រាជធានីភ្នំពេញ ៖ ក្រុមចោរប្លន់៨នាក់ក្នុងនោះស្ត្រីម្នាក់ដែលធ្វើសកម្មភាពយ៉ាងសកម្មប្លន់ម៉ូតូភាគច្រើនម៉ាកស្គូពីក្នុងក្រុងភ្នំពេញ ពេលយប់ត្រូវបានប៉ូលិសព្រហ្មទណ្ឌកម្រិតធ្ងន់នៃស្នងការដ្ឋានរាជធានីភ្នំពេញ សហការជាមួយប៉ូលិសប៉ុស្តិ៍ទួលសង្កែ ខណ្ឌឫស្សីកែវ ចុះបង្ក្រាបចាប់ខ្លួន ខណៈសម្ងំពួននៅក្នុងផ្ទះសំណាក់កាលពីវេលាម៉ោង១០និង៣០នាទីព្រឹកថ្ងៃទី៥ កញ្ញា ២០១២ នៅក្នុងផ្ទះសំណាក់លីហ្សា តាមផ្លូវលេខ៣៥ ស្ថិតក្នុងភូមិទួលសង្កែ សង្កាត់ទួលសង្កែ ខណ្ឌឫស្សីកែវ ។
តាមការឱ្យដឹងជំហានដំបូងថា រហូតមកដល់ពេលនេះជនសង្ស័យទាំង៨នាក់ពុំទាន់ត្រូវបានស្គាល់អត្តសញ្ញាណនៅឡើយទេ ត្រូវបានប៉ូលិសព្រហ្មទណ្ឌកម្រិតធ្ងន់បញ្ជូនទៅកាន់ការិយាល័យព្រហ្មទណ្ឌកម្រិតធ្ងន់នៃស្នងការដ្ឋានរាជធានីភ្នំពេញ ដើម្បីសាកសួរ។ សូមបញ្ជាក់ថា នៅពេលអ្នកកាសែតចុះទៅថត កូនម្ចាស់ផ្ទះសំណាក់បានគំរាមមិនឱ្យអ្នកកាសែតថតអ្វីទាំងអស់ និងស្រាប់តែថតរូបអ្នកាសែតវិញទៀតផង ។
គួរបញ្ជាក់ថា កាលពីប៉ុន្មានថ្ងៃមុននេះ ក្រុមចោរមានគ្នា៤នាក់ ប្រដាប់ដោយកាំភ្លើងខ្លី២ដើម ពូថៅ១ ញញួរ១ ចូលភ្ជង់វាយបំបែកទូកញ្ចក់នៅហាងលក់មាស-គ្រឿងអលង្ការធំមួយទល់មុខផ្សារធំទួលសង្កែ ស្ថិតក្នុងខណ្ឌឫស្សីកែវ កាលពីវេលាម៉ោង៧និង១០នាទីយប់ ហើយប្លន់យកគ្រឿងអលង្ការមាស-ប្លាទីនទៅបាត់ដោយសុវត្ថិភាពជាង២០តម្លឹង ។ កាលណោះលោកកែប ជុតិមា អភិបាលរាជធានី ភ្នំពេញ ប្រកាសស្តីពីការរឹតបន្តឹងសន្តិសុខ ភេរវកម្មនៅពេលព្រឹក ស្រាប់តែរាងយប់បន្តិចចោរប្លន់ហាងមាសតែម្តង ហាក់មិនទុកមុខឱ្យសោះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ