ADផ្ទាំងផ្សព្វផ្សាយពាណិជ្ជកម្ម

បុស្បា ប៉ាន់ ទទួលអាហារូបករណ៍ពីសាលាតន្ត្រីល្បី ចេញដំណើរទៅរៀន9ឆ្នាំប្រកបដោយមោទនភាព

12 ឆ្នាំ មុន

០១ ខែ កញ្ញា ឆ្នាំ ២០១២ ម៉ោង ០១:០០

រាជធានីភ្នំពេញ ៖ «ឆ្ពោះទៅរកភាពរីកចម្រើនថ្មីមួយទៀតសម្រាប់ជំនាញសិល្បៈ» នេះគឺជាអ្វីដែលបុស្បា ប៉ាន់ កំពុងធ្វើ ។ តារាចម្រៀងវ័យក្មេងដ៏លេចធ្លោរូបនេះ បានចាកចេញពីកម្ពុជាតាមយន្តហោះកាលពីរាត្រីថ្ងៃទី២៩ សីហា ឆ្ពោះទៅសិក្សានៅសាលា WALNUT HILL SCHOOL FOR THE ARTS ជាសាលាសិល្បៈតន្ត្រីល្បីឈ្មោះបំផុតក្នុងសាកលលោក ស្ថិតនៅក្រុងបូស្តុន រដ្ឋ

បុស្បា ប៉ាន់ ជាកូនខ្មែរម្នាក់ប្រកបដោយមោទនភាព ព្រោះមានតែនាងជាអ្នកចម្រៀងអូប៉េរ៉ា ម្នាក់គត់ចេញពីបណ្តាប្រទេសក្នុងសមាគមប្រជាជាតិអាសីុអាគ្នេយ៍ដែលបានចូលរៀននៅសាលានោះដំបូងគេ ។សាលា WALNUT HILL SCHOOL FOR THE ARTS ផ្តល់អាហារូបករណ៍ឱ្យបុស្បា ប៉ាន់ ៥០% ខណៈសិស្សរៀននៅសាលានោះក្នុងមួយឆ្នាំត្រូវបង់ថ្លៃសិក្សាចំនួន៥ម៉ឺនដុល្លារ ។ ក្រៅពីនេះវិស័យឯកជន និងសប្បុរសជនក្នុងស្រុកឧបត្ថម្ភបុស្បា ប៉ាន់ ៣០% ។

នៅសល់២០%ទៀត ជាអ្វីដែលបុស្បា ប៉ាន់ ពិសេសឪពុកម្តាយនាងកំពុងខ្វល់ខ្វាយ ព្រោះពួកគាត់ពុំមានលទ្ធភាព ។ ដូច្នេះហើយអ្នកមានគុណរបស់តារាចម្រៀងវ័យក្មេងដែលយកចិត្តទុកដាក់បណ្តុះបណ្តាលកូនគួរឱ្យសរសើរនេះ កំពុងតែស្វះស្វែងរកការឧបត្ថម្ភ ។ ពួកគាត់អំពាវនាវឱ្យសប្បុរសជនជួយសម្រាប់ការសិក្សារបស់បុស្បា ប៉ាន់ ព្រោះថ្វីដ្បិតសម្រាប់ការចេះដឹងផ្ទាល់ខ្លួនរបស់នាង តែនាងជាធនធានសិល្បៈមួយរបស់កម្ពុជា ហើយនាងនឹងចូលរួមចំណែកអភិវឌ្ឍក្នុងវិស័យសិល្បៈ វប្បធម៌ជាតិនាពេលខាងមុខ ។

តាមលោកប៉ាន់ ម៉េងហ៊ាង ជាឪពុកឱ្យដឹងថា កូនស្រីរបស់លោកត្រូវសិក្សានៅសាលានោះរយៈពេល៩ឆ្នាំ ។ នាងត្រូវចំណាយពេលបីឆ្នាំនៅសាលានោះ មុននឹងបន្តរយៈពេល៦ឆ្នាំទៀត ដើម្បីបញ្ចប់កម្រិតខ្ពស់បំផុតផ្នែកចម្រៀងអូប៉េរ៉ា និងតន្ត្រី ។
បុស្បា ប៉ាន់ ជាសិស្សក្មេងជាងគេនៅសាលានោះ ព្រោះសាលាទទួលសិស្សអាយុចាប់ពី១៨ឆ្នាំឡើង ខណៈនាងមានអាយុទើបតែ១៥ឆ្នាំប៉ុណ្ណោះ ប៉ុន្តែដោយនាងមានទេពកោសល្យខ្ពស់ទើបមានឱកាសពិសេសនេះ ។សាលា WALNUT HILL SCHOOL FOR THE ARTS បើកដំបូងនៅឆ្នាំ ១៨៩៣ និងក្លាយជាសាលាតន្ត្រីល្បីឈ្មោះក្នុងលោក ។ ឆ្នាំនេះ សាលាទទួលសិស្សមានទេពកោសល្យផ្នែកចម្រៀងអូប៉េរ៉ា តែ៥រូបប៉ុណ្ណោះ ក្នុងនោះមានបុស្បា ប៉ាន់ ពីកម្ពុជាគួរឱ្យមានមោទនភាព ។

ទាំងសប្បាយរីករាយ ទាំងព្រួយបារម្ភ នេះជាអារម្មណ៍ដែលបុស្បា ប៉ាន់ ទទួលសម្រាប់ការឈានឆ្ពោះទៅចូលសាលាតន្រ្តីលំដាប់ខ្ពស់នោះ ។ មុនពេលឡើងយន្តហោះនៅអាកាសយានដ្ឋានអន្តរជាតិភ្នំពេញ នាងនិយាយថា «ខ្ញុំសប្បាយចិត្តព្រោះបានទៅរៀននៅសាលាល្បីឈ្មោះ និងបំពេញតាមក្តីសុបិនរបស់ខ្លួន ប៉ុន្តែទន្ទឹមនេះក៏មិនសប្បាយចិត្តដែរ ព្រោះត្រូវឃ្លាតពីឪពុកម្តាយ បងប្អូន និងម្យ៉ាងទៀតព្រួយបារម្ភផ្នែកប្រាក់សម្រាប់បង់ថ្លៃសិក្សា ខ្លាចមិនអាចបន្តបានចប់ចុងចប់ដើម» ។ជាមួយក្តីបារម្ភនេះ តារាចម្រៀងអូប៉េរ៉ា វ័យក្មេងរបស់កម្ពុជារូបនេះ ចង់ឱ្យសប្បុរសជនជួយដល់នាង ដើម្បីមានលទ្ធភាពអាចសិក្សាបានចប់ចុងចប់ដើម ហើយត្រឡប់មកកម្ពុជាវិញ ដើម្បីរួមចំណែកក្នុងវិស័យសិល្បៈវប្បធម៌ និងជួយបណ្តុះបណ្តាលអ្នកជំនាន់ក្រោយពីនាងទៀត ។

លោក ឃួន សិទ្ធិស័ក្ខិ ជាអ្នកចម្រៀងអូប៉េរ៉ាទោលតែម្នាក់គត់នៅកម្ពុជា និងជាគ្រូបង្ហាត់បុស្បា ប៉ាន់ រយៈពេល១ឆ្នាំចុងក្រោយនេះសរសើរថា នាងមានសំឡេងល្អ ដូច្នេះនាងនឹងមានការរីកចម្រើន ហើយអាចនឹងឈានជើងទៅកាន់លំដាប់អន្តរជាតិ ។
លោកសិទ្ធិស័ក្ខិ កត់សម្គាល់ថា បុស្បា ប៉ាន់ រៀនរយៈពេលមួយឆ្នាំជាមួយលោកស្មើនឹងជនបរទេសរៀនចម្រៀងនេះ១០ឆ្នាំ ។
ក្រៅពីចម្រៀងអូប៉េរ៉ា ដែលបុស្បា ប៉ាន់ ចេះច្រៀងយ៉ាងពីរោះពីធម្មជាតិ គួបផ្សំជាមួយការហាត់រៀនផងនោះ នាងចេះប្រើឧបករណ៍តន្ត្រីព្យ៉ាណូ ហ្គីតា និងវីយូឡុងយ៉ាងស្ទាត់ជំនាញ ។ នេះជាលទ្ធផលនៃការខិតខំកសាងខ្លួនរបស់បុស្បា ប៉ាន់ ជាមួយនឹងការយកចិត្តទុកដាក់បណ្តុះបណ្តាលអនាគតកូនរបស់ឪពុកម្តាយនាង ។

មហាជនសរសើរបុស្បា ប៉ាន់ ដែលមានទេពកោសល្យសិល្បៈល្អ ហើយអបអរសាទរ និងគាំទ្រចំពោះការចេញទៅសិក្សានៅសាលាតន្ត្រីលំដាប់ខ្ពស់ និងល្បីល្បាញរបស់នាង ។គេរំពឹងថា រយៈពេល៩ឆ្នាំក្រោយដែលបុស្បា ប៉ាន់ បញ្ចប់ការសិក្សារនៅសាលាតន្ត្រីនោះ នាងនឹងលូតលាស់ជាតារាចម្រៀងអូប៉េរ៉ាឆ្នើមសម្រាប់កម្ពុជា ហើយអាចឈានចូលលំដាប់អន្តរជាតិគួរជាទីមោទនៈសម្រាប់រូបនាងផ្ទាល់ ក្រុមគ្រួសារ និងកម្ពុជាទឹកដីអនុស្សាវរីយ៍នៃការចាប់ផ្តើមដុះពន្លកលូតលាស់របស់នាង ៕

អត្តបទផ្សេងៗទៀត

អ្នកនាំពាក្យសម្តេចតេជោចំ.អ.កឱ្យអគ្គលេខាធិការរងនាយករដ្ឋមន្ត្រីថៃថា៖ បើចិត្តសឿងប្តឹងទៅតុលាការយុត្តិធម៌អន្តរជាតិ

9 ម៉ោង មុន

វិវាទកម្ពុជា-ថៃ សម្តេចបវរធិបតី៖ ប្រទេសមួយចំនួនសុំខ្លួនចូលរួមសម្របសម្រួល តែម៉ោងស្មើនេះយើងមិនទាន់បានទៅពឹងអ្នកណាទេ លើកលែងតែ៤ចំណុចប៉ុណ្ណោះ

9 ម៉ោង មុន