រាជធានីភ្នំពេញ ៖ យុវជនម្នាក់ត្រូវកម្លាំងគណៈបញ្ជាការឯកភាពខណ្ឌទួលគោក ឃាត់ខ្លួន ខណៈដាក់កម្លាំងត្រួតពិនិត្យអាវុធជាតិផ្ទុះនៅតាមដងផ្លូវលេខ២៧៣ សង្កាត់បឹងកក់ទី១ កាលពីវេលាម៉ោង១០យប់ថ្ងៃទី៣ កញ្ញា ២០១២ ដោយរកឃើញថ្នាំញៀនប្រភេទម៉ាទឹកកកចំនួន៣កញ្ចប់ដែលជននោះលាក់ទុកក្នុងបង់ធ្វើជារុំរបួសដៃ ។ ទោះបីជាយ៉ាងណាថ្នាំញៀននោះត្រូវប៉ូលិសជំនាញធ្វើការវិភាគបញ្ជាក់ថា មិនមែនជាថ្នាំញៀនទេ គឺជាសាច់ជូរដែលជននោះយកមកវាយបំបែកធ្វើជាគ្រឿងញៀនដើម្បីលក់ ។
ជនសង្ស័យដែលត្រូវចាប់ខ្លួនឈ្មោះថោង វណ្ណឌី ភេទប្រុស អាយុ១៨ឆ្នាំ មានទីនៅលំផ្ទះជួលម្តុំបឹងកក់ សង្កាត់ស្រះចក ខណ្ឌដូនពេញ ។ នៅពេលឃាត់ខ្លួនដកហូតបានសាច់ជូរចំនួន៣កញ្ចប់តូចផងដែរ ។ តាមមន្ត្រីប៉ូលិសបានឱ្យដឹងថា បន្ទាប់ពីមានអំពើប្លន់អាជីវករលក់មាសនៅផ្សារធំទួលសង្កែ ក្នុងសង្កាត់ទួលសង្កែ គណៈបញ្ជាការឯកភាពខណ្ឌទួលគោក បានដាក់កម្លាំងត្រួតពិនិត្យអាវុធជាតិផ្ទុះនៅតាមផ្លូវលេខ២៧៣ មុខមន្ទីរពេទ្យសៀនតាយ ក្នុងសង្កាត់បឹងកក់ទី១ ។ នៅពេលត្រួតពិនិត្យ ស្រាប់តែប្រទះឃើញម៉ូតូឌុបដឹកយុវជនម្នាក់ដែលបិទបង់រុំរបួសដៃដោយមានការសង្ស័យក៏ហៅឈប់ត្រួតពិនិត្យរកឃើញក្រាមសសង្ស័យជាគ្រឿងញៀនប្រភេទម៉ាទឹកកកចំនួន៣កញ្ចប់ដែលលាក់ទុកក្នុងបង់រុំដៃធ្វើជាមានរបួសនោះ ហើយឃាត់ខ្លួនបញ្ជូនទៅកាន់អធិការដ្ឋានខណ្ឌទួលគោក ។
មន្ត្រីប៉ូលិសបានបន្តទៀតថា បន្ទាប់ពីឃាត់ខ្លួនជននោះបានសារភាពថា ក្រាមសថ្លានោះជាសាច់ជូរ ហើយនៅព្រឹកថ្ងៃទី៤ កញ្ញា សមត្ថកិច្ចបានទាក់ទងហៅប៉ូលិសជំនាញមកធ្វើការវិភាគពិតជាសាច់ជូរមិនមែនជាគ្រឿងញៀនទេ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ