ខេត្តកំពង់ឆ្នាំង ៖ «ភ្នំនាងកង្រី» គឺជាភ្នំមួយទាក់ទងរឿងព្រេង«ពុទ្ធិសែននាងកង្រី»បច្ចុប្បន្នបានក្លាយជារមណីយដ្ឋានធម្មជាតិ មានភ្ញៀវចង់ទៅទស្សនាច្រើនដោយខ្លះទៅដល់ផ្ទាល់ និងខ្លះទៀតទស្សនាពីត្រើយម្ខាងនៃមាត់ទន្លេផ្សារក្រោម ។ ភ្នំនេះស្ថិតក្នុងភូមិសាស្ត្រចន្លោះឃុំ២ គឺឃុំពោធិ៍ និងឃុំត្រងិល ក្នុងស្រុកកំពង់លែង មានចម្ងាយប្រមាណ១៤គីឡូម៉ែត្រពីទិសខាងជើងនៃទីរួមខេត្តកំពង់ឆ្នាំង ។
ភ្ញៀវទេសចរអាចអញ្ជើញទៅទស្សនាទាំងរដូវប្រាំង និងវស្សា ដោយត្រូវឆ្លងទន្លេសាបតាមកំពង់ផែផ្សារក្រោមទៅដល់កំពង់បឹងក្នុងរដូវវស្សា និងទៅដល់កំពង់ហៅក្នុងរដូវប្រាំង តាមកាណូតដ ឬកាណូតជួល ដែលសព្វថ្ងៃនេះមានកាណូតទេសចរណ៍ចតនៅកំពង់ផែផ្សារក្រោមត្រង់ចំណុចដើមពោធិ៍ ។
ភ្ញៀវទេសចរមុននឹងទៅដល់កំពង់បឹង ឬកំពង់ហៅ ត្រូវឆ្លងកាត់ភូមិជាច្រើនដូចជា ភូមិពោធិ៍អណ្តែត ភូមិកំពង់បឹង ភូមិកែងតាសុក ភូមិអណ្តូងរនុក និងកាត់តាមច្រកភ្នំត្របែក ទៅដល់ដើមពោធិ៍ធំមួយដើមហៅថា ពោធិ៍ដំណាក់ បត់ឆ្វេងដៃកាត់តាមវាលស្រែចម្ងាយប្រមាណ៧គីឡូម៉ែត្រ ទើបទៅដល់ភ្នំកង្រី ។ ដោយឡែក បើគេធ្វើដំណើរទៅទស្សនានារដូវវស្សាពេលទឹកទន្លេឡើងធំ គឺអាចទៅតាមកាណូតដល់ជើងភ្នំកង្រី។
«ភ្នំនាងកង្រី» ជាឈ្មោះជាប់ទាក់ទិននឹងរឿងព្រេងនិទានខ្មែរ ដែលមានក្នុងក្បួនគម្ពីរតំណាលតៗគ្នាដ៏ពេញនិយម ។លោក ស៊ីវ រុន ប្រធានមន្ទីរទេសចរណ៍ខេត្តកំពង់ឆ្នាំងរៀបរាប់ពីប្រវត្តិរឿងព្រេងនិទាននៃភ្នំនេះ ស្រង់តាមសៀវភៅទេសចរណ៍ខេត្ត ដោយសង្ខេបថា ចៅពុទ្ធិសែន ពេលធំពេញវ័យ តែងតែចេញទៅខាងក្រៅ ហើយដោយហេតុជាមនុស្សមានបុណ្យបារមីក៏តែងតែទៅលេងភ្នាល់ចត្រង្គ ជល់មាន់ ជល់ដំរី ឈ្នះគេឯង និងរហូតដល់ឈ្នះស្តេច «រថសិដ្ឋ» ដែលជាបិតាតារបស់ខ្លួន ប៉ុន្តែអ្នកទាំងពីរមិនស្គាល់គ្នាទេ ។
រាល់ការភ្នាល់នេះ គឺដូរយកតែបាយ១២កញ្ចប់ ទឹក១២បំពង់ប៉ុណ្ណោះ ដោយចៅពុទ្ធិសែនយកទៅឱ្យម្តាយធំ និងម្តាយបង្កើតទទួលទាន ។ ក្រោយមកព្រះអង្គ«រថសិដ្ឋ» ពេញចិត្តចៅពុទ្ធិសែនក៏បានហៅទៅចូលវាំងនៅជាមួយ ប៉ុន្តែចៅពុទ្ធិសែន មិនភ្លេចម្តាយទាំង១២នោះទេ តែងបានលបលួចយកបាយសំណុំឱ្យពិសារាល់ថ្ងៃ ។លុះក្រោយមក នាង«សន្ធមារ»បានដឹងថា ចៅពុទ្ធិសែន គឺជាកូននាងពីរដណ្តប់ក៏យកលេសបញ្ជាឱ្យចៅពុទ្ធិសែន ជិះសេះនាំសារទៅឱ្យកូនស្រីឈ្មោះ«នាងកង្រី»នៅនគរយក្ស ។ ពេលធ្វើដំណើរដល់ពាក់កណ្តាលផ្លូវដោយអស់កម្លាំងពេកចៅពុទ្ធិសែនឈប់សម្រាកក្រោមដើមឈើធំមួយ ហើយក៏លង់លក់ទៅ ។ ពេលនោះ មានឥសីមួយអង្គនិមន្តទតឃើញសារនាងសន្ធិមារ ចងនៅកសេះក៏ស្រាយមកអានមានសេចក្តីថា «បើចៅពុទ្ធិសែនមកដល់ពេលយប់ឱ្យសម្លាប់ទាំងយប់ មកដល់ពេលថ្ងៃឱ្យសម្លាប់ទាំងថ្ងៃ» ។
ដោយក្តីអាណិតអាសូរចៅពុទ្ធិសែន តាឥសីហែកសារចោល រួចហើយធ្វើសារថ្មីជំនួសវិញ មានសេចក្តីថា «បើចៅពុទ្ធិសែនទៅដល់ពេលយប់ឱ្យរៀបការទាំងយប់ បើទៅដល់ពេលថ្ងៃឱ្យរៀបការទាំងថ្ងៃ» ។ ចៅពុទ្ធិសែនទៅដល់នគរយក្ស នាងកង្រីបានឃើញរាជសារ ក៏ចាត់ចែងរៀបការជាមួយចៅពុទ្ធិសែនដោយក្តីសេ្នហា និងភក្តីជាមួយស្វាមី។នាងកង្រី បានទូលថ្វាយអាថ៌កំបាំងទាំងឡាយដល់ស្វាមីដូចជា កែវភ្នែករបស់នាង១២, ថ្នាំព្យាបាលភ្នែកឱ្យជាដូចដើមឡើងវិញ,ថ្នាំបង់ឱ្យកើតជាសមុទ្រ និងដំបងគ្រវីទៅអាចឱ្យហោះហើរបានជាដើម ។
ក្រោយពីបានជ្រាបអាថ៌កំបាំងអស់ហើយ ថ្ងៃមួយពុទ្ធិសែន បានត្រាស់បង្គាប់ឱ្យរៀបចំពិធីជប់លៀងមួយដ៏ឧឡារិកដល់ពួកយក្ស ហើយបញ្ច្រកពួកយក្សឱ្យស្រវឹងស្រាទាំងអស់គ្នា ចំណែកនាងកង្រីក៏ស្រវឹងដែរ ។ លុះដល់ពេលអធ្រាត្រស្ងាត់ ពុទ្ធិសែន លបលួចចូលទៅយកកែវភ្នែកព្រះមាតា និងព្រះមាតុច្ឆា ថ្នាំបង់ឱ្យកើតជាសមុទ្រ ថ្នាំព្យាបាលភ្នែក និងដំបងទិព្វជាដើម រួចហើយឡើងសេះជិះភៀសខ្លួនទៅនគរព្រះមាតា បិតា ។ ពេលទៅដល់ព្រះនគរហើយ ពុទ្ធិសែន បានព្យាបាលភ្នែកព្រះមាតា ព្រះមាតុច្ឆាបានជាសះស្បើយ និងបានសម្លាប់យក្ខិណីនាងសន្ធិមារ ជួបជុំព្រះបិតា និងបានឡើងសោយរាជ្យនៅនគរនោះទៅ ។
និយាយពីនាងកង្រី ក្រោយពីបានដឹងថា ចៅពុទ្ធិសែនជាស្វាមីរត់ចេញពីនគរហើយ ក៏កេណ្ឌពលសេនាយក្សដេញតាមចៅពុទ្ធិសែន ។ ពេលទៅដល់កន្លែងមួយ ចៅពុទ្ធិសែន បង់ថ្នាំឱ្យកើតជាសមុទ្រ គឺនៅត្រង់«កំពង់បង់» ដែលបច្ចុប្បន្នហៅថា «កំពង់បឹង» ជាឈ្មោះភូមិមួយនៅស្រុកកំពង់លែងសព្វថ្ងៃនេះ ។ នាងកង្រី បានរត់ទៅដល់កន្លែងមួយ ហើយស្រែកហៅចៅពុទ្ធិសែន ត្រង់កន្លែងនោះសព្វថ្ងៃហៅថា «កំពង់ហៅ» ជាឈ្មោះភូមិមួយក្នុងឃុំកំពង់ហៅ ស្រុកកំពង់លែង។ ម្យ៉ាងទៀត ដោយនាងកង្រី ក្តុកក្តួលឈឺចិត្តនឹងចៅពុទ្ធិសែនក្បត់ចិត្ត និងនឹកខ្មាសអស់ពលសេនាក៏ដើរទៅដួលដេកស្លាប់នៅចម្ងាយប្រមាណពីកំពង់ហៅ១គីឡូម៉ែត្រ ត្រង់ភូមិមួយឈ្មោះ«ដួលរលំ» ដែលសព្វថ្ងៃហៅ«ត្អួរលំ»វិញ ។
នាងកង្រី ដួលស្លាប់នៅត្រង់ភូមិត្អួរលំ ហើយក៏ក្លាយជា«ភ្នំនាងកង្រី» ដែលគេមើលឃើញលាតសន្ធឹងពីជើងទៅត្បូង មានបណ្តោយប្រវែងប្រមាណ២.០០០ម៉ែត្រ កម្ពស់ប្រមាណ៣៣០ម៉ែត្រ ។ ដោយសារមានរឿងនិទានបែបនេះហើយ ទើបរាល់ដំណើរកម្សាន្តរបស់ភ្ញៀវទាំងឡាយដែលទៅដល់ទឹកដីខេត្តកំពង់ឆ្នាំង តែងតែមានចិត្តចង់ទៅទស្សនា«ភ្នំនាងកង្រី» បានមួយភ្លែតសិនដែរ ឬក៏មើលពីចម្ងាយ ។
ដើម្បីរក្សាប្រវត្តិរឿងព្រេងដែលមានលក្ខណៈប្រជាប្រិយ សម្រាប់កេរដំណែលតដល់កូនចៅជំនាន់ក្រោយ អាជ្ញាធរខេត្តបានធ្វើរូបសំណាកចៅពុទ្ធិសែន ជិះសេះហោះចោលនាងកង្រី និងរូបសំណាកនាងកង្រីក្រាបបក់ដៃហៅចៅពុទ្ធិសែន តម្កល់ក្នុងសួនច្បារខាងត្បូងវិមានឯករាជ្យ ដែលបច្ចុប្បន្នក្រោមការថែរក្សាបោសសម្អាតរបស់ឆ្មាំសួនច្បារ និងគួបផ្សំដោយការតាក់តែងរៀបចំពីអាជ្ញាធរខេត្ត ធ្វើឱ្យទីកន្លែងនោះមានសោភ័ណភាពក្រៃលែងគួរឱ្យចាប់អារម្មណ៍ ។ រមណីយដ្ឋានភ្នំនាងកង្រី មានកន្លែងទស្សនាកម្សាន្តជាច្រើនកន្លែង និងបើជារដូវវស្សាចំខែភ្ជុំបិណ្ឌផងនោះ គឺគេឃើញមានភ្ញៀវទេសចរច្រើនទៅកម្សាន្តដូចជា ជិះទូកលេង រាំកម្សាន្ត និងប្រណាំទូក កាណូតជាដើម យ៉ាងសប្បាយរីករាយ ៕
ចែករំលែកព័តមាននេះ