ខេត្តមណ្ឌលគិរី ៖ បច្ចុប្បន្នផ្ទៃដីដ៏ធំធេងរបស់មជ្ឈមណ្ឌលវប្បធម៌ជនជាតិភាគតិចភ្នំដោះក្រមុំកំពុងរងការបាត់បង់ដោយសារមានសំណង់តូចធំជាច្រើនបានសាងសង់យ៉ាងអនាធិបតេយ្យព័ទ្ធជុំវិញចង្កេះភ្នំយកជាកម្មសិទ្ធិផ្ទាល់ខ្លួន ហើយត្រូវបានគេសង្ស័យថា សំណង់តូចធំជាច្រើនដែលខ្លះសាងសង់រួច និងខ្លះទៀតកំពុងសាងសង់រំលោភលើផ្ទៃដីរបស់រដ្ឋដែលបានចុះបញ្ជីសារពើពន្ធរួចហើយនោះ ។
តែបញ្ហាខាងលើគេមិនដឹងថា អាជ្ញាធរខេត្ត-ក្រុង និងមន្ទីរពាក់ព័ន្ធបាននិងកំពុងមានចំណាត់ការយ៉ាងណានោះទេ? ព្រោះសំណង់ផ្ទះជាច្រើនបានកំពុងសាងសង់បន្តទៀតជាហូរហែ ឬប្រហែលជាត្រូវរ៉ូវគ្នាអស់ហើយក៏មិនដឹង? បានជាម្ចាស់សំណង់ទាំងនោះអាចបន្តសង់សំណង់ផ្សេងៗបានទៀតយ៉ាងរលូនបែបនេះ ។ ដីមជ្ឈមណ្ឌលវប្បធម៌ជនជាតិភាគតិចភ្នំដោះក្រមុំដែលកំពុងបាត់បង់បន្តិចម្តងៗ ស្ថិតនៅភូមិដោះក្រមុំ សង្កាត់សុខដុម ក្រុងសែនមនោរម្យ ។
ប្រភពឱ្យដឹងថា ផ្ទៃដីរបស់មជ្ឈមណ្ឌលវប្បធម៌ជនជាតិភាគតិចភ្នំដោះក្រមុំមានទំហំ១០១,៧៣ហិកតា តែក្នុងពេលឥឡូវនេះមានសំណង់តូចធំជាច្រើនបានសង់បង្អួតគ្នាព្រោងព្រាតលើដីរបស់រដ្ឋទាំងអត់អៀនខ្មាស់ ។ ប្រភពបន្តថា មិនតែប៉ុណ្ណោះ ក៏នៅមានការចាប់ដីយកជាកម្មសិទ្ធិ ដោយពុំទាន់មានសាងសង់ផ្ទះជាច្រើនប្លង់ទៀតផង ប៉ុន្តែពុំត្រូវបានគេដឹងថា ម្ចាស់ដីទាំងនោះជាប្រជាពលរដ្ឋធម្មតា ឬជាមន្ត្រីអ្នកមានអំណាចថ្នាក់ណាខ្លះឡើយ ហើយមានការអនុញ្ញាតពីជំនាញណានោះទេ ក្នុងការគ្រប់គ្រងដីនៅតំបន់ខាងលើ ។ ចំនួនផ្ទៃដីរបស់មជ្ឈមណ្ឌលវប្បធម៌ជនជាតិភាគតិចភ្នំដោះក្រមុំខាងលើបច្ចុប្បន្នត្រូវប្រភពអះអាងថា បានរួមតូចនៅសល់មិនបាន៨០ហិកតាផង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ