ខេត្តតាកែវ ៖ ចាន់ជាប្រភេទផ្លែឈើម៉្យាងភាគច្រើនដុះនៅតំបន់ព្រៃភ្នំ ផ្លែរបស់វាបើនៅខ្ចីមានរសជាតិចត់តែពេលវាទុំមានក្លិនក្រអូបប្រហើរឈ្ងប់ មានរសជាតិផ្អែមឆ្ងាញ់គួរឱ្យចង់ទទួលទាន ។ គ្រួសារអ្នកជនបទ ពិសេសតំបន់ព្រៃភ្នំបានដាំដើមចាន់នេះ លើដីភូមិរបស់ខ្លួនដើម្បីអាស្រ័យផលពីវា ។
ស្ត្រីឈ្មោះ ស៊ឹម ជីម ក្នុងវ័យ៦៥ឆ្នាំ រស់នៅក្នុងភូមិភ្នំបុរី ឃុំព្រែកផ្ទោល ស្រុកអង្គរបុរី ខេត្តតាកែវ បានប្រាប់ឱ្យដឹងថា គ្រួសារគាត់មានជីវភាពរស់នៅជាមធ្យមដោយសារតែបានទទួលប្រាក់ចំណូលពីការលក់ផ្លែចាន់ទុំ ។ ស្ត្រីខាងលើបន្ថែមថា ដើមចាន់ដែលគាត់ប្រមូលផលជារៀងរាល់ថ្ងៃនេះមានអាយុកាលច្រើនឆ្នាំណាស់ទៅហើយតែវានៅតែផ្តល់ផ្លែយ៉ាងច្រើនសន្ធឹកសន្ធាប់សម្រាប់គ្រួសាររបស់គាត់ដែលអាចលក់ដូរយកប្រាក់ផ្គត់ផ្គង់ជីវភាពបានមួយចំណែក ។
ផ្លែចាន់នេះ ក្នុងមួយឆ្នាំទទួលផលបានតែម្តង ទេ គឺនៅពេលវាទុំ ។ ស្ត្រី ស៊ឹម ជីម បានបញ្ជាក់ទៀតថា ក្នុងមួយថ្ងៃគាត់ប្រមូលផ្លែចាន់ទុំបានចាប់ពី២ទៅ៣តៅ ហើយគាត់បានលក់ទៅឱ្យម៉ូយដែលមកទិញដល់ផ្ទះ ឯតម្លៃលក់ចេញគឺ៥០ផ្លែតម្លៃ៣.០០០ រៀល ។ ស្ត្រីឈ្មោះ ទៀង អាយុ៣០ឆ្នាំដែលតែងតែមកលើកផ្លែចាន់ទុំរបស់ស្ត្រី ជីម ទៅលក់បន្តស្ទើរតែរាល់ថ្ងៃ បានអួតសរសើរថា ផ្លែចាន់ត្រូវបានគេនិយមចូលចិត្តហូបណាស់ ព្រោះវាមានរសជាតិផ្អែមនិងមានពណ៌លឿងទុំល្អ ជាពិសេសទៀត នោះវាមានក្លិនក្រអូប ។ ស្រ្តីឈ្មោះ ម៉ុម អាយុ៤៩ឆ្នាំ និងជាអ្នកដែលបានទិញផ្លែចាន់យកទៅលក់បន្តដែរ បានបន្ថែមថា អ្នកភូមិរបស់គាត់ចូលចិត្តហូបផ្លែចាន់ទុំនេះណាស់ ។
អ្នកភូមិដែលមានដើមចាន់បានឱ្យដឹងថា ការដាំដើមចាន់នេះ មានភាពងាយស្រួលណាស់មិនរើសប្រភេទដីនោះទេ ហើយពេលខ្លះយើងអាចទទួលបានប្រាក់កម្រៃពីការលក់ផ្លែចាន់ទុំនេះបានគួរសមផងដែរ ៕
ចែករំលែកព័តមាននេះ