ទូរទស្សន៍រដ្ឋនិងក្រុមមួយនៃកងទ័ពស៊ីរីសេរី (កងកម្លាំងបះបោរ) រាយការណ៍ថា ពួកឧទ្ទាម១ក្រុមបានវាយប្រហារដោយគ្រាប់បែកកាលពីថ្ងៃទី២ កញ្ញា លើអគ្គសេនាធិការដ្ឋានកងទ័ពស៊ីរីនៅកណ្តាលក្រុងដាម៉ាស់រដ្ឋធានីស៊ីរី ។វីដេអូចាក់ផ្សាយតាមទូរទស្សន៍ផ្កាយរណបអារ៉ាប់រៀបរាប់ពីប្រតិបត្តិការនេះរបស់ពួកឧទ្ទាមគឺសំដៅលើបណ្តានាយទាហានកងទ័ពរបស់លោកអាសាដដែលរៀបចំផែនការនិងចេញបញ្ជាឱ្យធ្វើការសម្លាប់រង្គាលប្រជាជនស៊ីរី។ វីដេអូនេះថតដោយពួកឧទ្ទាមបញ្ជាក់ថា គ្រាប់បែកទាំងឡាយត្រូវបានលាក់នៅខាងក្នុងអគ្គសេនាធិការដ្ឋានកងទ័ពតែម្តង ។
ទូរទស្សន៍រដ្ឋដែលលើកឡើងពីសកម្មភាពភេរវកម្មមួយនោះរាយការណ៍ថា មនុស្ស៤នាក់បានត្រូវរបួសក្នុងការផ្ទុះដែលកើតមាននៅសង្កាត់អាប៊ូ រូម៉ាណេហ៍ ដែលនៅទីនោះមនុស្សសំខាន់៤នាក់ស្និទ្ធលោកបាចាអាល់អាសាដត្រូវស្លាប់ក្នុងការវាយប្រហារដោយគ្រាប់បែកមួយកាលពីថ្ងៃទី១៨ កក្កដាកន្លងមកនេះ ។
យោងតាមប្រជាជនថាការផ្ទុះកើតមាននៅម៉ាហ៍ឌីប៊ីនបារ៉ាកេហ៍ ក្បែរទីស្នាក់ការរបស់កងទ័ពជើងគោកនិងកងទ័ពជើងអាកាសស្ថិតក្នុងសង្កាត់អាប៊ូរូម៉ាណេហ៍ ខណៈដែលពួកបះបោរស៊ីរីបង្ហាញថា ពួកគេអាចចូលដល់បេះដូងនៃក្បាលម៉ាស៊ីនសន្តិសុខ ។ ចំណែកកងទ័ពស៊ីរីបានធ្វើការវាយលុកនានាក្នុងបណ្តាសង្កាត់ដែលពួកឧទ្ទាមបោះទីតាំង ។
បណ្តាប៊ុលដូហ្ស័រ របស់កងទ័ពរដ្ឋាភិបាលត្រូវបានគេប្រទះឃើញនៅក្បែរសង្កាត់អាល់ហ្សាយ៉ាត និងហ្វារុក ហើយបើកឆ្ពោះមកទិសខាងលិចកម្ទេចអគារអស់ប្រមាណជា២០ក្នុងសង្កាត់ទាំងឡាយរបស់ពួកស៊ុននីត ដែលមានពួកបះបោរជ្រកកោន ។ ប្រភពពួកប្រឆាំងនិយាយថា កងទ័ពបានវាយលុកចូលពេលមុននេះហើយសម្លាប់យុវជនអស់២៧នាក់ ៕
ចែករំលែកព័តមាននេះ