ទីក្រុងវ៉ាស៊ីនតោន ៖ រដ្ឋាភិបាលសហរដ្ឋអាមេរិកកំពុងពិចារណាបង្វែរទ្រព្យសម្បត្តិរបស់ប្រទេសអ៊ីរ៉ង់ដែលខ្លួនបង្កក ទៅឱ្យបណ្តាសម្ព័ន្ធមិត្តក្នុងតំបន់ឈូងសមុទ្រពែរ្សដើម្បីយកទៅប្រើប្រាស់ជួសជុលស្តារឡើងវិញនូវហេដ្ឋារចនាសម្ព័ន្ធដែលរងការខូចខាត ដែលបង្កឡើងដោយការវាយប្រហារពីសំណាក់អ៊ីរ៉ង់។ នេះបើយោងតាមទីភ្នាក់ងារសារព័ត៌មាន Reuters ចេញផ្សាយនៅថ្ងៃទី៧ ខែមិថុនា ឆ្នាំ២០២៦ ដោយស្រង់ប្រភពមួយដឹងពីបញ្ហានេះ។
ប្រភពដដែលនោះបានបន្តថា លោក Scott Bessent រដ្ឋមន្ត្រីក្រសួងរតនាគារអាមេរិក បានដឹកនាំក្រុមមួយឱ្យវាយតម្លៃថ្លៃដើមសម្រាប់ការខូចខាតដែលអ៊ីរ៉ង់បង្កឡើងរួចហើយលើសម្ព័ន្ធមិត្តឈូងសមុទ្រ ដោយបានបន្ថែមទៀតថា សហរដ្ឋអាមេរិកក៏នឹងពិចារណាប្រើប្រាស់ទ្រព្យសម្បត្តិរបស់អ៊ីរ៉ង់ សម្រាប់ស្តារឡើងវិញនូវការបំផ្លិចបំផ្លាញណាមួយនាពេលអនាគតផងដែរ។
ទោះយ៉ាងណាក៏ដោយ ព័ត៌មាននេះមិនបានបញ្ជាក់ជាក់លាក់ថា តើទ្រព្យសម្បត្តិប្រភេទណាដែលក្រសួងរតនាគារអាមេរិក កំពុងតែធ្វើការពិនិត្យពិច័យនោះទេ។ ការបង្ហាញនេះ បានកើតឡើង១ថ្ងៃ បន្ទាប់ពីលោក Mohsen Rezaei ទីប្រឹក្សាមេដឹកនាំកំពូលរបស់អ៊ីរ៉ង់បានប្រាប់សារព័ត៌មាន CNN ថា កិច្ចព្រមព្រៀងសន្តិភាពដើម្បីបញ្ចប់សង្គ្រាមរយៈពេល៣ខែ គឺអាស្រ័យលើការប្រគល់ទ្រព្យសម្បត្តិអ៊ីរ៉ង់ចំនួន ២៤ ពាន់លានដុល្លារអាមេរិក ដែលត្រូវបានបង្កកដោយសហរដ្ឋអាមេរិកត្រឡប់មកវិញ។
ការចរចាសន្តិភាពរវាងសហរដ្ឋអាមេរិក និងអ៊ីរ៉ង់ហាក់បីដូចជាបានជាប់គាំង បើទោះបីជាមានរដ្ឋមន្ត្រីម្នាក់មកពីប៉ាគីស្ថានដែលជាប្រទេសអ្នកសម្របសម្រួល បានធ្វើដំណើរទៅកាន់ទីក្រុងតេហេរ៉ង់កាលពីថ្ងៃទី៦ ខែមិថុនា ឆ្នាំ២០២៦ ជាមួយលិខិតមួយច្បាប់ជូនមេដឹកនាំកំពូលរបស់អ៊ីរ៉ង់ លោក Ayatollah Mojtaba Khamenei យ៉ាងណាក៏ដោយ៕
ចែករំលែកព័តមាននេះ