ខេត្តពោធិ៍សាត់ ៖ ពីរនាក់ប្តីប្រពន្ធកំពុងជិះម៉ូតូឌុបគ្នា ត្រូវរថយន្តមួយគ្រឿងបុកពេញទំហឹងបណ្តាលឱ្យប្តីស្លាប់ភ្លាមៗនៅនឹងកន្លែង ឯប្រពន្ធរបួសធ្ងន់ត្រូវបញ្ជូនទៅសង្គ្រោះនៅមន្ទីរពេទ្យ ។ គ្រោះថ្នាក់ចរាចរណ៍នេះបានកើតឡើងនៅលើកំណាត់ផ្លូវក្រួសក្រហមត្រង់ចំណុចភូមិព្រែក១ ឃុំសំរោង ស្រុកភ្នំក្រវាញ កាលពីវេលាម៉ោងជិត២រសៀលថ្ងៃទី៤ កញ្ញា ។
លោកអនុសេនីយ៍ឯក សូ សាហុង អធិការនគរបាលស្រុកភ្នំក្រវាញបានឱ្យដឹងថា ជនរងគ្រោះដែលត្រូវរថយន្តបុកស្លាប់នេះជាជនពិការដៃស្តាំ ជើងឆ្វេង និងខ្វាក់ភ្នែកម្ខាងដោយសារសង្គ្រាមមានឈ្មោះភិន ផុន ហៅយក្ស អាយុ៤៣ឆ្នាំ និងប្រពន្ធឈ្មោះហែ ហឿម រងរបួសធ្ងន់ ។ ចំណែករថយន្តបង្កគ្រោះថ្នាក់ម៉ាកកាមរី ពណ៌ខ្មៅ ស៊េរី១៩៩១ បើកបរដោយបុរសម្នាក់ដែលគេស្គាល់ថា ជាមន្ត្រីផ្នែករដ្ឋបាលព្រៃឈើស្រុកភ្នំក្រវាញ ។
តាមការសាកសួរនៅកន្លែងកើតហេតុឱ្យដឹងថា នារសៀលនោះបុរសម្នាក់បានបើករថយន្តចេញពីផ្នែករដ្ឋបាលព្រៃឈើឆ្ពោះទៅកាន់ទីរួមស្រុកភ្នំក្រវាញ ក្នុងល្បឿនលឿន ពេលទៅដល់កន្លែងកើតហេតុជាផ្លូវកោង ស្រាប់តែជ្រុលល្បឿនទៅបុកម៉ូតូប្តីប្រពន្ធទាំងពីរនាក់ដែលកំពុងជិះម៉ូតូបញ្រ្ចាសទិសគ្នាបើុងប្រហែល៥ម៉ែត្រ បណ្តាលឱ្យបុរសជាប្តីស្លាប់ភ្លាមៗនៅនឹងកន្លែង ឯប្រពន្ធបែកក្បាលសន្លប់ស្តូកស្តឹងត្រូវបានគេបញ្ជូនទៅសង្គ្រោះនៅមន្ទីរពេទ្យខេត្ត ។
រថយន្តបែកកង់មុខទាំងពីរ ហើយក្រោយពេលកើតហេតុ អ្នកបើកបរបានទុករថយន្តចោលរួចរត់គេចខ្លួនបាត់ ។ រថយន្តខាងលើ ត្រូវសមត្ថកិច្ចអូសយកទៅរក្សាទុកនៅអធិការដ្ឋាននគរបាលស្រុកភ្នំក្រវាញរង់ចាំការដោះស្រាយតាមនីតិវិធី ៕
ចែករំលែកព័តមាននេះ