រាជធានីភ្នំពេញ ៖ ស្ត្រីមានផ្ទៃពោះ២ខែម្នាក់បានចង.កសម្លាប់ខ្លួន ក្រោយពេលមានទំនាស់បន្តិចបន្តួចជាមួយប្តីពីរឿងនាងសុំយកកូនចេញតែប្តីមិនព្រម ព្រោះពួកគេទាំង២នាក់ទើបរៀបការមិនទាន់បានកូនមួយនៅឡើយ ហើយនៅក្នុងខណៈពេលដែលប្តីរវល់ទៅលេងបាល់ទាត់ នាងក៏បានចង.កសម្លាប់ខ្លួននៅក្នុងបន្ទប់ទឹកតែម្តង ។ ហេតុការណ៍នេះបង្កឱ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង៦ល្ងាច ថ្ងៃទី១ កញ្ញា នៅបន្ទប់លេខ២០៨ ជាន់ទី១ ផ្ទះជួលស្ថិតក្នុងក្រុមទី៦ ភូមិអង្គ សង្កាត់ចោមចៅ ខណ្ឌពោធិ៍សែនជ័យ ។
ស្ត្រីរូបនេះឈ្មោះ ពៅ លីដា អាយុ១៨ឆ្នាំ ជាកម្មការិនីរោងចក្រកាត់ដេរ ស្នាក់នៅក្នុងផ្ទះជួលខាងលើ និងមានស្រុកកំណើតនៅភូមិសម្លឆៅ ឃុំចន្ត្រី ស្រុករមាសហែក ខេត្តស្វាយរៀង។ នាងបានយកខ្សែនីឡុងដែលជាខ្សែវាំងននបង្អួច ចង.កជាប់ជាមួយមាត់ទ្វារបន្ទប់ទឹកនៅក្នុងបន្ទប់ផ្ទះជួលនោះតែម្តង ។ ដោយឡែកប្តីរបស់នាងឈ្មោះ នេត ដារ៉ា អាយុ២៣ឆ្នាំ ជាកម្មកររោងចក្រកាត់ដេរដូចគ្នា មានស្រុកកំណើតនៅភូមិក្អែកពង ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង ។
សាច់ញាតិខាងប្តីបានរៀបរាប់ប្រាប់សមត្ថកិច្ចថា នាង ពៅ លីដា និងប្តីរបស់នាងឈ្មោះ នេត ដារ៉ា បានរៀបការជាមួយគ្នារយៈពេល៥ខែមកហើយ ហើយពេលនេះនាងមានផ្ទៃពោះ២ខែទៀតផង ។ បន្ទាប់ពីដឹងថាខ្លួនមានផ្ទៃពោះ នាងតែងតែនិយាយសុំប្តីដើម្បីយកកូននោះចេញ ព្រោះនាងមិនចង់ទុកដោយប្រាប់ថា មិនទាន់ចង់បានកូន ។ ចំណែកឯប្តីរបស់នាង ទោះបីជានាងអង្វរយ៉ាងណាក៏មិនព្រមឱ្យយកកូននេះចេញដែរ ព្រោះពួកគេទើបរៀបការថ្មីៗនៅមិនទាន់មានកូនម្នាក់ផង ហើយបុរសជាប្តីកំពុងចង់បានកូនទៀតទើបមិនយល់ព្រម ។ ទាំងអស់នេះជាកំហុសរបស់អ្នកទាំង២នាក់ដែលមិនមានផែនការគ្រួសារច្បាស់លាស់ ។
ប្រភពដដែលបានបន្តថា នៅមុនពេលកើតហេតុ ក្រោយពេលចេញពីធ្វើការនៅរោងចក្រវិញត្រឡប់ដល់ផ្ទះ នាងបាននិយាយលួងលោមប្តីសុំយកកូនចេញម្តងទៀត ប៉ុន្តែប្តីរបស់នាងនៅតែមិនយល់ព្រមដដែលហើយក៏មានទំនាស់គ្នាបន្តិចបន្តួចកើតឡើង ។ ខណៈនោះនាងបានចូលទៅបោកគក់សម្លៀកបំពាក់នៅក្នុងបន្ទប់ទឹក ឯប្តីរបស់នាងក៏ចេញពីផ្ទះទៅលេងបាល់បាត់ ហើយនាងក៏បានចង.កសម្លាប់ខ្លួនតែម្តង ។ នៅក្នុងបន្ទប់នោះមានអ្នកស្នាក់នៅចំនួន៥នាក់គឺនាងពៅ លីដា ប្តីរបស់នាង ព្រមទាំងក្រុមគ្រួសារខាងប្តី តែខណៈនោះគេជាប់រវល់ការងារនៅខាងក្រៅ មានតែរូបនាងនៅផ្ទះម្នាក់ឯងប៉ុណ្ណោះ ។
ប្រភពដដែលបានបន្តទៀតថា ភ្លាមៗនោះប្តីមិនបានដឹងទេរហូតដល់ម៉ោង៦ល្ងាចបងស្រីខាងប្តីចេញពីធ្វើការចូលទៅដល់ផ្ទះមិនឃើញនាង ម្យ៉ាងទ្វារជាប់គន្លឹះខាងក្នុង និងស្រែកហៅមិនឮទៀតនោះធ្វើឱ្យមានការសង្ស័យក៏វាយបំបែកកញ្ចក់មើលឃើញនាងចង.កសម្លាប់ខ្លួនស្លាប់បាត់ទៅហើយ ទើបមានការភ្ញាក់ផ្អើលឆោឡោឡើង ។ ដោយសារទ្វារមិនអាចបើកបានព្រោះជាប់គន្លឹះ និងសោនៅខាងក្នុងទើបគេយកម៉ូទ័រកាត់ដែកទៅកាត់ចម្រឹងបង្អួច ហើយលូកដៃទៅទាញគន្លឺះ និងចាក់សោចូលទៅដាក់សពចុះបាន ។
បុរសជាឪពុកនាងពៅ លីដា និយាយថា ក្រោយពេលរៀបការរួចកូនស្រីគាត់ និងប្តីរស់នៅជាមួយគាត់ក្នុងភូមិសាមគ្គី សង្កាត់ត្រពាំងក្រសាំង បានរយៈពេល៤ខែទើបនាំគ្នាចាកចេញទៅរស់នៅឯផ្ទះជួលខាងលើ។ ការចាកចេញពីគាត់នោះមិនមែនដោយសាររូបគាត់ដេញទេគឺដោយសារកូនប្រសាគាត់ឧស្សាហ៍ដើរលេងយប់ជ្រៅពេកទើបចូលផ្ទះ ហើយពេលគាត់ និងប្រពន្ធស្តីប្រដៅបន្តិចបន្តួចធ្វើឱ្យគេអន់ចិត្តក៏នាំគ្នាចាកចេញ ឯគាត់ និងប្រពន្ធមិនដែលមានគំនុំជាមួយកូននោះឡើយ ហើយនៅពេលកូនចាកចេញ គាត់ទិញម៉ូតូឱ្យមួយគ្រឿងទៀតផង ។
បុរសជាឪពុករូបនេះបន្តទៀតថា នៅក្នុងពេលកូនចេញទៅរស់នៅក្នុងផ្ទះជួលខាងលើ គាត់បានទាក់ទងនាងតាមទូរស័ព្ទសួរសុខទុក្ខនាងជារៀងរាល់ថ្ងៃប៉ុន្តែមិនដែលឮកូនស្រីប្រាប់ថា នាងមានទុក្ខលំបាកអ្វីឡើយ ។ នៅថ្ងៃកើតហេតុនោះ គាត់ក៏បាននិយាយទូរស័ព្ទលេងជាមួយកូនស្រីដែរ លុះដល់វេលាល្ងាចស្រាប់តែទទួលដំណឹងថា កូនស្រីចង.កស្លាប់បាត់ទៅហើយ ៕
ចែករំលែកព័តមាននេះ