អ្នកកាសែតកោះសន្តិភាពលោកជា ហ្គារូដា និងអ្នកកាសែតជាច្រើនទៀតមកពីប្រទេសកម្ពុជា ព្រមជាមួយអ្នកកាសែតមកពីបណ្តាប្រទេសអាស៊ានបូក៣ ជាច្រើននាក់ផងដែរ ត្រូវបានអាជ្ញាធរប្រទេសចិនអញ្ជើញធ្វើទស្សនកិច្ច ស្វែងយល់ និងកិច្ចសហប្រតិបត្តិការផ្នែកព័ត៌មាននៅក្រុងចាងឈុន ខេត្តជីលីន កាលពីថ្ងៃទី៣ កញ្ញា ២០១២ ក្រោមប្រធានបទ «សំឡេងអាស៊ី និងការផ្តល់តម្លៃ» ។
អ្នកកាសែតទាំងអស់ត្រូវបានមន្ត្រីការងាររបស់ចិននាំទៅសំរាកនៅសណ្ឋាគារ Shagri-La ដើម្បីត្រៀមខ្លួនចូលរួមក្នុងកិច្ចពិភាក្សារួមមួយជាមួយអាជ្ញាធរខេត្តជីលីន របស់ចិន និងមន្ត្រីពាក់ព័ន្ធ ។ ពិធីជួបជុំពិភាក្សាត្រូវបានចាប់ផ្តើមឡើងនៅសណ្ឋាគារ Nanhu ក្រុងចាងឈុន ដោយមានការចូលរួមធ្វើបទបង្ហាញពីសំណាក់លោក Sun Zhengcai លេខាបក្សខេត្តជីលីន និងនិពន្ធនាយកនៃកាសែតធំមួយរបស់ចិនឈ្មោះ People’s Daily គឺលោក Wu Hengquan ព្រមទាំងមានថ្លែងសុន្ទរកថាពីសំណាក់មន្ត្រីពាក់ព័ន្ធ ជាពិសេសការឡើងបង្ហាញមតិយោបល់ពីបណ្តាអ្នកកាសែតមកពីប្រទេសអាស៊ានបូក៣ ។
នៅក្នុងប្រធានបទ «សំឡេងអាស៊ី និងការផ្តល់តម្លៃ» ក្រុមអ្នកចូលរួមបានលើកឡើងថា អាស៊ានបូក៣ ត្រូវការចាំបាច់នូវការចូលរួមពីបណ្តាញអ្នកសារព័ត៌មាន ដើម្បីសុវត្ថិភាពសង្គម ។ ជាមួយនឹងសុវត្ថិភាពសង្គមនេះដែរ យើងគប្បីត្រូវពិចារណាអំពីមហិច្ឆតារបស់អ្នកជ្រុលនិយម ព្រោះអាចធ្វើឱ្យមានបញ្ហាធ្ងន់ធ្ងរ ឬមហន្តរាយ ហើយគួរត្រូវធ្វើយ៉ាងណាឱ្យប្រទេសជាតិនីមួយៗរបស់យើងទទួលបាននូវសន្តិភាព និងសុខដុមរមនា។
នៅក្នុងសុន្ទរកថានៃមន្ត្រីអាជ្ញាធរចិនបានបង្ហាញថា អាស៊ីទាំងមូលនៅមានសំឡេងខ្សោយ ហើយប្រជាជនមាន១/៣នៃពិភពលោកប៉ុណ្ណោះ ។ បើនិយាយពីសេដ្ឋកិច្ចវិញ គឺមានតែ១/៥នៃពិភពលោកទេ ដូច្នេះអាស៊ីត្រូវការរួមគ្នា កិច្ចសហប្រតិបត្តិការលើបញ្ហាសន្តិភាព សេដ្ឋកិច្ច និងព័ត៌មាន ដើម្បីឈានទៅមានសំឡេងដែលធ្វើឱ្យពិភពលោកយកចិត្តទុកដាក់ មានតម្លៃ និងប្រសិទ្ធភាពនៅក្នុងភាពរុងរឿងទាំងអស់គ្នា ។
រាល់បញ្ហាខ្វែងគំនិត និងជម្លោះផ្សេងៗដូចជាតំបន់កោះ ព្រំដែន… សុទ្ធសឹងតែជាបញ្ហាក្តៅដែលប្រជាពលរដ្ឋចង់ដឹង ហើយការដឹងបាននេះ គឺតាមរយៈអ្នកសារព័ត៌មាន ហេុតនេះហើយក្នុងនាមជាជាតិសាសន៍ម្នាក់នៃប្រទេសមួយ និងក្នុងនាមជាអ្នកសារព័ត៌មានផងនោះត្រូវមានមនសិការក្នុងការផ្តល់-ផ្សាយព័ត៌មានពិតស្មោះត្រង់ និងត្រូវបើកចំហបង្អួចព័ត៌មាន ដើម្បីធ្វើកិច្ចសហការគ្នា ទោះជាក្នុងក្របខណ្ឌអាស៊ានបូក៣ ឬលើសពីនេះក៏ដោយ។
មតិរួមនៃអង្គប្រជុំបានលើកឡើងថា រាល់បញ្ហាដែលកើតឡើង ឬជម្លោះណាមួយ ក្នុងនាមជាអ្នកកាសែតម្នាក់ ក្រៅពីគោរពវិជ្ជាជីវៈ និងក្រមសីលធម៌ យើងត្រូវគ្រប់គ្រងអារម្មណ៍របស់យើងឱ្យបាននឹងន ដោយធ្វើការផ្សព្វផ្សាយ ឬផ្តល់ព័ត៌មានប្រកបដោយសុចរិតភាព មិនត្រូវមានចរិតញុះញង់ធ្វើឱ្យខូចទំនាក់ទំនង និងដំណោះស្រាយ ។ ក្នុងឋានៈជាអ្នកសារព័ត៌មានម្នាក់ យើងត្រូវពុះពារលើកិច្ចសហការឱ្យមុតមាំឱ្យខាងតែបាន បើទោះណាថា ការធ្វើឱ្យប្រទេសអាស៊ានបូក៣ មានកិច្ចសហប្រតិបត្តិការរលូននោះ វាពិបាកយ៉ាងណាក៏ដោយ ។ ហេតុនេះហើយការធ្វើទំនាក់ទំនងលើវិស័យសារព័ត៌មានរវាងគ្នា និងគ្នា គឺជាគន្លឹះធ្វើឱ្យវិស័យគ្រប់យ៉ាងបើកទ្វារចំហឱ្យយើងសម្លឹងឃើញគ្នាទៅវិញទៅមក ដឹងសុខទុក្ខ ឆ្ពោះទៅរកសន្តិភាព និងសុខដុមនីយកម្ម៕
ចែករំលែកព័តមាននេះ