រាជធានីភ្នំពេញ ៖ ពីរថ្ងៃជាប់ៗគ្នា គឺថ្ងៃទី២ និងទី៣ កញ្ញា នៅគល់ស្ពានព្រះមុនីវង្សថ្មី ត្រើយខាងកើត មានហេតុការណ៍គ្រោះថ្នាក់ចរាចរណ៍២ករណី បណ្តាលមកពីរថយន្តបើកបរចុះពីលើស្ពាន ហើយដាច់ហ្រ្វាំងរអិលចុះតាមកម្លាំងល្បឿនបុករះមនុស្សម្នាអ្នកធ្វើដំណើរតាមដងផ្លូវរត់ចែកផ្លូវគ្នាយ៉ាងប្រសាច ដែលករណីទី១ កើតឡើង កាលពីព្រឹកថ្ងៃទី២ កញ្ញា បង្កដោយរថយន្តក្រឡុកស៊ីម៉ងត៍ក៏បានបើកចុះពីលើស្ពានព្រះមុនីវង្សថ្មី ហើយដាច់ហ្រ្វាំងរអិលបុករះអ្នកធ្វើដំណើរ និងខូចខាតរថយន្ត៣គ្រឿង ម៉ូតូ៣គ្រឿង និងរ៉ឺម៉កម៉ូតូដឹកថ្ម ២គ្រឿង មនុស្សរបួសធ្ងន់ម្នាក់ ។
ដោយឡែកករណីទី២ កើតឡើងនៅព្រឹកថ្ងៃទី៣ កញ្ញា បង្កដោយរថយន្តធុនធំ ១គ្រឿង ម៉ាកហុីយ៉ាន់ដាយ ពណ៌ខៀវ បើកបរដោយឈ្មោះ សុន សាក់ អាយុ២៣ឆ្នាំ មានទីលំនៅស្រុកកំចាយមារ ខេត្តព្រៃវែង បានដឹកស៊ុមកញ្ចក់ពីខេត្តកំពង់ឆ្នាំង បំណងយកទៅលក់ឱ្យម៉ូយនៅ ស្រុកកៀនស្វាយ ខេត្តកណ្តាល ប៉ុន្តែខណៈធ្វើដំណើរចុះស្ពានព្រះមុនីវង្សថ្មីឆ្ពោះទៅត្រើយខាងកើត ស្រាប់តែរថយន្តជាន់ហ្វ្រាំងអត់ស៊ីហើយជ្រុលល្បឿនបុករះអ្នកធ្វើដំណើររត់ចែកផ្លូវគ្នាប្រសាចតែម្តង ។ រថយន្តខាងលើបានបុករះ ខូចខាតរថយន្ត៣គ្រឿង មានម៉ាកកាមរីបាឡែន ពណ៌ទឹកប្រាក់មួយគ្រឿង ម៉ាកកាមរីគូទហើម ពណ៌សមួយគ្រឿង និងមួយគ្រឿងទៀត ម៉ាកកូរ៉ូឡា ពណ៌ស្លែ រួចបន្តទៅបុករះម៉ូតូខូចខាតអស់៤គ្រឿង និងរ៉ឺម៉កម៉ូតូមួយគ្រឿងផងដែរ ។
តាមឈ្មោះសុន សាក់ ជាអ្នកបើកបររថយន្តខាងលើបាននិយាយថា មូលហេតុដែលរូបគេបើកបររថយន្តចុះពីលើស្ពានព្រះមុនីវង្សថ្មី បុករះអ្នកធ្វើដំណើរជាបន្តបន្ទាប់នោះ បណ្តាលមកពីរថយន្តដាច់ហ្រ្វាំងជាន់អត់ស៊ី ហើយខ្លួនភ័យស្លន់ស្លោពេកមិនដឹងជាបួងចង្កូតគេចទៅណាក៏បណ្តោយបុករះបែបនេះ ។
ក្នុងហេតុការណ៍នេះ បណ្តាលឱ្យមនុស្ស៣នាក់រងរបួសស្រាល ។ ក្រោយពេលកើតហេតុ ប៉ូលិសបានចុះវាស់វែង និងនាំយករថយន្តបង្កហេតុ និងរថយន្តខូចខាត រួមទាំងម៉ូតូទាំងអស់ទៅរក្សាទុកនៅអធិការដ្ឋាននគរបាលខណ្ឌមានជ័យ ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ