រាជធានីភ្នំពេញ ៖ លោកសោម អូន ប្រធានសភាសម្ព័ន្ធសហជីពជាតិកម្ពុជា និងជាប្រធានក្រុមប្រឹក្សាសហជីពជាតិកម្ពុជាបានមានប្រសាសន៍ប្រាប់កោះសន្តិភាពតាមទូរស័ព្ទកាលពីយប់ថ្ងៃទី២ កញ្ញា ២០១២ ថា សភាសម្ព័ន្ធសហជីពជាតិកម្ពុជា នឹងធ្វើលិខិតស្នើទៅ លោកវង សូត រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដើម្បីសុំអន្តរាគមន៍ទៅថៅកែរោងចក្រ សហគ្រាសអនុញ្ញាតឱ្យកម្មករ កម្មការិនីទូទាំងប្រទេសមានឱកាសទៅពិនិត្យឈ្មោះ និងចុះឈ្មោះបោះឆ្នោតជ្រើសរើសតំណាងរាស្ត្រថ្ងៃទី២៨ កក្កដា ២០១៣ ខាងមុខនេះ ។
លោកប្រធានសភាសម័ន្ធសហជីពជាតិកម្ពុជាបន្តថា ការបោះឆ្នោតជ្រើសរើសតំណាងរាស្ត្រខាងមុខនេះពិតជាមានសារសំខាន់ខ្លាំងណាស់ ដូច្នេះក្នុងនាមរូបលោកជាតំណាងសហព័ន្ធសហជីព លោកក៏សូមអំពាវនាវទៅថៅកែរោងចក្រ សហគ្រាសទាំងអស់ធ្វើយ៉ាងណារក្សាប្រាក់ឈ្នួលកម្មករក្នុងឱកាសដែលកម្មករឈប់សម្រាកទៅចុះឈ្មោះបោះឆ្នោត និងទៅពិនិត្យឈ្មោះបោះឆ្នោតនៅតាមឃុំ-សង្កាត់នានាទូទាំងព្រះរាជាណាចក្រកម្ពុជា ។ លោកសោម អូន បានបញ្ជាក់ថា ជាគោលការណ៍ក្រសួងការងារ និងបណ្តុះបណ្តាលវិជ្ជាជីវៈតែងធ្វើសេចក្តីជូនដំណឹងជម្រាបទៅនិយោជករោងចក្រសហគ្រាសទាំងអស់អំពីបញ្ហានេះ ។
សូមបញ្ជាក់ថា យុទ្ធនាការពិនិត្យឈ្មោះ និងចុះឈ្មោះបោះឆ្នោតប្រព្រឹត្តទៅចាប់ពីថ្ងៃទី១ កញ្ញា ដល់ថ្ងៃទី១២ តុលា ២០១២ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ