បញ្ហាគ្រោះថ្នាក់ចរាចរណ៍រមែងកើតឡើងនៅតាមបណ្តាប្រទេសនានាលើពិភពលោក ជាពិសេសក្នុងប្រទេសចិនអំឡុងឆ្នាំ២០០៧ ដល់បច្ចុប្បន្នកើតមានគ្រោះថ្នាក់ចរាចរណ៍ធំៗគួរឱ្យកត់សម្គាល់ភាគច្រើនកើតទៅលើរថយន្តក្រុងបណ្តាលឱ្យមានអ្នកដំណើរជាច្រើននាក់រងរបួស និងស្លាប់បាត់បង់ជីវិតដោយសារតែអ្នកបើកបរធ្វេសប្រហែស ។ ជាក់ស្តែងនៅក្នុងរូបភាពដែលបង្ហាញនេះជារូបភាពផ្សព្វផ្សាយពីភ្នាក់ងារព័ត៌មានស៊ីនហួររបស់ចិនដោយក្រុមពន្លត់អគ្គិភ័យក្នុងតំបន់អាន់ហ៊ុយ កំពុងពន្លត់ព្រះអគ្គីដែលឆេះរថយន្តក្រុងមួយគ្រឿង កាលពីរសៀលថ្ងៃទី៣០ សីហា ដែលបើកបរតាមបណ្តោយផ្លូវពីក្រុងអាន់ស៊ីង-ហ៊ឺហ្វើយ បង្កជាភ្លើងឆាបឆេះយ៉ាងសន្ធៅសន្ធៅ ។
អ្នកសារព័ត៌មានបានស្រង់សម្តីអ្នកបើករថយន្តឱ្យដឹងថា ខណៈពេលកំពុងកើតមានភ្លើងឆាបឆេះពីក្រោយ គេព្យាយាមបើករថយន្តទៅចតនៅខាងស្តាំដៃ ដោយបានបើកទ្វាររថយន្ត និងឱ្យអ្នកដំណើរប្រហែល១២នាក់ចុះពីរថយន្ត ក្រោយមកទើបក្រុមពន្លត់អគ្គិភ័យនៅឃុំលូជាង ឆ្ពោះមកកន្លែងកើតហេតុ តែមិនទាន់មានរបាយការណ៍ស្តីពីការស្លាប់បាត់បង់ជីវិតនៅឡើយទេ ។
អ្នកឃើញហេតុការណ៍ម្នាក់និយាយថា ដំបូងភ្លើងបានឆាបឆេះនៅផ្នែកខាងក្រោយរថយន្ត និងមានរយៈពេលមិនដល់៥នាទីផង រថយន្តបានឆាបឆេះពេញបន្ទុក ។ បច្ចុប្បន្នសមត្ថកិច្ចកំពុងស៊ើបអង្កេត ។ ហេតុការណ៍រថយន្តដឹកអ្នកដំណើរដែលកើតមានឧបទ្ទវហេតុបែបនេះ មិនមែនកើតឡើងជាលើកដំបូងទេ បើគិតចាប់ពីថ្ងៃទី១៦ ឧសភា ២០០៧ នៅទីក្រុងហ្វីងឆើង តំបន់ជាំងស៊ីមានកើតហេតុរថយន្តដឹកអ្នកដំណើរមួយគ្រឿង ខណៈពេលកំពុងឆ្លងស្ពានតាមបណ្តោយផ្លូវយ៉ាងលឿន រថយន្តក៏បានរេចង្កូតទៅបុកបង្កាន់ដៃស្ពានធ្លាក់ក្នុងទន្លេធ្វើឱ្យមានអ្នកស្លាប់នៅកន្លែងកើតហេតុចំនួន៣នាក់ និង៣៤នាក់ទៀតរងរបួសត្រូវបានបញ្ជូនទៅសង្គ្រោះនៅមន្ទីរពេទ្យ ។
កាលពីថ្ងៃទី៣ កញ្ញា ២០១០ នៅតំបន់ជីលីនមានរថយន្តក្រុងដឹកអ្នកដំណើរមួយគ្រឿងពាក់ស្លាកលេខតំបន់សានទុង ខណៈពេលកំពុងចេញដំណើរឆ្ពោះទៅក្រុងហាអឺពីនបានបុកជាមួយរថយន្តទួរីស១២កៅអីមួយគ្រឿង បង្កជាភ្លើងឆាបឆេះ ធ្វើឱ្យអ្នកដំណើរចំនួន១៧នាក់ស្លាប់ និង៣៥នាក់ទៀតរងរបួស ។
នៅកណ្តាលយប់ថ្ងៃទី២៥ មេសា ២០១២ រថយន្តដឹកអ្នកដំណើរក្នុងតំបន់យូរណាន បានកើតឧប្បត្តិហេតុតាមដងផ្លូវ បង្កឱ្យមានអ្នកស្លាប់៩នាក់ និង៣៦នាក់ទៀតរងរបួស ។ ដោយឡែកកាលពីថ្ងៃទី២៦ សីហា នៅទីក្រុងយៀន អាន តំបន់សានស៊ី កើតឧប្បត្តិហេតុរថយន្តក្រុង២ជាន់មួយគ្រឿងបានបុកពីក្រោយរថយន្តផ្ទុកឧស្ម័ន បណ្តាលឱ្យផ្ទុះឆេះនៅតាមបណ្តោយផ្លូវប៉ាវម៉ៅ ។ ក្នុងឧបទ្ទវហេតុនេះអ្នកដំណើរ៣៦នាក់បានស្លាប់ និង៣នាក់ទៀតរងរបួស ។
ទីភ្នាក់ងារផ្សព្វផ្សាយរបស់ចិន បានធ្វើការសន្និដ្ឋានពីមូលហេតុចម្បង ទៅលើរថយន្តដឹកអ្នកដំណើរដែលតែងជួបគ្រោះថ្នាក់ជាញឹកញាប់បណ្តាលមកពីការផ្ទុកអ្នកដំណើរ ឬផលិតផលលើសចំណុះ បើកបរក្នុងល្បឿនលឿន និងអ្នកបើកបរមានការធ្វេសប្រហែស៕
ចែករំលែកព័តមាននេះ