ខេត្តបាត់ដំបង ៖ ក្រោយពីលទ្ធផលនៃការប្រលងសញ្ញាបត្រមធ្យមសិក្សាទុតិយភូមិ(បាក់ឌុប) ឆ្នាំនេះ ត្រូវបានប្រកាសឱ្យដឹងកាលពីព្រឹកថ្ងៃទី១ កញ្ញា គេឃើញយុវសិស្សដែលប្រលងជាប់បានបង្ហាញក្តីសប្បាយរីករាយក្រៃលែង ខណៈដែលយុវសិស្សប្រលងធ្លាក់សើច«សេះ» និងខ្លះដួលសន្លប់ ឯខ្លះទៀតសម្រក់ទឹកភ្នែកនៅចំពោះមុខមិត្តរួមថ្នាក់ពេលកំពុងឈរស្តាប់លទ្ធផល ដែលបានប្រកាសតាម
ខេត្តបាត់ដំបង ៖ ក្រោយពីលទ្ធផលនៃការប្រលងសញ្ញាបត្រមធ្យមសិក្សាទុតិយភូមិ(បាក់ឌុប) ឆ្នាំនេះ ត្រូវបានប្រកាសឱ្យដឹងកាលពីព្រឹកថ្ងៃទី១ កញ្ញា គេឃើញយុវសិស្សដែលប្រលងជាប់បានបង្ហាញក្តីសប្បាយរីករាយក្រៃលែង ខណៈដែលយុវសិស្សប្រលងធ្លាក់សើច«សេះ» និងខ្លះដួលសន្លប់ ឯខ្លះទៀតសម្រក់ទឹកភ្នែកនៅចំពោះមុខមិត្តរួមថ្នាក់ពេលកំពុងឈរស្តាប់លទ្ធផល ដែលបានប្រកាសតាមមណ្ឌលប្រលងនីមួយៗនៅក្នុងក្រុងបាត់ដំបង ។
ចាប់តាំងពីរសៀលរហូតដល់យប់នៃថ្ងៃប្រកាសលទ្ធផលប្រលង គេឃើញយុវសិស្សប្រុស ស្រីដែលប្រលងជាប់រាប់រយនាក់នាំគ្នាលុតជង្គង់នៅចំពោះមុខរូបសំណាកលោកតាដំបងគ្រញូងជាថ្មីម្តងទៀត ក្នុងទឹកមុខសប្បាយរីករាយជាមួយនឹងតង្វាយផ្លែឈើ មាន់ស្ងោរ មាន់ដុត ច្រើនសន្ធឹកសន្ធាប់ ដើម្បីថ្វាយនិងអុជធូបរំលឹកគុណលោកតាដំបូងគ្រញូងតាមការសន្យាដែលពួកគេជឿថា មហិទ្ធិឫទ្ធិដ៏ពូកែស័ក្តិសិទ្ធិរបស់លោកតាគឺជាផ្នែកមួយជួយឱ្យពួកគេបានប្រលងជាប់ ខណៈដែលយុវសិស្សប្រលងធ្លាក់គេចមុខមិនហ៊ានមកក្បែររង្វង់មូលរូបសំណាកលោកតាដំបងគ្រញូងឡើយ។ ពិតណាស់ លោកតាដំបូងគ្រញូង ពិតជាជួយឱ្យប្រលងជាប់ បើសិនជាអ្នកប្រលងប្រឹងជួយខ្លួនឯងនោះ ។
នៅចំពោះមុខរូបសំណាកលោកតាដំបងគ្រញូង យុវសិស្សប្រុស ស្រីដែលប្រលងជាប់និយាយថា ពួកគេធ្លាប់បានមកអុជធូបនៅចំពោះមុខលោកតាដំបងគ្រញូងមុនថ្ងៃប្រលង សុំឱ្យមហិទ្ធិឫទ្ធិរបស់លោកតាជួយឱ្យបានប្រលងជាប់ដោយសន្យាថា នឹងយកតង្វាយមកថ្វាយជូនលោកតា បើពួកគេប្រលងជាប់មែន ដូច្នេះហើយទើបពួកគេយកតង្វាយមកថ្វាយជូនលោកតាតាមការសន្យានេះ ។ ទោះជាយ៉ាងណា យុវសិស្សដែលប្រលងធ្លាក់វិញ ខ្លះបានស្តីបន្ទោសថា មកពីការប្រលងឆ្នាំនេះតឹងតែងពេក រីឯខ្លះទៀតថា គ្មានប្រាក់សម្រាប់សូកប៉ាន់នឹងគេ ។ ជាមួយគ្នានេះ យុវសិស្សដែលប្រលងជាប់មួយចំនួនក៏បានទទួលស្គាល់ថា ការប្រលងឆ្នាំនេះពិតជាមានការតឹងតែងមែន។
ក្នុងមណ្ឌលវិទ្យាល័យសម្តេចឪ កញ្ញាម្នាក់បានប្រាប់កោះសន្តិភាពទាំងទឹកភ្នែករលីងរលោងនៅចំពោះមុខមិត្តភក្តិថា ក្នុងចំណោមមិត្តភក្តិនាងជាច្រើនដែលមកប្រលងនៅមណ្ឌលសម្តេចឪនេះ គឺមានតែនាងម្នាក់ទេដែលប្រលងធ្លាក់ ។ នៅពេលសួរថា តើមូលហេតុអ្វីដែលនាំឱ្យប្រលងធ្លាក់ ? នាងនិយាយទាំងយកដៃខ្ទប់មុខថា«ខ្ញុំនិយាយមិនចេញទេ» ។ រីឯនៅខាងមុខមណ្ឌលគរុកោសល្យភូមិភាគខេត្តបាត់ដំបង(អ៊ាបឃុត)វិញ ខណៈមានយុវសិស្សកកកុញកំពុងឈរស្តាប់ការប្រកាសលទ្ធផលប្រលងក៏មានយុវសិស្សមួយចំនួនសម្រក់ទឹកភ្នែកដែរ និងខ្លះទៀតដួលសន្លប់ផងនៅពេលឮឈ្មោះរបស់ខ្លួនប្រលងធ្លាក់ ។ តាមប្រភពពីយុវសិស្សនានាថា ស្ទើរគ្រប់មណ្ឌលគេឃើញមានយុវសិស្សដែលប្រលងធ្លាក់បង្ហូរទឹកភ្នែក ជាពិសេសសិស្សស្រីៗ ។
លោកងី សែត ប្រធានមន្ទីរអប់រំយុវជន និងកីឡាខេត្តបានប្រាប់កោះសន្តិភាពនៅព្រឹកថ្ងៃទី ២ កញ្ញាថា សម្រាប់ការប្រលងសញ្ញាបត្រមធ្យមសិក្សាទុតិយភូមិ(បាក់ឌុប)ឆ្នាំ២០១២នេះមានបេក្ខជនប្រលងសរុបចំនួន៧.១០៣នាក់ ក្នុងនោះសិស្សស្រីមានចំនួន៣.៥១៦នាក់ ។ បេក្ខជនដែលប្រលងជាប់ឆ្នាំនេះមានចំនួន៥.៦៩៣នាក់ ក្នុងនោះសិស្សស្រីមានចំនួន៣.៣០៥នាក់ ច្រើនជាងសិស្សប្រុស ។ លោក ងី សែត បញ្ជាក់ថា ខេត្តបាត់ដំបងឆ្នាំនេះមានយុវសិស្សប្រលងជាប់និទ្ទេស«A»ចំនួន១២នាក់ ក្នុងចំណោមនិទេ្ទស«A»សរុបចំនួន១០៥នាក់ទូទាំងប្រទេស ខណៈឆ្នាំទៅមិញគ្មានជាប់ម្នាក់សោះ នៅខេត្តបាត់ដំបង ។ លោកបន្តថា បើប្រៀបធៀបទៅនឹងឆ្នាំទៅមិញការប្រលងបាក់ឌុបឆ្នាំនេះបេក្ខជនដែលប្រលងជាប់មានការថយចុះបន្តិច ។ ប៉ុន្តែលោកបានមានប្រសាសន៍ដោយមោទនភាពថា ក្នុងឆ្នាំនេះបេក្ខជនដែលប្រលងជាប់គឺមានគុណភាពល្អជាងឆ្នាំមុន ព្រោះជាប់និទេ្ទស«A»ដល់ទៅ១២នាក់ឯណោះ ។
លោក ងី សែត បញ្ជាក់ថា បេក្ខជនប្រលងឆ្នាំនេះស្ទើរគ្រប់មណ្ឌលមានវិន័យល្អប្រសើរជាងឆ្នាំមុន ។ រីឯលោកគ្រូអ្នកគ្រូធ្វើមេប្រយោគប្រចាំតាមមណ្ឌល ក៏គោរពភារកិច្ចបានល្អប្រសើរដែរ។ ដូច្នេះការប្រលងសញ្ញាបត្រមធ្យមសិក្សាទុតិយភូមិក្នុងឆ្នាំ២០១២នេះមានដំណើរការល្អប្រសើរ បើទោះជាបេក្ខជនដែលប្រលងជាប់មានការថយចុះបន្តិចក្តី តែមានគុណភាពខ្ពស់គួរឱ្យកត់សម្គាល់ ៕
ចែករំលែកព័តមាននេះ