រាជធានីភ្នំពេញ ៖ នៅថ្ងៃទី១ កញ្ញា វេលាម៉ោង៧និង៣០នាទីព្រឹកនៅសាលប្រជុំនៃសាលាអន្តរជាតិសិង្ហបុរី(SIS)មានប្រារព្ធបើកវគ្គសិក្ខាសាលាស្តីពី«យុទ្ធនាការអប់រំពីការពាក់មួកសុវត្ថិភាពសម្រាប់អ្នករួមដំណើរទោចក្រយានយន្តជាកុមារនិងបណ្តុះបណ្តាលស្តីពីការពាក់មួកសុវត្ថិភាព» ដោយមានកិច្ចសហការពីអង្គការមូលនិធិបង្ការរបួសនៅអាស៊ី(AIP)និងមានការចូលរួមពីសិក្ខាកាមជា
រាជធានីភ្នំពេញ ៖ នៅថ្ងៃទី១ កញ្ញា វេលាម៉ោង៧និង៣០នាទីព្រឹកនៅសាលប្រជុំនៃសាលាអន្តរជាតិសិង្ហបុរី(SIS)មានប្រារព្ធបើកវគ្គសិក្ខាសាលាស្តីពី«យុទ្ធនាការអប់រំពីការពាក់មួកសុវត្ថិភាពសម្រាប់អ្នករួមដំណើរទោចក្រយានយន្តជាកុមារនិងបណ្តុះបណ្តាលស្តីពីការពាក់មួកសុវត្ថិភាព» ដោយមានកិច្ចសហការពីអង្គការមូលនិធិបង្ការរបួសនៅអាស៊ី(AIP)និងមានការចូលរួមពីសិក្ខាកាមជាយុវសិស្សនៃសាលាចំណេះទូទៅអន្តរជាតិសិង្ហបុរីចំនួន៤០០នាក់ ។
មានប្រសាសន៍ក្នុងពិធីបើកវគ្គលោកជំទាវបណ្ឌិតងឿន ផល្លីនពោធិតា នាយិកាសាលាអន្តរជាតិ សិង្ហបុរីថ្លែងក្នុងឱកាសនោះយ៉ាងច្បាស់ពីគោលបំណងនិងអត្ថប្រយោជន៍នៃសិក្ខាសាលានេះ ។ ដោយមើលឃើញពីគ្រោះថ្នាក់ចរាចរណ៍សព្វថ្ងៃដែលបង្កឡើងដោយសារអ្នកបើកបរយានយន្ត ជាពិសេសយុវជនភាគច្រើនមិនគោរពនិងមិនយល់ពីច្បាប់ចរាចរណ៍ ដូចនេះសិក្ខាសាលាថ្ងៃនេះនឹងធ្វើឱ្យយុវសិស្សយើងយល់ពីប្រយោជន៍ស្តីពីការពាក់មួកសុវត្ថិភាព និងសម្រាប់អ្នករួមដំណើរទោចក្រយានយន្តជាកុមារកាន់តែច្បាស់និងយកទៅអនុវត្តក្នុងពេលបើកទោចក្រយានយន្តដើម្បីជៀសផុតពីគ្រោះថ្នាក់ផ្សេងៗ ។
កម្មវិធីសិក្ខាសាលាថ្ងៃនេះ គ្រូឧទ្ទេសនាមមកពីអង្គការមូលនិធិបង្ការរបួសនៅអាស៊ី(AIP)បានធ្វើបទបង្ហាញមួយស្តីពីយុទ្ធនាការអប់រំពីការពាក់មួកសុវត្ថិភាពសម្រាប់អ្នករួមដំណើរទោចក្រយានយន្តជាកុមារនិងបណ្តុះបណ្តាលស្តីពីការពាក់មួកសុវត្ថិភាព ។
នេះជាលើកទី២ហើយដែលសាលានិងអង្គការបានសហការគ្នាដើម្បីលើកកម្ពស់សុវត្ថិភាពចរាចរណ៍ផ្លូវគោកដល់យុវសិស្សយើង ។ សាលាចំណេះទូទៅអន្តរជាតិសិង្ហបុរី(SIS)ជាគ្រឹះស្ថានអប់រំឯកជនឈានមុខមួយក្នុងរាជធានីភ្នំពេញ ដែលមានបើកបង្រៀនថ្នាក់ចំណេះទូទៅភាសាខ្មែរពីថ្នាក់ទី១ដល់ថ្នាក់ទី១២និងភាសាអង់គ្លេសគ្រប់កម្រិត ហើយឆ្នាំសិក្សាថ្មីនេះសាលានឹងបើកថ្នាក់មត្តេយ្យសិក្សាចាប់ទទួលសិស្សានុសិស្សពីអាយុ៣ដល់៥ឆ្នាំនៅទីតាំងដដែល និងផ្តល់ជូនការបញ្ជុះតម្លៃ២០%បន្ថែមទៀត ។
គណៈគ្រប់គ្រងសាលាតែងមានក្តីបារម្ភជានិច្ចចំពោះសុវត្ថិភាពចរាចរណ៍ផ្លូវគោករបស់សិស្សានុសិស្ស ។ សាលានឹងព្យាយាមធ្វើសិក្ខាសាលាបន្តបន្ទាប់ទៀត ដើម្បីឱ្យប្អូនៗសិស្សានុសិស្សកាន់តែយល់ច្បាស់ពីអត្ថប្រយោជន៍មួកសុវត្ថិភាព និងច្បាប់ចរាចរណ៍គ្រប់ៗគ្នា ។ មិនតែប៉ុណ្ណោះនៅឆ្នាំសិក្សាថ្មីនេះសាលានឹងសហការជាមួយក្រុមហ៊ុនធានារា៉ាប់រងមួយដើម្បីផ្តល់ជូនកិច្ចធានារា៉ប់រងពីគ្រោះថ្នាក់ផ្សេងៗ ជាពិសេសគ្រោះថ្នាក់ចរាចរណ៍ដល់សិស្សានុសិស្សក្នុងពេលប្អូនៗធ្វើដំណើរទៅមកសាលារៀន ។ សិក្ខាសាលាបានប្រព្រឹត្តទៅពីម៉ោង៧និង៣០នាទីព្រឹកដល់ម៉ោង៩និង៣០នាទីក្រោមបរិយាកាសរីករាយដោយមានការឆ្លើយតបនូវសំណួររបស់សិក្ខាកាមយ៉ាងផុសផុលទៀតផង ៕
ចែករំលែកព័តមាននេះ