រាជធានីភ្នំពេញ ៖ យុវជន៣នាក់ ជិះម៉ូតូតាមបណ្តោយមហាវិថីព្រះសីហនុ ក្នុងល្បឿនលឿនបុកគ្នាជាមួយម៉ូតូមួយគ្រឿងទៀតជិះគ្នា២នាក់ ខណៈកំពុងឆ្លងផ្លូវពេញទំហឹង បណ្តាលឱ្យម៉ូតូទាំងពីរគ្រឿងរងការខូចខាតទាំងសងខាង កាលពីវេលាម៉ោង៩ និង៤០នាទីយប់ថ្ងៃទី១៦ សីហា ២០១២ នៅចំណុចស្តុបវត្តមហាមន្ត្រី១៦៣ កែងមហាវិថីព្រះសីហនុ ទល់មុខផ្ទះលេខ២៧៤ ក្នុងសង្កាត់ អូឡាំពិក ខណ្ឌចំការមន តែសំណាងល្អមិនបណ្តាលឱ្យមនុស្សណាម្នាក់រងរបួសធ្ងន់ធ្ងរឡើយ ។
ប៉ូលិសមូលដ្ឋានឱ្យដឹងថា ម៉ូតូម៉ាកឌ្រីមសេ១២៥ ពណ៌ខ្មៅ គ្មានស្លាកលេខជិះដោយក្មេងស្ទាវ២នាក់ ។ ចំណែកម៉ូតូម៉ាកស្គូពី ពណ៌ក្រហម ជិះដោយយុវជន៣នាក់ ។ សាក្សីប្រាប់សមត្ថកិច្ចថា មុនពេលកើតហេតុ គេឃើញយុវជន៣នាក់ ជិះម៉ូតូស្គូពីមួយគ្រឿងបើកប្រដេញគ្នាជាមួយម៉ូតូមិត្តភក្តិតាមបណ្តោយមហាវិថីព្រះសីហនុក្នុងទិសដៅពីលិចទៅកើត ។ លុះមកដល់ចំណុចកើតហេតុ ក៏បានបុកគ្នាជាមួយម៉ូតូម៉ាកឌ្រីមសេ កំពុងឆ្លងផ្លូវបណ្តាលឱ្យម៉ូតូទាំងពីរគ្រឿងដួលរងការខូចខាត ។ បន្ទាប់ពីកើតហេតុនគរបាលចរាចរខណ្ឌចំការមន បានយកម៉ូតូទាំងពីរគ្រឿងទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីរង់ចាំការដោះស្រាយ ៕
ចែករំលែកព័តមាននេះ