ខេត្តកំពង់ចាម ៖ កុំព្យូទ័រប្រើពន្លឺព្រះអាទិត្យ១៩គ្រឿង ដែលអង្គការខេបបានផ្តល់ជូនវិទ្យាល័យសម្តេចម៉ែ ស្ថិតនៅភូមិ០៤-០៥ ឃុំជប់ ស្រុកត្បូងឃ្មុំ កន្លងមក សម្រាប់ឱ្យសិស្សរៀននោះត្រូវបានចោរកាត់សោទ្វារចូលលួចជាបន្តបន្ទាប់ដែលលើកទី១ នៅថ្ងៃទី៣០ សីហា អស់៥គ្រឿង និងលើកទី២ នៅថ្ងៃទី១ កញ្ញា ២០១២ អស់ចំនួន១៤គ្រឿងបន្ថែមទៀត ហើយមិនត្រឹមតែប៉ុណ្ណោះសូម្បីតែអាគុយប្រើពន្លឺព្រះអាទិត្យចំនួន២គ្រឿងក៏ត្រូវបានចោរលួចដោះយកទៅបាត់ដែរ ។ ករណីនេះត្រូវបានសមត្ថកិច្ចធ្វើការសន្និដ្ឋានថា អាចជាដង្កូវចេញពីសាច់ឯង ។
លោកឡុង សារិន អធិការរងនគរបាលស្រុកត្បូងឃ្មុំ ប្រាប់ឱ្យដឹងថា កាលពីវេលាម៉ោង៤ទៅ៧និង៣០នាទីយប់ថ្ងៃទី៣០ សីហា មានចោរមួយក្រុមគ្នាមិនតិចជាង២នាក់នោះទេ បានធ្វើសកម្មភាពកាច់សោទ្វារនៅជាន់ខាងក្រោម ហើយឡើងតាមជណ្តើរថ្មមកកាច់សោទ្វារបន្ទប់ដែលបំពាក់ទៅដោយកុំព្យូទ័រប្រើពន្លឺព្រះអាទិត្យ អស់ចំនួន៥គ្រឿង ។ លោកអធិការរងនគរបាលស្រុកត្បូងឃ្មុំ ប្រាប់បន្តថា ក្រោយពីដឹងដល់សមត្ថកិច្ចត្រូវបានលោកវរសេនីយ៍ត្រី ហ៊ាង ហ៊ត់ អធិការនគរបាលស្រុក បញ្ជាឱ្យកម្លាំងជំនាញស្រុកចុះសហការជាមួយនឹងប៉ុស្តិ៍រដ្ឋបាលទៅដល់កន្លែងកើតហេតុធ្វើការត្រួតពិនិត្យនៅ ជាន់ទី១នោះ តែមិនមានពន្លឺណាមួយទេ ។ លុះមកដល់ថ្ងៃទី១ កញ្ញា ២០១២ វេលាម៉ោង៤ទៅ៦ល្ងាច ស្រាប់តែកើតមានករណីចោរចូលមកលួចកុំព្យូទ័របន្ថែមទៀតជាលើកទី២ អស់ចំនួន១៤គ្រឿង រួមទាំងអាគុយប្រើពន្លឺព្រះអាទិត្យចំនួន២គ្រឿងយកទៅបាត់ផងដែរ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ