ខេត្តកំពង់ស្ពឺ ៖ ស្ពានថ្មអូរគគីរ ស្ថិតនៅចន្លោះគីឡូម៉ែត្រលេខ១០៦ និង១០៧ លើដងផ្លូវជាតិលេខ៤ ចំណុចព្រំប្រទល់រវាងខេត្តកំពង់ស្ពឺ និងខេត្តព្រះសីហនុ ដែលត្រូវជនពុំស្គាល់មុខលួចដាក់គ្រាប់ច្នៃឱ្យផ្ទុះប៉ុនប៉ងផ្តាច់កាលពីថ្ងៃទី២៩ សីហា វេលាម៉ោង៩ និង៣០នាទីយប់នោះសមត្ថកិច្ចពាក់ព័ន្ធគ្រប់ស្ថាប័នកំពុងស្រាវជ្រាវ និងស្វែងរកជនសង្ស័យយ៉ាងសកម្មបំផុត ប៉ុន្តែរហូតមកដល់ថ្ងៃទី២ កញ្ញា ការសាកសួរជនសង្ស័យចំនួន៣នាក់ដែលបានឃាត់ខ្លួន មិនទាន់ទទួលលទ្ធផលបែបណានៅឡើយទេ ។
លោកអនុសេនីយ៍ឯក សម សាក់ នាយរងការិយាល័យកណ្តាលនគរបាលព្រហ្មទណ្ឌកម្រិតធ្ងន់ខេត្ត ឱ្យដឹងថា ការស្វែងរកមុខសញ្ញាបំផ្ទុះគ្រាប់កម្ទេចស្ពាននោះនៅតែស្ថិតក្នុងភាពងងឹតនៅឡើយ ។ វត្ថុតាងដែលបន្សល់ទុកនៅកន្លែងកើតហេតុ មានស្បែកជើងផ្ទាត់មួយគូ ពណ៌ស នោះដែលម្ខាងៗឃ្លាតឆ្ងាយពីគ្នា តែជាគូនឹងគ្នា។ តាមពិតទៅ ភាពស្មុគស្មាញនេះពុំអាចវែកមុខក្នុងពេលឆាប់ៗនោះទេ ព្រោះការដាក់គ្រាប់បែកច្នៃបំផ្ទុះទាក់ទិននឹងជំនាញបច្ចេកទេសគឺអ្នកប្រពឹត្តពិតជាបានសិក្សាពីបច្ចេកទេសផ្នែកយោធាយ៉ាងច្បាស់លាស់ ។ រីឯការសាកសួរជនសង្ស័យ៣នាក់ដែលសមត្ថកិច្ចពុំបញ្ចេញឈ្មោះនោះ ក៏ជាកងកម្លាំងយោធាដែរ តែពុំមានចម្លើយ ឬមានការពាក់ព័ន្ធអ្វីនោះទេ ទើបជនសង្ស័យទាំង៣នាក់ត្រូវបានដោះលែងពីការឃាត់ខ្លួនស៊ើបសួរ ។
ការស៊ើបអង្កេត និងស្រាវជ្រាវលើការប្រមាញ់ក្រុមឧក្រិដ្ឋជននេះ មានកងរាជអាវុធហត្ថខេត្ត យោធាខេត្ត ប៉ូលិស និងស្ថាប័នពាក់ព័ន្ធឯទៀត តែមិនទាន់រកឃើញពន្លឺនៅឡើយទេ។ ការដាក់គ្រាប់បំផ្ទុះប៉ុនប៉ងផ្តាច់ស្ពាននេះ បានធ្វើឱ្យមានការភ្ញាក់ផ្អើលជាទូទៅ ព្រោះថារឿងរ៉ាវបែបនេះបានឃ្លាតឆ្ងាយទៅហើយ បន្ទាប់ពីសង្គ្រាមក្នុងទសវត្សឆ្នាំ៨០បានផុតរលត់ទៅមិនមានពួកឧទ្ទាមណាមួយធ្វើសកម្មភាពបំផ្លិចបំផ្លាញបែបនេះទៀតទេ ។ ពេលនេះមានការចោទសួរថា តើការដាក់គ្រាប់បំផ្ទុះនោះមានគោលបំណងអ្វី ? គេពុំអាចដឹងពីគោលបំណងប្រាកដនៅឡើយទេ ដោយសារតែអ្នកប្រព្រឹត្តពុំទាន់ចាប់ខ្លួនបាន ៕
ចែករំលែកព័តមាននេះ