យូទ័រ ឬក៏អានសៀវភៅពេញមួយថ្ងៃនោះធ្វើឱ្យភ្នែកទាំងគូរបស់ខ្លួនស្រវាំង និងមើលអ្វីមិនសូវច្បាស់នោះទេ ឯដៃជើងទៀតសោតក៏រួយ និងស្ពឹកស្រពន់ទៀតផង គឺមានន័យថា មិនរហ័សរហួនទេ ។ ផ្ទុយទៅវិញ បើខ្លួនចំណាយពេល១ទៅ២ម៉ោងក្នុងមួយថ្ងៃដើម្បីលេងកីឡានោះ រាងកាយរបស់ខ្លួនចាប់ផ្តើមមានភាពរហ័សរហួន និងមានអារម្មណ៍ស្រស់ថ្លា ហើយអ្វីដែលធ្វើឱ្យខ្លួនកត់សម្គាល់ទៀតនោះ គឺការគិតរបស់ខ្លួនដូចជាលឿនជាងមុន ។
កញ្ញា ស៊ីវ មី ដែលជាសិស្សផ្នែកលេខាធិការនៃសាលាបច្ចេកទេសដុនបូស្កូខេត្តព្រះសីហនុ ក៏បានបង្ហើបប្រាប់ទាក់ទងនឹងការលេងកីឡាផងដែរថា កាលនៅជាសិស្សអនុវិទ្យាល័យ ឬវិទ្យាល័យនាងមិនដែលលេងកីឡាសោះព្រោះខ្មាសគេ និងម្យា៉ងទៀតខ្លាចចាស់ៗស្តីបន្ទោសឱ្យថា ខ្លួនជាស្រីលេងកីឡាមិនសុភាពរមទមសក្តិសមជានារីខ្មែរទេ លុះពេលនាងបានមកសិក្សានៅទីនេះនាងចាប់ផ្តើមចូលចិត្តលេងកីឡាខ្លាំងណាស់ ពិសេសនៅពេលទំនេរពីការសិក្សាតែម្តង ។
លោកងឹម រ៉ា ដែលជាបុគ្គលិកបម្រើការនៅសាលាបច្ចេកទេសដុនបូស្កូ និងជាគ្រូផ្នែកកីឡាដែរនោះបានឱ្យដឹងបន្ថែមទាក់ទងនឹងការលេងកីឡានេះថា សិស្សដែលសិក្សានៅទីនេះមានប្រាំផ្នែក ដូចនេះសាលាក៏បានបែងចែកម៉ោងកីឡាជាប្រាំក្រុមដែរដើម្បីឱ្យពួកគេបានលេងកីឡាគ្រប់គ្នា ។ មិនត្រឹមតែប៉ុណ្ណោះសាលាតែងប្រារព្ធពិធីបុណ្យមួយដែលមានឈ្មោះថា «បុណ្យកីឡាពណ៌» រៀងរាល់ឆ្នាំក្នុងគោលបំណងឱ្យពួកគេស្រឡាញ់នូវកីឡា ម្យ៉ាងទៀតចង់រំលឹកដល់ការកកើតឡើងរបស់កីឡា និងសាលាបច្ចេកទេសដុនបូស្កូផងដែរ ។ នៅពេលលោកឪពុកបូស្កូចាប់ផ្តើមបង្កើតសាលាដុនដំបូង ក៏បានយកកីឡាជាមធ្យោបាយទាក់ទាញក្រុមយុវជនឱ្យចៀសចេញឆ្ងាយពីអំពើពាលាផ្សេងៗបានយ៉ាងមានប្រសិទ្ធភាព ស្របពេលបច្ចុប្បន្នដែលរាជរដ្ឋាភិបាលបាននិងកំពុងតែជំរុញវិស័យកីឡានេះកាន់តែផុសផុលដើម្បីឱ្យយុវជនទាំងអស់ចៀសចេញឆ្ងាយពីគ្រឿងញៀន ។
លោកចន វីសើ សញ្ជាតិហូឡង់ ជាអធិការសាលាបច្ចេកទេសដុនបូស្កូ និងជាប្រធានមូលនិធិដុនបូស្កូកម្ពុជា បានមានប្រសាសន៍ឱ្យដឹងដែរថា លោកបានបម្រើការងារជាមួយដុនបូស្កូនេះអស់រយៈពេលជាង៥០ឆ្នាំកន្លងមកហើយ ។ រាល់ថ្ងៃសិស្សស្ទើរតែទាំងអស់ដែលមកសិក្សានៅសាលាដុនបូស្កូនេះតែងតែចូលចិត្តលេងកីឡា នៅពេលដែលពួកគេសម្រាកពីការសិក្សា ជាពិសេសនៅរៀងរាល់ថ្ងៃសៅរ៍ និងអាទិត្យតែម្តង។ ការលេងកីឡានេះអាចឱ្យពួកគេចៀសផុតពីការកើតជំងឺផ្តាសាយបំបាត់រោគតប់ប្រមល់ (Strees) និងទទួលបាននូវសុខភាពខាងរាងកាយមាំមួនរហ័សរហួនទៀតផង ៕
ចែករំលែកព័តមាននេះ