រាជធានីភ្នំពេញ ៖ រថយន្តកូរ៉ូឡា ពណ៌សំបកឪឡឹក មួយគ្រឿងបើកដោយបុរសស្រវឹងជោកម្នាក់ក្នុងល្បឿនលឿនទៅបុករបាំងដែកចែកទ្រូងផ្លូវបាក់អស់មួយផ្ទាំង និងក្បាលព្រួញបាក់មួយដើមទៀតរួច ព្យាយាមបើករត់គេច តែត្រូវប៉ូលិសចរាចរដែលឈរជើងប្រចាំការនៅទីនោះឃើញក៏ដេញតាមចាប់ និងឃាត់ខ្លួនបាន កាលពីវេលាម៉ោង៣និង១៥នាទីរំលងអធ្រាត្រឈានចូលថ្ងៃទី១ កញ្ញា ២០១២ នៅចំណុចមុខផ្សារទំនើបរតនាផ្លាហ្សា តាមបណ្តោយមហាវិថីសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ ។
យោងតាមប្រភពព័ត៌មានពីប៉ូលិសចរាចរឱ្យដឹងថា មុនពេលកើតហេតុរថយន្តកូរ៉ូឡាពណ៌សំបកឪឡឹក មួយគ្រឿង បើកដោយបុរសម្នាក់ស្រវឹងជោកយ៉ាងលឿនតាមបណ្តោយមហាវិថីសហព័ន្ធរុស្ស៊ីក្នុងទិសដៅពីលិចទៅកើត ស្រាប់តែមកដល់មុខផ្សារទំនើបរតនាផ្លាហ្សាក៏ទៅបុករបាំងដែកចែកទ្រូងផ្លូវបាក់អស់មួយផ្ទាំង និងជ្រុលទៅបុកក្បាលព្រួញបាក់មួយដើមទៀត រួចព្យាយាមបើករត់គេចរហូតមកដល់មុខក្រសួងការងារត្រូវប៉ូលិសចរាចរដែរ ឈរជើងប្រចាំការនៅទីនោះឃាត់បានទាំងរថយន្តបង្កហេតុ និងអ្នកបើកបរយកទៅសាលារាជធានីភ្នំពេញ រង់ចាំដោះស្រាយ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ