ប្រភពពីទីភ្នាក់ងារព័ត៌មានបរទេស កាលពី ថ្ងៃទី៤ កញ្ញា ផ្សាយថា យ៉ាងហោចណាស់មនុស្ស៤២នាក់បានស្លាប់ និង២៥នាក់ទៀតរងរបួស ក្រោយពីរថយន្តក្រុងដែលចេញដំណើរពីទីក្រុងម៉ារ៉ាហ្គេស ឆ្ពោះទៅទីក្រុងអួហ្សាហ្សាតភាគខាងត្បូងប្រទេសម៉ារ៉ុក ជួបនឹងឧប្បត្តិហេតុធ្លាក់ក្នុងជ្រោះ ។មន្ត្រីនៅក្នុងតំបន់បានបង្ហើបឱ្យដឹងថា ជនរងគ្រោះដល់ជីវិតទាំងអស់ជាជនជាតិម៉ារ៉ុក ប៉ុន្តែពុំបានបញ្ជាក់ពីឈ្មោះរបស់អ្នកស្លាប់ និងអ្នករងរបួស និងនៅមិនទាន់ប្រាកដថា មានជនបរទេសនៅក្នុងហេតុការណ៍គ្រោះថ្នាក់ចរាចរណ៍នេះឬអត់ ។
ឧប្បត្តិហេតុបានកើតឡើងនៅពេលរថយន្តក្រុងធ្វើដំណើរនៅលើកំណាត់ផ្លូវមួយនៅក្បែរក្រុងស៊ើកថេន ក្នុងខេត្តហាអ៊ូស ភាគខាងកើតឈៀងខាងត្បូងនៃទីក្រុងម៉ារ៉ាហ្គេស ប្រហែល១០០គីឡូម៉ែត្រ ។ អ្នករបួសត្រូវបញ្ជូនទៅព្យាបាលនៅឯមន្ទីរពេទ្យនានានៅក្បែរនោះ ។
សម្រាប់ទីភ្នាក់ងារព័ត៌មានMAP បានផ្សាយថា រថយន្តក្រុងបានធ្លាក់ទៅក្នុងជ្រោះដែលមានជម្រៅប្រហែល១៥០ម៉ែត្រ កាលពីព្រឹកថ្ងៃទី៤ កញ្ញា កន្លងមក បណ្តាលឱ្យមានអ្នកស្លាប់បាត់បង់ជីវិតចំនួន៤២នាក់ ក្នុងនោះ៥នាក់បានស្លាប់នៅឯមន្ទីរពេទ្យ និង២៤នាក់រងរបួសក្នុងនោះមាន៤នាក់របួសធ្ងន់ ។
នេះគឺជាឧប្បត្តិហេតុដ៏អាក្រក់បំផុតដែលមិនធ្លាប់កើតមាននៅម៉ារ៉ុក ។ តាមទិន្នន័យពីក្រសួងគមនាគមន៍បង្ហាញថា មានអ្នកស្លាប់បាត់បង់ជីវិតច្រើនជាង៤.០០០នាក់ពីឧប្បត្តិហេតុចរាចរណ៍នៅលើដងផ្លូវនៅម៉ារ៉ុក កាលពីឆ្នាំ២០១១ គឺកើនឡើងប្រហែល១១,៦ភាគរយបើប្រៀបធៀបកាលពីឆ្នាំ២០១០ ៕
ចែករំលែកព័តមាននេះ