ខេត្តកំពង់ឆ្នាំង ៖ រថយន្តដឹកអេស្កាវ៉ាទ័រមួយគ្រឿងបានបើកក្នុងល្បឿនលឿនដល់ផ្លូវកោងបត់មិនទាន់បានជ្រុលចូលទៅក្នុងសួនច្បារហើយបានបុកកិនបង្គោលច្រវាក់ដាក់លម្អជុំវិញស្តូបអនុស្សាវរីយ៍កម្ពុជា-វៀតណាម បណ្តាលឱ្យបាក់អស់ជាច្រើនបង្គោល និងធ្វើឱ្យមានការភ្ញាក់ផ្អើល កាលពីវេលាម៉ោង៤និង៣០នាទីរសៀលថ្ងៃទី៣០ សីហា នៅផ្លូវបំបែកជា៤ចំណុចចន្លោះមុខមន្ទីរបរិស្ថាន
ខេត្តកំពង់ឆ្នាំង ៖ រថយន្តដឹកអេស្កាវ៉ាទ័រមួយគ្រឿងបានបើកក្នុងល្បឿនលឿនដល់ផ្លូវកោងបត់មិនទាន់បានជ្រុលចូលទៅក្នុងសួនច្បារហើយបានបុកកិនបង្គោលច្រវាក់ដាក់លម្អជុំវិញស្តូបអនុស្សាវរីយ៍កម្ពុជា-វៀតណាម បណ្តាលឱ្យបាក់អស់ជាច្រើនបង្គោល និងធ្វើឱ្យមានការភ្ញាក់ផ្អើល កាលពីវេលាម៉ោង៤និង៣០នាទីរសៀលថ្ងៃទី៣០ សីហា នៅផ្លូវបំបែកជា៤ចំណុចចន្លោះមុខមន្ទីរបរិស្ថាន និងស្នងការដ្ឋាននគរបាលខេត្ត ។
ទោះយ៉ាងណាអ្នកបើកបររថយន្តខាងលើនេះ ដែលប៉ូលិសបានអះអាងថា ស្រវឹងហើយបាត់បង់ម្ចាស់ការត្រូវបានឃាត់ខ្លួនភ្លាមៗផងដែរ តែហេតុការណ៍នេះ មិនមាននរណាម្នាក់រងរបួសទេ ។លោកអៀរ ប៊ុនធឿន នាយការិយាល័យប៉ូលិសចរាចរផ្លូវគោកនៃស្នងការដ្ឋាននគរបាលខេត្តបាននិយាយឱ្យដឹងថា រថយន្តបង្កហេតុម៉ាក ហ៊ីយ៉ាន់ដាយ បើកបរដោយឈ្មោះ វ៉ន សុថុន អាយុ៣២ឆ្នាំ មានទីលំនៅភូមិសន្ទូច ឃុំស្រែថ្មី ស្រុករលាប្អៀរ។
មុនពេលកើតហេតុរថយន្តខាងលើនេះ បានធ្វើដំណើរពីជើងទៅត្បូង ក្នុងល្បឿនលឿន លុះមកដល់ចំណុចផ្លូវបំបែកជា៤ អ្នកបើកបរបានបត់រថយន្តមកស្តាំ តែដោយសាររថយន្តនោះមានល្បឿនលឿនពេកបត់មិនទាន់ក៏ជ្រុលទៅត្រង់ឡើងសួនច្បារបុកស្លាកចរាចរណ៍ បុករបងថ្ម សម្រាប់អង្គុយលេង និងបានបន្តទៅបុកបង្គោលកម្ពស់ប្រហែល១ម៉ែត្របាក់ជាច្រើនដើមដែលដាក់ច្រវាក់ព័ទ្ធជុំវិញស្តូបអនុស្សាវរីយ៍កម្ពុជា-វៀតណាម ជាប់ទៅមុខលែងរួច ។ លោកបានបន្តថា ក្រោយពេលកើតហេតុ អ្នកបើកបររថយន្តខាងលើ ត្រូវបានប៉ូលិសនាំទៅកាន់ការិយាល័យចរាចរណ៍ផ្លូវគោកដើម្បីត្រួតពិនិត្យនិងវាស់ជាតិអាល់កុលក្នុងខ្លួនឃើញមានជាតិស្រវឹងខ្លាំងតែដោយសារមានការធានាពីក្រុមគ្រួសារថា ជួសជុលទ្រព្យសម្បតិ្តសាធារណៈឡើងវិញនោះ ប៉ូលិសបានអនុញាតឱ្យត្រឡប់ទៅលំនៅឋានវិញ ។
នេះជាករណីគ្រោះថ្នាក់ពុំធ្លាប់មានពីមុនមក ប៉ុន្តែចាត់ថាសំណាងហើយព្រោះនៅកន្លែងកើតហេតុជារៀងរាល់ថ្ងៃ គឺជាកន្លែងហាត់ប្រាណ និងទាត់សីរបស់ប្រជាពលរដ្ឋរាល់ល្ងាច ប៉ុន្តែនៅល្ងាចនោះមិនទាន់ដល់ម៉ោងពួកគាត់មកហាត់ប្រាណ និងជួនជាមានរលឹមតិចៗផង ទើបមិនមានមនុស្ស បើសិនជាមានមនុស្សដូចសព្វដងវិញពិតជាមានសោកនាដកម្មមិនខាន ៕
ចែករំលែកព័តមាននេះ