ខេត្តបន្ទាយមានជ័យ ៖ ផ្សារសិរីសោភ័ណគឺជាបេះដូងនៃខេត្តបន្ទាយមានជ័យ ប៉ុន្តែការរៀបចំសណ្តាប់ធ្នាប់ហាក់នៅមានកម្រិតនៅឡើយ ។ គេសង្កេតឃើញផ្លូវជាតិជុំវិញផ្សារចំនួន២ជ្រុង គឺជ្រុងខាងត្បូងនិងខាងលិច បានក្លាយទៅជាកន្លែងលក់ត្រី និងបន្លែ រួមទាំងទំនិញផ្សេងៗជាច្រើន សូម្បីតែម៉ូតូឬអ្នកថ្មើរជើងសឹងតែមិនអាចធ្វើចរាចរបានផង គឺណែនណាន់តាន់តាប់តែម្តង ចំណែកឯជ្រុងខាងជើងវិញ ក៏ក្លាយជាកន្លែងលក់ផ្លែឈើ លក់ត្រី និងផ្ញើកង់ម៉ូតូទៅហើយដែរ ។
អ្នកបើកបរម៉ូតូនិងរថយន្តខ្លះបានត្អូញត្អែរផងដែរថា ប្រសិនបើមានរថយន្តណាមួយឈប់ចតនោះនឹងមានការកកស្ទះចរាចរណ៍មិនខាន ហើយគេក៏មិនឃើញមានសមត្ថកិច្ចណាមួយចេញមករៀបចំសណ្តាប់ធ្នាប់ចរាចរណ៍ឱ្យមានរបៀបរៀបរយនោះឡើយ ។ មានមតិមួយចំនួនបាននិយាយថា ផ្លូវទាំង៣ជ្រុងជុំវិញផ្សារនោះមិនដឹងជាអាជ្ញាធរក្រុងឬខេត្តមានគោលការណ៍បែបណានោះទេ? ឬក៏ទុកឱ្យនៅបែបនេះរហូត?
ផ្សារសេរីសោភ័ណជាផ្សារដ៏ធំ និងជាមុខមាត់សម្រាប់ខេត្តបន្ទាយមានជ័យទាំងមូល ហើយខេត្តនេះមានអ្នកទេសចរជាតិ និងអន្តរជាតិចេញចូលច្រើន បើអាជ្ញាធរនៅតែបណ្តែតបណ្តោយឱ្យនៅតែបែបនេះអាចនឹងប៉ះពាល់ធ្ងន់ធ្ងរណាស់ដល់សោភ័ណភាពរបស់ខេត្តពិសេសវិស័យទេសចរណ៍តែម្តង ៕
ចែករំលែកព័តមាននេះ