អន្តរជាតិ ៖ ឧស្សាហកម្មអាកាសចរណ៍ពិភពលោក កាលពីថ្ងៃទី៧ ខែមិថុនា ឆ្នាំ២០២៦ បានសម្រេចកាត់បន្ថយការព្យាករណ៍ប្រាក់ចំណេញសម្រាប់ឆ្នាំ២០២៦របស់ខ្លួនជិតពាក់កណ្តាល ដោយសារតែជម្លោះនៅមជ្ឈិមបូព៌ា រុញច្រានតម្លៃប្រេងឥន្ធនៈឱ្យហក់ឡើងខ្ពស់ រំខានដល់ច្រករបៀងហោះហើរសំខាន់ៗ ដែលបានបង្ហាញពីភាពរង្គោះរង្គើខ្លាំងនៃវិស័យមួយនេះ។ នេះបើតាមប្រភពពី Reuters បានចេញផ្សាយ។
សមាគមដឹកជញ្ជូនផ្លូវអាកាសអន្តរជាតិ (IATA) ដែលតំណាងឱ្យក្រុមហ៊ុនអាកាសចរណ៍ជាង ៣៧០ និងគ្របដណ្តប់ប្រហែល ៨៥% នៃចរាចរណ៍ផ្លូវអាកាសសកលលោក បានបញ្ជាក់ក្នុងរបាយការណ៍ប្រចាំឆ្នាំថា ខ្លួនរំពឹងថាឧស្សាហកម្មអាកាសចរណ៍ពិភពលោក នឹងទទួលបានប្រាក់ចំណេញសុទ្ធរួមគ្នាប្រហែល ២៣ ពាន់លានដុល្លារអាមេរិកក្នុងឆ្នាំ ២០២៦ ដោយចំនួននេះ ទាបជាងឆ្ងាយពីការព្យាករណ៍ពីមុន ដែលមានប្រហែល ៤១ ពាន់លានដុល្លារ ហើយក៏បានធ្លាក់ចុះពីចំនួន ៤៥ ពាន់លានដុល្លារ កាលពីឆ្នាំ ២០២៥ ផងដែរ។
ការកាត់បន្ថយការព្យាករណ៍នេះ បញ្ជាក់ឱ្យឃើញពីភាពងាយរងគ្រោះរបស់ក្រុមហ៊ុនអាកាសចរណ៍ពិភពលោកចំពោះវិបត្តិភូមិសាស្ត្រនយោបាយ និងការប្រែប្រួលតម្លៃប្រេងឥន្ធនៈ បើទោះជាតម្រូវការអ្នកដំណើរនៅតែមានភាពរឹងមាំ យន្តហោះហោះពេញៗ និងចំណូលត្រូវបានរំពឹងនឹងកើនឡើងដល់លើស ១,១ទ្រីលានដុល្លារយ៉ាងណាក៏ដោយ។
ជម្លោះមជ្ឈិមបូព៌ា បានបង្ខំឱ្យក្រុមហ៊ុនអាកាសចរណ៍នានាត្រូវប្តូរផ្លូវហោះហើយ។ កត្តានេះបានបន្ថែមរយៈពេលរាប់ម៉ោងលើការធ្វើដំណើរមួយចំនួន និងបង្កើនការប្រើប្រាស់ប្រេងឥន្ធនៈ។ ទន្ទឹមនឹងនេះដែរ ថ្លៃប្រេងឆៅបានហក់ឡើងខ្ពស់ដោយសារការភ័យខ្លាចចំពោះការរំខានដល់ការផ្គត់ផ្គង់ ដែលរុញច្រានឱ្យថ្លៃប្រេងយន្តហោះកើនឡើងយ៉ាងខ្លាំង និងធ្វើឱ្យផលចំណេញរបស់រោងចក្រចម្រាញ់ប្រេងកាន់តែកើនឡើង។ ស្ថានភាពនេះបានធ្វើឱ្យក្រុមហ៊ុនអាកាសចរណ៍នានាប្រឈមមុខនឹងការលោតផ្លោះនៃការចំណាយដ៏ធំបំផុតរបស់ខ្លួន។
IATA រំពឹងថា ការចំណាយលើប្រេងឥន្ធនៈរបស់ក្រុមហ៊ុនអាកាសចរណ៍ពិភពលោកនឹងកើនឡើងដល់ប្រហែល ៣៥០ ពាន់លានដុល្លារនៅឆ្នាំនេះ ពីចំនួនត្រឹមប្រហែល ២៥២ ពាន់លានដុល្លារកាលពីឆ្នាំមុន ដោយប្រេងឥន្ធនៈមានចំណែកជិតមួយភាគបីនៃចំណាយលើប្រតិបត្តិការ។ តាមរយៈនេះ កំពុងធ្វើឱ្យប្រាក់ចំណេញជាមធ្យមដែលទទួលបានពីអ្នកដំណើរម្នាក់បានធ្លាក់ចុះមកត្រឹម ៤,៥០ ដុល្លារ ពោលធ្លាក់ចុះពាក់កណ្តាលបើធៀបនឹងឆ្នាំមុន។
ដោយឡែក ការព្យាករណ៍វិជ្ជមានវិញ IATA រំពឹងថា ចំណូលនៅក្នុងវិស័យនេះនឹងកើនឡើង ៩,៤% ដល់ប្រហែល ១,១៦ ទ្រីលានដុល្លារនៅឆ្នាំនេះ ដែលជំរុញដោយតម្រូវការធ្វើដំណើរមានស្ថិរភាព តម្លៃសំបុត្រយន្តហោះឡើងខ្ពស់ជាងមុន និងការកើនឡើងប្រាក់ចំណេញពីសេវាកម្មបន្ថែមផ្សេងៗទៀត៕
ចែករំលែកព័តមាននេះ