ខេត្តកំពង់ធំ ៖ នៅសាលប្រជុំគណៈស្នងការនគរបាលខេត្តនាព្រឹកថ្ងៃទី២៧ សីហា កន្លងមកនេះ មានរៀបចំការប្រជុំផ្សព្វផ្សាយពីផែនការការពារសន្តិសុខ សណ្តាប់ធ្នាប់ និងសុវត្ថិភាពសម្រាប់ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១២ ក្រោមអធិបតីភាពលោកឧត្តមសេនីយ៍ត្រី ផាន់ សុផេង ស្នងការនគរបាលខេត្ត ដោយមានការចូលរួមពីលោកស្នងការរង នាយការិយាល័យ និងលោកអធិការ អធិការរង ក្រុង និងស្រុកជាច្រើនរូបទៀត ។
ជាការចាប់ផ្តើម លោកវរសេនីយ៍ឯក លឹម ហេន ស្នងការរងបានធ្វើរបាយការណ៍ផ្សព្វផ្សាយលិខិតមួយចំនួនដែលពាក់ព័ន្ធនឹងការពិនិត្យបញ្ជីឈ្មោះ ចុះឈ្មោះបោះឆ្នោតរបស់គណៈកម្មាធិការជាតិរៀបចំការបោះឆ្នោតគិតចាប់តាំងពីថ្ងៃទី១ កញ្ញា រហូតដល់ថ្ងៃទី១២ តុលា ។ ដើម្បីធានាឱ្យបាននូវសន្តិសុខ សណ្តាប់ធ្នាប់ និងសុវត្ថិភាពនៅគ្រប់ឃុំ-សង្កាត់ទូទាំងខេត្តកំពង់ធំនោះ ត្រូវប្រើប្រាស់កម្លាំងនគរបាលប៉ុស្តិ៍ក្នុង១ឃុំ២នាក់ ក្នុងខេត្តទាំងមូលមាន៨១ឃុំ-សង្កាត់ ដូច្នេះមាន១៦២នាក់ ។ កម្លាំងអន្តរាគមន៍ប្រចាំការនៅតាមអធិការដ្ឋាន២៤ម៉ោង១កន្លែង៥នាក់ ។
លោកស្នងការ ផាន់ សុផេង បានលើកយកបទបញ្ជារបស់អគ្គស្នងការនគរបាលជាតិ លេខ០០១បបជ មកបញ្ជាក់ថា វិស័យឯកជនមានប្រតិកម្មយ៉ាងខ្លាំងចំពោះសកម្មភាពនគរបាលប្រឆាំងបទល្មើសសេដ្ឋកិច្ចចុះត្រួតពិនិត្យបញ្ជីគណនេយ្យ និងឯកសារផ្សេងៗ ដែលទង្វើទាំងនេះផ្ទុយពីគោលនយោបាយរបស់រាជរដ្ឋាភិបាលកម្ពុជា និងពុំមានគោលការណ៍ពីអគ្គស្នងការនគរបាលជាតិទេ ។ ដើម្បីលុបបំបាត់ភាពអនាធិបតេយ្យ អគ្គស្នងការនគរបាលជាតិបានចេញបទបញ្ជាឱ្យនាយកដ្ឋាននគរបាលប្រឆាំងបទល្មើសសេដ្ឋកិច្ច ស្នងការនគរបាលរាជធានី-ខេត្ត ត្រូវគ្រប់គ្រងមន្ត្រីនគរបាលដែលបំពេញការងារប្រឆាំងបទល្មើសសេដ្ឋកិច្ចឱ្យបានម៉ឺងម៉ាត់ មិនអនុញ្ញាតឱ្យមន្ត្រីក្រោមឱវាទចុះត្រួតពិនិត្យវិស័យឯកជន ដោយគ្មានគោលការណ៍ជាដាច់ខាត ។ ហាមជាដាច់ខាតនូវរាល់សកម្មភាពចុះសហការជាមួយស្ថាប័នពាក់ព័ន្ធធ្វើការឆែកឆេរត្រួតពិនិត្យឃាត់ទុកមធ្យោបាយ សម្ភារផ្សេងៗទើបលើកសំណើសុំគោលការណ៍ពីអគ្គស្នងការដ្ឋាននគរបាលជាតិពិនិត្យសម្រេចលើនីតិវិធីដើម្បីអនុវត្តបន្ត ។
ជុំវិញការកើតមានចំណុចអសកម្មមានមតិនិយាយរិះគន់ថា សូម្បីតែអង្គការក្រៅរដ្ឋាភិបាលមួយចំនួនក៏មានដាក់ទីតាំងឃ្លាំមើលរង់ចាំយកលុយតាមរទេះ គោយន្ត សូម្បីតែដឹកអុសក៏ត្រូវបង់លុយដែរនៅតាមដងផ្លូវកន្លែងខ្លះ កុំថាឡើយដឹកឈើបន្តិចបន្តួចនោះ ៕
ចែករំលែកព័តមាននេះ