ខេត្តបន្ទាយមានជ័យ ៖ ពិរុទ្ធជនម្នាក់បានរត់គេចខ្លួនបាត់ដោយប្រើលេសសុំអនុរក្សពន្ធនាគារទៅបត់ជើងក្នុងបង្គន់អនាម័យនៅសាលាដំបូងខេត្ត ខណៈនាំខ្លួនមកកាន់សាលាដំបូងខេត្ត កាលពីម៉ោង៨ព្រឹកថ្ងៃទី៣ កញ្ញា ។
ខេត្តបន្ទាយមានជ័យ ៖ ពិរុទ្ធជនម្នាក់បានរត់គេចខ្លួនបាត់ដោយប្រើលេសសុំអនុរក្សពន្ធនាគារទៅបត់ជើងក្នុងបង្គន់អនាម័យនៅសាលាដំបូងខេត្ត ខណៈនាំខ្លួនមកកាន់សាលាដំបូងខេត្ត កាលពីម៉ោង៨ព្រឹកថ្ងៃទី៣ កញ្ញា ។
លោកវរសេនីយ៍ឯក ហ៊ិន សុផល ប្រធានពន្ធនាគារខេត្តបន្ទាយមានជ័យ បានឱ្យដឹងថា ពិរុទ្ធជននោះឈ្មោះអែម សី ភេទប្រុស អាយុ២៤ឆ្នាំ ត្រូវតុលាការបញ្ជូនទៅឃុំខ្លួនបណ្តោះអាសន្ននៅពន្ធនាគារខេត្ត កាលពីថ្ងៃទី១០ ឧសភា ដោយជាប់ចោទពីបទរំលោភសេពសន្ថវៈទៅលើប្អូនថ្លៃជាអនីតិជន ។ លោកបានប្រាប់បន្តថា ពិរុទ្ធជននេះត្រូវអនុរក្សពន្ធនាគារនាំមកឱ្យតុលាការសាកសួរដើម្បីបំភ្លឺលើសំណុំរឿងកាលពីព្រឹកថ្ងៃទី៣ កញ្ញា តែជននោះបានប្រើលេសសុំទៅបត់ជើងធំ ទើបអនុរក្សពន្ធនាគារនាំទៅបង្គន់និងយាមពីមុខ ។
ប៉ុន្តែដោយបាត់យូរជាង១៥នាទីពុំឃើញចេញពីបន្ទប់បង្គន់វិញ ឆ្មាំគុកបានបង្ខំបើកទ្វារបង្គន់ចូលទើបដឹងថា បាត់ពិរុទ្ធជនពេលមើលទៅពិតានបង្គន់ដែលធ្វើមិនមាំទាំឃើញរបើក ក៏បានឡើងតាមតែរអិលធ្លាក់ចុះមកវិញដោយសារទឹកភ្លៀង ។ ពិរុទ្ធជនទំនងជារត់ចូលភ្នំស្វាយដែលនៅជាប់តុលាការរួចរត់ពួនតាមបណ្តាកូនភ្នំក្នុងក្រុងសិរីសោភ័ណ ។ ប្រភពព័ត៌មាននានាឱ្យដឹងថា កម្លាំងពន្ធនាគារ នគរបាល និងកងរាជអាវុធហត្ថជាច្រើននាក់បានដេញតាមចាប់ពិរុទ្ធជននេះទាំងពេលភ្លៀងកំពុងធ្លាក់ឥតឈប់នាថ្ងៃដដែលនោះ តែរហូតមកទល់ពេលនេះនៅមិនទាន់រកឃើញនៅឡើយទេ ។
លោកវរសេនីយ៍ត្រី អ៊ុន សំអន នាយនគរបាលការិយាល័យព្រហ្មទណ្ឌកម្រិតធ្ងន់ខេត្ត បានឱ្យដឹងថា ពិរុទ្ធជនឈ្មោះអែមសី ភេទប្រុស អាយុ២៤ឆ្នាំ មានទីលំនៅភូមិត្រពាំងសំរោង ឃុំគោករមៀត ស្រុកថ្មពួក បានប្រព្រឹត្តអំពើរំលោភលើប្អូនថ្លៃជាអនីតិជនអាយុ១៤ឆ្នាំ កំព្រារស់នៅជាមួយប្រពន្ធពិរុទ្ធជនដែលជាបងស្រី ដែលរឿងហេតុនោះបានកើតឡើងកាលពីថ្ងៃទី១៧ មេសា ឆ្នាំ២០១២ ។ ក្រោយពីបែកធ្លាយរឿងអាស្រូវនេះ នគរបាលការិយាល័យព្រហ្មទណ្ឌកម្រិតធ្ងន់ខេត្តបានសុំដីកាពីតុលាការចាប់ខ្លួនជននេះ ហើយតុលាការបានចោទប្រកាន់ និងឃុំខ្លួនបណ្តោះអាសន្ននៅក្នុងពន្ធនាគារ ៕
ចែករំលែកព័តមាននេះ