ខេត្តកណ្តាល ៖ បុរសម្នាក់ជិះរថយន្តចេញពីពិធីខួបកំណើតកូនមិត្តភក្តិក្នុងស្ថានភាពស្រវឹងជោក បានបើករថយន្តរេចង្កូតទៅបុកជាមួយរថយន្តមួយគ្រឿងទៀតម៉ាកប៉ាហ្សេរ៉ូ ដែលកំពុងបើកបរបញ្ច្រាសទិសគ្នាពេញទំហឹង បណ្តាលឱ្យបុរសម្នាក់បើករថយន្តកូរ៉ូឡាកៀបជាប់រថយន្តស្លាប់ភ្លាម កាលពីវេលាម៉ោង៨និង៣០នាទីយប់ថ្ងៃទី១២ សីហា នៅត្រង់ចំណុចគីឡូម៉ែត្រលេខ២៤ ផ្លូវជាតិលេខ១ ភូមិកោះផុល ឃុំដីឥដ្ឋ ស្រុកកៀនស្វាយ ។
ប្រភពពីសាក្សីឃើញហេតុការណ៍បានឱ្យដឹងថា មុនពេលកើតហេតុគេឃើញបុរសឈ្មោះតូ មករា អាយុុ៣៣ឆ្នាំ ស្នាក់នៅសង្កាត់កាកាប ខណ្ឌពោធិ៍សែនជ័យ ជិះរថយន្តមួយគ្រឿងម៉ាកកូរ៉ូឡា យ៉ាងលឿនរេចង្កូតពេញផ្លូវក្នុងទិសដៅពីកើតទៅលិច លុះមកដល់កន្លែងកើតហេតុខាងលើមានរថយន្តមួយគ្រឿងទៀតម៉ាកប៉ាហ្សេរ៉ូ បើកបរដោយបុរសម្នាក់ឈ្មោះផែន សំណាង អាយុ៥៣ឆ្នាំ ស្នាក់នៅភូមិពពាល ឃុំដីឥដ្ឋ ស្រុកកៀនស្វាយ បើកបរក្នុងទិសដៅបញ្ច្រាសគ្នាជាមួយរថយន្តកូរ៉ូឡា ខណៈនោះ ស្រាប់តែរថយន្តកូរ៉ូឡារេចង្កូតទៅបុករថយន្តប៉ាហ្សេរ៉ូពេញទំហឹង បណ្តាលឱ្យឈ្មោះតូ មករា ជាម្ចាស់រថយន្តកូរ៉ូឡាបោកក្បាលទៅនឹងកញ្ចក់រថយន្តកៀបស្លាប់ភ្លាមតែម្តង ឯម្ចាស់រថយន្តប៉ាហ្សេរ៉ូរងរបួសស្រាល ។ ចំណែករថយន្តទាំងពីរគ្រឿងត្រូវរងការខូចខាតយ៉ាងដំណំដូចគ្នា ។
នគរបាលមូលដ្ឋានបានចុះទៅដល់កន្លែងកើតហេតុវាស់វែង រួចអូសយករថយន្តទាំងពីរគ្រឿងទៅរក្សាទុកនៅអធិការដ្ឋាននគរបាលស្រុកកៀនស្វាយ ដើម្បីដោះស្រាយ ។ ចំណែកសពបុរសរងគ្រោះត្រូវសមត្ថកិច្ចទាក់ទងទៅក្រុមគ្រួសារឱ្យមកទទួលយកទៅធ្វើបុណ្យតាមប្រពៃណី និងអ្នករងរបួសត្រូវបញ្ជូនទៅព្យាបាលនៅមន្ទីរពេទ្យ ៕
ចែករំលែកព័តមាននេះ