រាជធានីភ្នំពេញ ៖ រថយន្តកាមរីឆ្លាម ពណ៌ខ្មៅមួយគ្រឿង បើកបុកម៉ូតូគុបជ្រុង៩០ ពណ៌ទឹកប្រាក់អូសម៉ូូតូជាង១០០ម៉ែត្រ ចំណែកអ្នកបើកម៉ូតូអូសប្រមាណ៥០ម៉ែត្រទើបខ្ទាតចេញពីរថយន្តរងរបួសធ្ងន់ ហើយរថយន្តបើករត់បាត់កាលពីវេលាម៉ោង១១និង៣០នាទីយប់ថ្ងៃទី១២ សីហា តាមមហាវិថីព្រះសីហនុកែងផ្លូវលេខ៥១ មុខវត្តលង្កា ក្នុងសង្កាត់បឹងកេងកងទី១ ខណ្ឌចំការមន ។
សាក្សីនិយាយថា មុនពេលកើតហេតុម៉ូតូគុបជ្រុង ពណ៌ទឹកប្រាក់ បើកបរដោយយុវជនម្នាក់តាមផ្លូវលេខ៥១ ពីជើងទៅត្បូង ក្នុងល្បឿនធម្មតា ចំណែករថយន្តកាមរីឆ្លាម ពណ៌ខ្មៅ បើកតាមមហាវិថីព្រះសីហនុពីលិចទៅកើតយ៉ាងលឿន ខណៈមកដល់ចំណុចផ្លូវកែងរថយន្តឆ្លងផ្លូវទៅបុកម៉ូតូពេញទំហឹងអូសទាំងម៉ូតូ និងមនុស្សជាប់ជាមួយរថយន្ត តែមនុស្សអូសប្រមាណ៥០ម៉ែត្រទើបរបូតចេញធ្លាក់នៅកណ្តាលផ្លូវរងរបួសធ្ងន់ធ្ងរ ចំណែកម៉ូតូអូសជាប់ជាមួយរថយន្តប្រមាណជាង១០០ម៉ែត្រទើបជ្រុះហើយរថយន្តបង្កបានបន្ថែមល្បឿនរត់គេចបាត់ស្រមោល ។ ក្រោយពេលកើតហេតុអ្នកនៅក្បែរនោះបាននាំគ្នាជិះដេញតាមរថយន្តដែរ តែរថយន្តនោះបើកលឿនគេចចុះគេចឡើងក៏បាត់ដានតាមលែងទាន់ ។
ជនរងគ្រោះមិនត្រូវបានគេស្គាល់អត្តសញ្ញាណទេបានបោកក្បាលហូរឈាមរបួសធ្ងន់ត្រូវបានបញ្ជូនទៅព្យាបាលនៅមន្ទីរពេទ្យកាល់ម៉ែត ។ ចំណែកម៉ូតូអូសជាប់ជាមួយរថយន្តទម្រាំតែជ្រុះចេញខូចខាតស្ទើរទាំងស្រុង ត្រូវសមត្ថកិច្ចយកទៅរក្សាទុកនៅខណ្ឌចំការមន រួចស្រាវជ្រាវរករថយន្តបង្កយកមកដោះស្រាយតាមផ្លូវច្បាប់ ៕
ចែករំលែកព័តមាននេះ