រាជធានីភ្នំពេញ ៖ រថយន្តកាមរីឆ្លាម ពណ៌ប្រផេះមួយគ្រឿងបើកចេញពីខារ៉ាអូខេ បួងចង្កូតមិនទាន់ជ្រុលទៅបុករបាំងថ្មពុះចែកផ្លូវបាក់អស់២កង់ ទាំងមេឃកំពុងភ្លៀង កាលពីវេលាម៉ោង១២និង២០នាទីរំលងអធ្រាត្រឈានចូលថ្ងៃទី៣ កញ្ញា នៅចំណុចស្តុបម៉ុងឌីយ៉ាល់ តាមមហាវិថីម៉ៅសេទុង កែងផ្លូវលេខ២៣០ ក្នុងសង្កាត់ផ្សារដើមគ ខណ្ឌទួលគោក ។ ហេតុការណ៍នេះមិនបង្កឱ្យមនុស្សរងរបួសទេ ។
សាក្សីឃើញហេតុការណ៍បានឱ្យដឹងថា រថយន្តកាមរីឆ្លាម ពណ៌ប្រផេះ ជិះគ្នា២នាក់ ប្រុសម្នាក់ ស្រីម្នាក់ បើកតាមផ្លូវលេខ២៣០ ពីកើតទៅលិច ខណៈមកដល់ចំណុចខាងលើរថយន្តបត់ស្តាំទាំងល្បឿនលឿន ហើយបួងចង្កូតមិនទាន់ជ្រុលទៅបុករបាំងថ្មពុះចែកផ្លូវបាក់អស់២កង់ ។ ប្រភពបន្តទៀតថា រថយន្តខាងលើទើបនឹងបើកចេញពីខារ៉ាអូខេឡឺវីស ក្នុងស្ថានភាពស្រវឹងធ្លាក់ភ្នែក ស្របពេលមេឃកំពុងភ្លៀងផង ទើបបណ្តាលឱ្យបុករបាំងថ្មចែកផ្លូវបែបនេះ។
ក្រោយពេលកើតហេតុ អ្នកបើកបរ និងអ្នករួមដំណើរក្នុងរថយន្តនាំគ្នារត់គេចបាត់អស់នៅសល់តែរថយន្តដែលរងការខូចខាតផ្នែកខាងមុខទាំងស្រុង និងបែកកញ្ចក់ផ្ទាំងខាងក្រោយ ដែលអ្នកឃើញហេតុការណ៍ប្រាប់ថា ម្ចាស់រថយន្តវាយបំបែកកញ្ចក់ដើម្បីចេញពីក្នុងរថយន្ត ព្រោះរថយន្តបើកទ្វារមិនរួច ។រថយន្តបង្កត្រូវសមត្ថកិច្ចស្ទូចយកទៅរក្សាទុកនៅសាលារាជធានីភ្នំពេញ ដើម្បីសងការខូចខាតទ្រព្យសម្បត្តិសាធារណៈ ៕
ចែករំលែកព័តមាននេះ