ប្រទេសជប៉ុន ៖ អភិបាលក្រុងស្ត្រីវ័យក្មេងបំផុតនៅក្នុងប្រវត្តិសាស្ត្ររបស់ប្រទេសជប៉ុន កំពុងតែបង្កើតប្រវត្តិសាស្ត្រថ្មីមួយទៀត ដោយការឈប់សម្រាកលំហែមាតុភាពក្នុងនាមជាមន្ត្រីជាប់ឆ្នោតកំពុងកាន់តំណែងដំបូងបង្អស់ក្នុងប្រទេសនេះ។ គម្រោងឈប់សម្រាករបស់លោកស្រីបង្កឱ្យមានការជជែកដេញដោលយ៉ាងខ្លាំងពាសពេញប្រទេសជប៉ុន អំពីតុល្យភាពរវាងការងារ និងជីវិតគ្រួសារ ពិសេសការខ្វះខាតការការពារផ្នែកច្បាប់សម្រាប់អ្នកនយោបាយស្ត្រី។ នេះបើយោងតាមប្រភពពី CNN ចេញផ្សាយនៅថ្ងៃទី៨ ខែមិថុនា ឆ្នាំ២០២៦។
លោកស្រី សូកូ កាវ៉ាតា (Shoko Kawata) អាយុ ៣៥ ឆ្នាំ អភិបាលទីក្រុងយ៉ាវ៉ាតា (Yawata) ខេត្តក្យូតូ (Kyoto) ដែលជាប់ឆ្នោតជាអភិបាលក្រុងកាលពីខែវិច្ឆិកា ឆ្នាំ២០២៣ ក្នុងនាមជាអភិបាលក្រុងស្ត្រីវ័យក្មេងបំផុតក្នុងប្រវត្តិសាស្ត្រជប៉ុនអាយុ ៣៣ ឆ្នាំ នៅពេលនោះ កាលពីពេលថ្មីៗនេះ បានប្រកាសថា លោកស្រីនឹងសម្រាកលំហែមាតុភាព (សម្រាកសម្រាលកូន) អំឡុងពេលសម្រាលកូននៅពាក់កណ្តាលខែកញ្ញាខាងមុខនេះ ហើយលោកស្រីនឹងឈប់សម្រាកចំនួន ១៦ សប្តាហ៍ ពោលគឺ ៨ សប្តាហ៍មុន និង ៨ សប្តាហ៍ក្រោយសម្រាល។
ត្រង់ចំណុចនេះ ក្រឡេកទៅច្បាប់ស្តង់ដារការងាររបស់ប្រទេសជប៉ុនឯណោះវិញ ធានាការសម្រាកលំហែមាតុភាពសម្រាប់តែបុគ្គលិកធម្មតាប៉ុណ្ណោះ ប៉ុន្តែមិនមានក្របខណ្ឌច្បាប់ណាមួយការពារ ឬកំណត់ការសម្រាកបែបនេះ សម្រាប់មន្ត្រីជាប់ឆ្នោត ដូចជាអភិបាលក្រុងឡើយ។
យ៉ាងណាមិញ លោកស្រី កាវ៉ាតា សង្ឃឹមថា ការទម្លុះឧបសគ្គច្បាប់របស់លោកស្រីអាចក្លាយជាកាតាលីករដ៏សំខាន់ សម្រាប់ការផ្លាស់ប្តូរប្រព័ន្ធច្បាប់ ខណៈពេលដែលប្រទេសជប៉ុនកំពុងប្រឈមមុខនឹងការធ្លាក់ចុះយ៉ាងគំហុកនៃអត្រាកំណើត និងគម្លាតយេនឌ័រដ៏រ៉ាំរ៉ៃនៅក្នុងភាពជាដឹកនាំនយោបាយ។
បើយោងតាមទិន្នន័យពីស្ថាប័ន IPU Parline ដែលតាមដានទិន្នន័យសកលស្តីពីសភាជាតិបានបង្ហាញថា ប្រទេសជប៉ុនទើបតែបានបោះឆ្នោតជ្រើសរើសនាយករដ្ឋមន្ត្រីជាស្ត្រីលើកដំបូងបង្អស់ក្នុងប្រវត្តិសាស្ត្រ កាលពីឆ្នាំមុន ហើយបច្ចុប្បន្នស្ត្រីមានចំនួនតិចជាង ១៥% នៅក្នុងរដ្ឋសភា។
លោកស្រី កាវ៉ាតា គ្រោងនឹងតែងតាំងអនុប្រធានម្នាក់ឱ្យបំពេញការងារអំឡុងពេលដែលលោកស្រីអវត្តមានពីការដឹកនាំទីក្រុងដែលមានប្រជាជនជិត ៧ម៉ឺននាក់មួយនេះ ដែលមានចម្ងាយប្រហែល ៤៥៨គីឡូម៉ែត្រ ភាគនិរតីទីក្រុងតូក្យូ (Tokyo)។ ទោះអវត្តមានពីការិយាល័យពិតមែន ប៉ុន្តែលោកស្រីនឹងនៅតែមានពិនិត្យមើលអ៊ីមែល (Email) ជាទៀងទាត់ និងចូលរួមប្រជុំសំខាន់ៗតាមអនឡាញ អំឡុងពេលមើលថែទាំកូននៅផ្ទះ។
ការរិះគន់ជុំវិញគម្រោងឈប់សម្រាកមាតុភាពរបស់លោកស្រី កាវ៉ាតា បានផ្ទុះឡើងនៅលើបណ្តាញសង្គមជប៉ុន ដោយអ្នកខ្លះលើកឡើងថា អវត្តមានរបស់មន្ត្រីសាធារណៈពីកន្លែងការងារ ជាការខ្ជះខ្ជាយលុយពន្ធរបស់ប្រជាពលរដ្ឋ។ ប៉ុន្តែលោកស្រី កាវ៉ាតា បាននិយាយថា មនុស្សដែលលោកស្រីបានជួបជជែកផ្ទាល់ផ្ទុយទៅវិញ គឺមានការយល់អំពីបញ្ហាយ៉ាងខ្លាំង ដោយសូម្បីបុគ្គលិកនៅការិយាល័យរដ្ឋាភិបាល ក៏ដូចជាប្រជាពលរដ្ឋទូទៅ បានប្រាប់លោកស្រីដោយមិនរារែកទាល់ថា គួរតែសម្រាកមួយរយៈសិន។
ក៏មានការលើកឡើងជាច្រើនផ្សេងទៀតថា តើការឈប់សម្រាកលំហែមាតុភាពរបស់លោកស្រី កាវ៉ាតា ផ្ទុយនឹងច្បាប់ដែរឬទេ? ត្រង់ចំណុចនេះ យោងតាមសម្តីលោកស្រី សាវ៉ាកូ ស៊ីរ៉ាហាសេ (Sawako Shirahase) សាស្ត្រាចារ្យផ្នែកសង្គមវិទ្យា សាកលវិទ្យាល័យតូក្យូបានឱ្យដឹងថា ឥរិយាបថជាច្រើនរបស់ប្រទេសជប៉ុនចំពោះរដ្ឋាភិបាល គឺផ្អែកលើការសន្មតបែបបុរាណខ្លាំងពេក ដែលមិនដើរទាន់តម្រូវការរបស់ស្ត្រីសម័យទំនើបនៅក្នុងកម្លាំងពលកម្មនោះទេ។
លោកស្រីបន្តថា ក្របខ័ណ្ឌច្បាប់ខ្លួនឯង មិនបានសន្មតថា អភិបាលក្រុង ឬប្រធានការិយាល័យសាធារណៈ នឹងត្រូវច្បាប់សម្រាកលំហែមាតុភាពនោះទេ។ ប៉ុន្តែក្នុងពេលជាមួយគ្នានេះ ក៏គ្មាននរណាម្នាក់អាចហាមឃាត់នរណាម្នាក់ មិនឱ្យឈប់សម្រាកបានដែរ ដូច្នេះវាហាក់ដូចជាស្ថិតក្នុងភាពមិនច្បាស់លាស់នៅឡើយ។
ការជជែកដេញដោលអំពីច្បាប់សម្រាកលំហែមាតុភាពរបស់អភិបាលក្រុងយ៉ាវ៉ាតាក៏កើតឡើងក្នុងបរិបទនៃកិច្ចប្រឹងប្រែងអស់រយៈពេលរាប់ទសវត្សរ៍របស់រដ្ឋាភិបាលជប៉ុន ដើម្បី ប្រយុទ្ធប្រឆាំងនឹងការធ្លាក់ចុះនៃអត្រាកំណើតផងដែរ ដោយប្រទេសនេះ បានកត់ត្រាចំនួនទារកកើតដែលមានសញ្ជាតិជប៉ុនចំនួន ៦៧១,២៣៦ នាក់ប៉ុណ្ណោះ កាលពីឆ្នាំ២០២៥៕
ចែករំលែកព័តមាននេះ