ខេត្តកំពត ៖ ពលរដ្ឋនៅភូមិព្រៃសំណាងឃុំ ខ្ជាយខាងជើង ស្រុកដងទង់កំពុងតែនាំគ្នាបុកដីដាំសន្ទូងនៅក្នុងស្រែ អ្នកភូមិខ្លះបានរ៉ែកទឹកស្រោចលើដី និងអ្នកភូមិខ្លះបានដងទឹកដាក់កំសៀវ ហើយដើរស្រោចទៅលើដីដ៏ស្ងួតហែងដើម្បីស្ទូងស្រូវ ។ បើតាមសំដីស្ត្រីជាម្ចាស់ស្រែឈ្មោះ ង៉ែតអាយុ៣៥ឆ្នាំ និងប្តីឈ្មោះ ពាន សារឿនអាយុ៣៧ឆ្នាំ បាននិយាយថាគ្រួសារគាត់ទើបតែបានបុក
ខេត្តកំពត ៖ ពលរដ្ឋនៅភូមិព្រៃសំណាងឃុំ ខ្ជាយខាងជើង ស្រុកដងទង់កំពុងតែនាំគ្នាបុកដីដាំសន្ទូងនៅក្នុងស្រែ អ្នកភូមិខ្លះបានរ៉ែកទឹកស្រោចលើដី និងអ្នកភូមិខ្លះបានដងទឹកដាក់កំសៀវ ហើយដើរស្រោចទៅលើដីដ៏ស្ងួតហែងដើម្បីស្ទូងស្រូវ ។ បើតាមសំដីស្ត្រីជាម្ចាស់ស្រែឈ្មោះ ង៉ែតអាយុ៣៥ឆ្នាំ និងប្តីឈ្មោះ ពាន សារឿនអាយុ៣៧ឆ្នាំ បាននិយាយថាគ្រួសារគាត់ទើបតែបានបុកដីស្ទូងស្រូវបាន៤០កណ្តាប់ប៉ុណ្ណោះទម្រាំបុកដាំអស់សំណាបប៉ុណ្ណឹងត្រូវដងទឹកស្រោច ទើបស្ទូងបាន ។
ពលរដ្ឋរូបនេះបាននិយាយថាសំណាបនៅក្នុងស្រែ និងសន្ទូងអ្នកភួមិមួយចំនួន ទៀតបានងាប់អស់ទៅហើយដោយសារមេឃមិនព្រមភ្លៀង ។ លោក មាស និន ប្រធានឃុំ ខ្ជាយខាងជើងបានប្រាប់ឱ្យដឹងថាពលរដ្ឋនៅក្នុងឃុំទាំងមូលមិនទាន់បានដកស្ទូងនៅឡើយទេ ហើយពលរដ្ឋខ្លះមានទឹកនៅក្នុងស្រះត្រពាំង អណ្តូងក៏នាំគ្នាបូមរីងអស់់ទៅហើយ ។ លោកមាស និន បានបញ្ជាក់ថាសន្ទូង និងសំណាបរបស់ពលរដ្ឋត្រូវបានងាប់ជាបណ្តើរៗបើសិនដាច់ខែសីហានេះ នៅតែមិនមានភ្លៀងធា្លក់ ។
លោក កាន់ បូច ប្រធានឃុំ ដងទង់បានប្រាប់កោះសន្តិភាពថាពលរដ្ឋនៅក្នុងឃុំរបស់លោកមិនទាន់បានដកសន្ទូងនៅឡើយទេ ។ លោកបានឱ្យដឹងថាសូម្បីតែស្ទឹងមួយឆ្លងកាត់ឃុំដងទង់ក៏រីងអស់ទឹកស្ទើរតែរកអោយគោក្របីផឹកមិនបានផង ។ លោក ចាន់ រឹទ្ធ អនុប្រធានមន្ទីរកសិកម្មខេត្តកំពតធា្លប់បានមានប្រសាសន៍ថាការរាំងស្ងួតពិតជាបានកើតឡើងមែនប៉ុន្តែនៅតាមបណ្តាស្រុកមួយចំនួនទៀត ពលរដ្ឋបានដកស្ទូងខ្លះដែរហើយ ឯស្រុកខ្លះទៀតមិនទាន់បានស្ទូងនៅឡើយដោយខ្វះទឹក ។
ប្រជាកសិករនៅឃុំផ្សេងៗ នៅតែមានកង្វល់ពីការខ្វះទឹកសម្រាប់ដកស្ទូងដែរព្រោះសំណាបកាន់តែចាស់ខែបែរជាមិនទាន់បានស្ទូង ។ របរធ្វើស្រែប្រវាស់មេឃពិតជានិយាយលែងចេញហើយ ៕
ចែករំលែកព័តមាននេះ