យោងតាមចំណាត់ថ្នាក់មួយចេញផ្សាយកាលពីថ្ងៃទី១៥ សីហាថា បណ្តាប្រទេសដែលរងការប៉ះពាល់ខ្លាំងជាងគេដោយគ្រោះមហន្តរាយធម្មជាតិគឺបណ្តាប្រទេសនៅអាស៊ី ។ ច្បាស់ណាស់ការប៉ះពាល់ខ្លាំងនេះពិតជាទាក់ទងដល់សមត្ថភាពទប់ទល់និងបញ្ចេញប្រតិកម្មមានកម្រិតរបស់ប្រទេសទាំងនេះ។
ពួកអ្នកស្រាវជ្រាវរបស់ក្រុមហ៊ុន MAPLECROFT ជាក្រុមហ៊ុនអង់គ្លេសមួយផ្តល់ការណែនាំលើបណ្តាគ្រោះថ្នាក់បានធ្វើការសិក្សាក្នុងប្រទេសចំនួន១៩៧ដោយពួកគេចាត់ចំណាត់ថ្នាក់យោងទៅតាមការប៉ះពាល់នៃគ្រោះមហន្តរាយធម្មជាតិ ដូចជាការរញ្ជួយដីនិងទឹកជំនន់ជាដើមលើសេដ្ឋកិច្ចរបស់ប្រទេសទាំងនោះ។
យោងតាមចំណាត់ថ្នាក់នេះថា ប្រទេសបង់ក្លាដែសហាក់ដូចជាប្រទេសរងការប៉ះពាល់ខ្លាំងជាងគេដោយគ្រោះមហន្តរាយធម្មជាតិ បន្ទាប់មកប្រទេសហ្វ៊ីលីពីន សាធារណរដ្ឋដូមីកែន និងមីយ៉ាន់ម៉ា ដែលជួបគ្រោះថ្នាក់ខ្លាំងបំផុត ។ ក្នុងបញ្ជីប្រទេស១០មានឈ្មោះមុខគេក៏រួមមានឥណ្ឌា វៀតណាម ហុងឌូរ៉ាស ឡាវ ហៃទី និងនីការ៉ាហ្គាផងដែរ ។ ប្រទេសបារាំងស្ថិតនៅលេខរៀងទី១៥៣ជាមួយនឹងគ្រោះថ្នាក់ទាប ។
លោកស្រី HELEN HODGE អ្នកវិភាគម្នាក់របស់ក្រុមហ៊ុន MAPLECROFT គូសបញ្ជាក់ថា បណ្តាប្រទេសមានសេដ្ឋកិច្ចហក់ឡើងនិងបណ្តាប្រទេសកំពុងអភិវឌ្ឍន៍ត្រូវពង្រឹងសមត្ថភាពឆ្លើយតបចំពោះការប្រឈមចំពោះគ្រោះមហន្តរាយធម្មជាតិ បើពុំដូច្នោះទេ គ្រោះមហន្តរាយទាំងនេះនឹងធ្វើឱ្យប៉ះពាល់ដល់កំណើនសេដ្ឋកិច្ច ។
ក្រុមហ៊ុននេះកត់សម្គាល់ថា ការខូចខាតខាងសេដ្ឋកិច្ចពិភពលោកបណ្តាលមកពីគ្រោះមហន្តរាយធម្មជាតិក្នុងឆ្នាំ២០១១មានដល់ទៅ៣៨០ពាន់លានដុល្លារពិសេសមកពីការរញ្ចួយដី និងស៊ូណាមីនៅជប៉ុនដែលតំណាងឱ្យ៥៥% នៃការខូចខាតនោះ ៕
A15/9 ទិដ្ឋភាពទឹកជន់លិចតាមដងវិថីមួយនៃរដ្ឋធានីបង់ក្លាដែស៕
ចែករំលែកព័តមាននេះ