រដ្ឋមន្ត្រីការបរទេសឥណ្ឌូណេស៊ីលោកម៉ាទីណាតាឡេហ្គាវ៉ា ថ្លែងកាលពីថ្ងៃទី៣ កញ្ញា ថា ឥណ្ឌូណេស៊ីនិងសហរដ្ឋអាមេរិកសម្រេចបានកុងសង់ស៊ុលមួយលើបញ្ហាសមុទ្រចិនខាងត្បូង ។ ក្នុងសន្និសីទសារព័ត៌មានមួយរៀបចំធ្វើឡើងក្រោយកិច្ចប្រជុំមួយជាមួយរដ្ឋមន្ត្រីការបរទេសអាមេរិកលោកស្រីហ៊ីលឡារីក្លីនតុន នៅក្រុងហ្សាការតា លោកម៉ាទីថ្លែងថា បញ្ហាត្រូវតែដោះស្រាយដោយសន្តិវិធីតាមផ្លូវការទូតដោយគោរពច្បាប់អន្តរជាតិនិងបណ្តាច្បាប់សមុទ្រដែលមាន ។
លោកណាតាឡាហ្គាវ៉ា បន្តថា ឥណ្ឌូណេស៊ីនឹងបង្កើនការខិតខំប្រឹងប្រែងខាងការទូត ហើយធ្វើការផ្តួចផ្តើមគំនិតនានាដើម្បីប្រមូលជំហររបស់អាស៊ានចំពោះបញ្ហានេះ ទោះបីជាសមាជិកមួយចំនួនរបស់អាស៊ានមានការខ្វែងគំនិតគ្នាលើសំណុំរឿងនេះក្តី ។ លោកគូសបញ្ជាក់ថា សហរដ្ឋអាេមរិកនិងឥណ្ឌូណេស៊ីុយល់ពីសារសំខាន់នៃការថែរក្សាសន្តិសុខតំបន់ ហើយបង្កើតបរិយាកាសអនុគ្រោះមួយដើម្បីថែរក្សាភាពរុងរឿងរបស់តំបន់ ។
រដ្ឋមន្ត្រីទាំង២រូបក៏ពិភាក្សាផងដែរពីបញ្ហាទ្វេភាគីនិងពិភពលោក ។ ឥណ្ឌូណេស៊ីិនិងសហរដ្ឋអាមេរិកចុះហត្ថលេខាលើឯកសារទ្វេភាគីមួយកាលពីឆ្នាំ២០១០ស្តីពីភាពជាដៃគូក្នុងវិស័យកិច្ចសហប្រតិបត្តិការ សេដ្ឋកិច្ច សង្គមកិច្ច វប្បធម៌ និងសន្តិសុខ ។ទស្សនកិច្ចរបស់លោកស្រីគ្លីនតុន នៅឥណ្ឌូណេស៊ីជាផ្នែកមួយនៃដំណើរទស្សនកិច្ចរបស់លោកស្រីក្នុងប្រទេស៦នៅអាស៊ី ។ លោកស្រីត្រូវជួបជាមួយប្រធានាធិបតីឥណ្ឌូណេស៊ីលោកស៊ូស៊ីឡូបាមបង់យូដូ យ៉ូណូនាថ្ងៃទី៤ កញ្ញា នៅវិមានប្រធានាធិបតី ៕
ចែករំលែកព័តមាននេះ