រាជធានីភ្នំពេញ ៖ រថយន្តដឹកឥដ្ឋម៉ាកហ៊ីយ៉ាន់ដាយ ចំណុះ២តោនកន្លះ ពណ៌ខៀវមួយគ្រឿងបានជួបគ្រោះថ្នាក់ចរាចរណ៍បុកជាមួយម៉ូតូម៉ាកស្តេបមួយគ្រឿង ដោះស្រាយជួយជួសជុលម៉ូតូ១០០ដុល្លារមិនទាន់ទាំងឱ្យប្រាក់ផងម្ចាស់រថយន្តទៅបាត់ ធ្វើឱ្យម្ចាស់ម៉ូតូមានក្តីក្តៅក្រហាយបានទិញសាំងមកចាក់ស្រោចក្នុងកាប៊ីនរថយន្តរួចដុតឆេះហុយទ្រលោម តែត្រូវប្រជាពលរដ្ឋ និងប៉ូលិសនាំគ្នាជួយពន្លត់ទាន់ពេល រួចជនបង្កគេចខ្លួនបាត់ចោលម៉ូតូ ។ ហេតុការណ៍ភ្ញាក់ផ្អើលនេះកើតឡើងកាលពីវេលាម៉ោង៨និង៤០នាទីយប់ថ្ងៃទី១២ សីហា នៅតាមផ្លូវលេខ៥៩៨ មុខផ្សារងិលអាន ក្នុងភូមិទួលគោក សង្កាត់ទួលសង្កែ ខណ្ឌប្ញស្សីកែវ ។
តាមមន្ត្រីប៉ូលិសមូលដ្ឋានឱ្យដឹងថា នៅវេលាម៉ោង៥និង៣០នាទីល្ងាចថ្ងៃទី១២ សីហា មានគ្រោះថ្នាក់ចរាចរណ៍កើតឡើងរវាងរថយន្តដឹកឥដ្ឋមា៉កហ៊ីយ៉ាន់ដាយបុកជាមួយម៉ូតូម៉ាកស្តេប ពណ៌លឿងលាយក្រហម-ខ្មៅមួយគ្រឿង ដែលធ្វើដំណើរបញ្ច្រាសទិសគ្នានៅចំណុចមុខផ្សារងិលអាន ។ បន្ទាប់ពីមានគ្រោះថ្នាក់ ប៉ូលិសបានចុះដល់កន្លែងកើតហេតុ ហើយរាយការណ៍ទៅប៉ូលិសការិយាល័យផ្លូវគោកនាំយកទៅដោះស្រាយ តែភាគីទាំងពីរសុំដោះស្រាយខ្លួនឯងមិនឱ្យសមត្ថកិច្ចជួយអន្តរាគមន៍ទេ ។
ខណៈពេលដោះស្រាយមិនត្រូវគ្នា ស្រាប់តែម្ចាស់ម៉ូតូបានទៅទិញសាំងចាក់ស្រោចរថយន្តរួចដុត តែត្រូវប៉ូលិស និងប្រជាពលរដ្ឋជួយពន្លត់ទាន់ ។ អ្នកបើកបររថយន្តដឹកឥដ្ឋឈ្មោះ ទូច តេម ភេទប្រុស អាយុ២៩ឆ្នាំ មានទីលំនៅស្រុកបារាយណ៍ ខេត្តកំពង់ធំ បានឱ្យដឹងថា មុនពេលកើតហេតុខ្លួនបានដឹកឥដ្ឋពីឃុំព្រែកអញ្ចាញ ស្រុកមុខកំពូល ក្នុងគោលបំណងយកទៅដាក់នៅអូរបែកក្អម សង្កាត់ទឹកថ្លា ។ ពេលធ្វើដំណើរមកដល់រង្វង់មូលកាំកូសីុធី ស្រាប់តែជួបគ្រោះថ្នាក់បុកម៉ូតូម៉ាកស្តេបមួយគ្រឿងដែលធ្វើដំណើរក្នុងទិសដៅបញ្ច្រាសគ្នា ។ បន្ទាប់ពីគ្រោះថ្នាក់ ថៅកែរបស់ខ្លួនបានមកដោះស្រាយដោយសងថ្លៃជួសជុលម៉ូតូចំនួន១០០ដុល្លារ តែខាងម៉ូតូទារ៦០០ដុល្លារ មិនត្រូវគ្នាហើយថៅកែបានចេញទៅបាត់ ឯខាងម៉ូតូក៏ទៅបាត់ដែរ ។ លុះប្រមាណជា៣ម៉ោងក្រោយមកម្ចាស់ម៉ូតូបានជិះម៉ូតូមួយគ្រឿងទៀតមានគ្នា២នាក់មកឈប់ក្បែររថយន្ត ហើយចាក់សាំងស្រោចទៅក្នុងកាប៊ីនរថយន្តរួចដុតតែម្តង ។
តាមព័ត៌មានបានបញ្ជាក់ថា នៅពេលដោះស្រាយនោះភាគីខាងរថយន្តឱ្យ១០០ដុល្លារ ឯខាងម៉ូតូបានឯកភាពហើយ តែខាងរថយន្តឱ្យតែមួយម៉ាត់ក៏ដើរចេញទៅបាត់ ជាហេតុធ្វើឱ្យម្ចាស់ម៉ូតូខឹងទៅទិញសាំងមកចាក់ស្រោចរថយន្តដុត រួចគេចខ្លួនបាត់ចោលម៉ូតូរបស់ខ្លួន ។ បន្ទាប់មករថយន្ត និងម៉ូតូត្រូវសមត្ថកិច្ចយកទៅរក្សាទុកទៅការិយាល័យជំនាញចាត់ការតាមនីតិវិធី ។ ការដោះស្រាយតាមរូបភាពបែបនេះ មិនត្រឹមត្រូវតាមច្បាប់ទេ ធ្វើឱ្យខ្លួនជាអ្នករងគ្រោះក្លាយជាអ្នកបង្កវិញ ៕
ចែករំលែកព័តមាននេះ