ខេត្តកណ្តាល ៖ ម៉ូតូ២គ្រឿងបើកប្រដេញគ្នាយ៉ាងលឿនទៅដល់ផ្លូវកោងបានជ្រុលទៅបុករបងផ្ទះរួចបោកជាមួយបង្គោលភ្លើងដួលម៉ូតូទាំង២គ្រឿងបណ្តាលឱ្យរងរបួសធ្ងន់ស្រាល៤នាក់ និងខូចម៉ូតូទាំង២គ្រឿងផងដែរ ។ ហេតុការណ៍នេះកើតឡើងកាលពីវេលាម៉ោង១១និង៣០នាទីយប់ថ្ងៃទី៤ កញ្ញា នៅចំណុចផ្លូវកោងតាមបណ្តោយផ្លូវជាតិលេខ២ ក្នុងភូមិដើមគ សង្កាត់ដើមមៀន ក្រុងតាខ្មៅ ។ ក្រោយពេលកើតហេតុប៉ូលិសចរាចរក្រុងតាខ្មៅបានចុះទៅពិនិត្យកន្លែងកើតហេតុ និងបញ្ជូនអ្នករបួសធ្ងន់២នាក់ទៅសង្គ្រោះនៅមន្ទីរពេទ្យ ។
លោកឡាង លន់ អធិការរងនគរបាលក្រុងតាខ្មៅបានឱ្យដឹងថា អ្នករបួសធ្ងន់ឈ្មោះឡាយ សាមិត្ត ភេទប្រុស អាយុ២២ឆ្នាំ ជាអ្នកបើកបរម៉ូតូម៉ាកវ៉េវអែស សេ១២៥ ពណ៌ស្លាទុំ និងអ្នករួមដំណើរម្នាក់ទៀតរបួសស្រាល ។ ចំណែកភាគីម្ខាងទៀតឈ្មោះផាន់ ភារៈ ភេទប្រុស អាយុ២០ឆ្នាំ ជាអ្នកបើកបរម៉ូតូម៉ាកហុងដាសេ១២៥ ពណ៌ខ្មៅ រងរបួសធ្ងន់ ចំណែកអ្នករួមដំណើររងរបួសស្រាល អ្នកទាំងអស់គ្នាមានទីលំនៅភូមិទួលរកា សង្កាត់ចាក់អង្រែក្រោម ខណ្ឌមានជ័យ ។ ប៉ូលិសបានឱ្យដឹងទៀតថា ម៉ូតូទាំង២គ្រឿងខាងលើបើកប្រដេញគ្នាយ៉ាងលឿនតាមបណ្តោយផ្លូវជាតិលេខ២ ពីជើងទៅត្បូង លុះមកដល់ចំណុចកើតហេតុក្នុងភូមិដើមគជាកន្លែងផ្លូវកោងម៉ូតូទាំង២គ្រឿងបានបោះពួយជ្រុលទៅខាងស្តាំបណ្តាលឱ្យម៉ូតូម៉ាកវ៉េវបុកជាមួយរបងផ្ទះរួចបោកផ្ទប់ជាមួយបង្គោលភ្លើងតែម្តង ។
ចំណែកម៉ូតូម៉ាកហុងដាសេ១២៥បានបោកដួលនៅក្បែរនោះដែរ បណ្តាលឱ្យរងរបួសធ្ងន់២នាក់ស្រាល២នាក់ ហើយត្រូវបានរថយន្តសង្គ្រោះរបស់ស្នងការដ្ឋាននគរបាលខេត្តដឹកយកទៅសង្គ្រោះនៅរាជធានីភ្នំពេញ ឯម៉ូតូទាំង២គ្រឿងសមត្ថកិច្ចយកទៅរក្សាទុក ។ប៉ូលិសបញ្ជាក់ទៀតថា មូលហេតុនាំឱ្យកើតគ្រោះថ្នាក់ចរាចរណ៍នេះគឺបណ្តាលមកពីអ្នកបើកបរក្នុងស្ថានភាពស្រវឹង និងមានល្បឿនលឿនខ្វះការប្រុងប្រយ័ត្ន ៕
ចែករំលែកព័តមាននេះ