ខេត្តក្រចេះ ៖ បុរសជាប្តីដែលអតីតជាសង្គ្រាជវត្តបានបង្កហិ.ង្សាលើប្រពន្ធយ៉ាងចាស់ដៃក្នុងជម្លោះមួយ ខណៈពេលដែលស្ត្រីជាប្រពន្ធបានដាក់ពាក្យបណ្តឹងលែងលះព្រោះតែប្តីនេះជាជនប្រមឹកស្រា និងមានស្រី ។ ស្រមោលអពមង្គលនេះបានក្លាយជាជម្លោះឈានទៅដល់បុរសជាប្តីចាក់សាំងដុតប្រពន្ធទាំងសរសៃខ្ចី ព្រោះទើបសម្រាលកូនបានជាងមួយខែ រួចបានព្យាយាមផឹកទឹកអាស៊ីតសម្លា.ប់ខ្លួន តែ
ខេត្តក្រចេះ ៖ បុរសជាប្តីដែលអតីតជាសង្គ្រាជវត្តបានបង្កហិង្សាលើប្រពន្ធយ៉ាងចាស់ដៃក្នុងជម្លោះមួយ ខណៈពេលដែលស្ត្រីជាប្រពន្ធបានដាក់ពាក្យបណ្តឹងលែងលះព្រោះតែប្តីនេះជាជនប្រមឹកស្រា និងមានស្រី ។ ស្រមោលអពមង្គលនេះបានក្លាយជាជម្លោះឈានទៅដល់បុរសជាប្តីចាក់សាំងដុតប្រពន្ធទាំងសរសៃខ្ចី ព្រោះទើបសម្រាលកូនបានជាងមួយខែ រួចបានព្យាយាមផឹកទឹកអាស៊ីតសម្លាប់ខ្លួន តែមិនស្លាប់ ធ្វើឱ្យប្តីប្រពន្ធនេះរងរបួសធ្ងន់ទាំងពីរនាក់ ។
ការផ្ទុះជម្លោះដែលបង្កឡើងដោយបុរសអតីតជាសង្គ្រាជវត្តរូបនេះ បានកើតឡើងកាលពីល្ងាចថ្ងៃទី១ កញ្ញា នៅក្នុងលំនៅឋានរបស់ខ្លួន ស្ថិតក្នុងភូមិស្រែត្រែង ឃុំក្បាលដំរី ស្រុកសំបូរ។
នៅក្នុងបន្ទប់សង្គ្រោះនៃមន្ទីរពេទ្យខេត្ត ស្ត្រីរងគ្រោះជាប្រពន្ធឈ្មោះធន់ ស៊ីណា អាយុ៣២ឆ្នាំ បាននិយាយថា ប្តីរបស់គាត់មានចិត្តសាហាវឃោរឃៅខ្លាំងណាស់ បានចាប់ដុតគាត់ទាំងរស់ ដែលប្តីនោះឈ្មោះសំរឹទ្ធ តូច អាយុ៤៨ឆ្នាំ អតីតជាសង្គ្រាជវត្តទួលត្រាំងក្នុងឃុំអូរគ្រៀង ស្រុកសំបូរ បានសឹកមកយកគាត់ជាស្ត្រីមេម៉ាយកូនមួយធ្វើជាប្រពន្ធបានរយៈពេលពីរឆ្នាំមកហើយ។
ស្ត្រីជាប្រពន្ធរូបនេះ បាននិយាយទៀតថា គាត់ទើបតែសម្រាលកូនស្រីបានរយៈពេលជាង១ខែប៉ុណ្ណោះ ហើយប្តីរបស់គាត់មិនដែលអើពើមើលកូនប្រពន្ធសរសៃខ្ចីនោះទេ គឺមួយថ្ងៃៗដើរផឹកបាត់ពីផ្ទះហើយលួចមានស្រីញី និងតែងតែមករករឿងវាយធ្វើបាបគាត់ជាច្រើនលើកច្រើនសា ។ នៅមុនថ្ងៃកើតហេតុពីរថ្ងៃ បុរសជាប្តីរូបនេះបានរករឿងវាយគាត់ម្តងដោយទាញពូថៅគប់គាត់តែគាត់គេចទាន់ ហើយក្រោយពីបង្កហេតុរួចបានចេញពីផ្ទះបាត់រហូត ។
ស្ត្រីរូបនេះបាននិយាយរៀបរាប់ទៀតថា នៅថ្ងៃកើតហេតុ បុរសជាប្តីរូបនេះ ស្រវឹងស្រានិងបានមករករឿងគាត់នៅផ្ទះម្តងទៀត ហើយក៏ជិះម៉ូតូចេញទៅបាត់មួយសន្ទុះក្រោយមកក៏ត្រឡប់មកវិញដោយមានកាន់សំាងពីរដបមកជាមួយផង ។ ពេលមកដល់ផ្ទះវិញក៏បានរករឿងមដោយចោទគាត់ថាដាក់ពាក្យប្តឹងលែងលះ ធ្វើឱ្យមានជម្លោះកើតឡើងយ៉ាងតឹងសរសៃក ។ ខណៈគាត់ជាប្រពន្ធកំពុងបំបៅដោះកូនភ្លេចខ្លួន ស្រាប់តែប្តីនេះបានស្ទុះមកចាប់ទាញ.កអាវគាត់ពីក្រោយ និងបានយកសាំងនៅក្នុងដបចំនួន១លីត្រកន្លះចាក់ពីលើគាត់ ។ ដោយឃើញសភាពមិនស្រួល គាត់ក៏បោះកូនតូចទៅកន្លៀតជញ្ជាំងនិងបានស្ទុះទៅប្រវាយប្រតប់គ្នា រំពេចនោះប្តីគាត់បានគូសឈើគូសដុតគាត់បណ្តាលឱ្យឆាបឆេះឡើង ហើយគាត់បានព្យាយាមស្រែកឱ្យអ្នកស្រុកជួយនិងបានលោតចុះពីលើផ្ទះមកននៀលក្នុងភក់ ទើបភ្លើងរលត់ តែអណ្តាតភ្លើងបានឆេះរោលខ្នងនិងជើងរងរបួសជាទម្ងន់ ។ ឯប្តីគាត់ ក្រោយពីបង្កហេតុរួច បានយកដបទឹកអាស៊ីត នៅសល់ពីចាក់អាគុយនៅលើផ្ទះមកផឹកបណ្តាលឱ្យប្រកាច់បែកពពុះមាត់ដែរ ។
លោកវរសេនីយ៍ត្រី ប៊ុន ឈឿន អធិការនគរបាលស្រុកសំបូរ បានមានប្រសាសន៍ថា ជនរងគ្រោះទាំងពីរនាក់ប្តីប្រពន្ធត្រូវបានរថយន្តសង្គ្រោះរបស់នគរបាលនាំមកសង្គ្រោះនៅមន្ទីរពេទ្យខេត្តក្រោយពីកើតហេតុ ។ លោកអធិការបានឱ្យដឹងថា ចំពោះរឿងនេះ នគរបាលមិនទាន់ដឹងពីមូលហេតុច្បាស់លាស់នៅឡើយនោះទេ ខណៈដែលប្តីប្រពន្ធទាំងពីរនាក់បានរងរបួសធ្ងន់ដូចគ្នា មិនទាន់អាចសួរនាំបានឡើយ ។
ពិតជាគួរឱ្យហួសចិត្តពេកណាស់ដែលបុរសប្តីអតីតជាសង្គ្រាជវត្តធ្លាប់បួសរៀនធម៌របស់ព្រះពុទ្ធបរមគ្រូនៃយើង គួរណាស់តែមានក្តីមេត្តាករុណាចំពោះមនុស្សផងគ្នា ពិសេសប្រពន្ធរបស់ខ្លួន មិនគួរណាក្លាយសជាមនុស្សកោងកាចសាហាវនឹកស្មានមិនដល់បែបនេះសោះ ៕
ចែករំលែកព័តមាននេះ