រាជធានីភ្នំពេញ ៖ ក្រុមស្ទាវមួយក្រុមជិះម៉ូតូក្នុងល្បឿនលឿនទៅបុករ៉ឺម៉កម៉ូតូដួលក្រឡាប់បះជើងឡើងលើ ហើយនាំគ្នាដោះខ្សែក្រវាត់រកវាយម្ចាស់រ៉ឺម៉កម៉ូតូធ្វើឱ្យអ្នកបើករ៉ឺម៉ករត់បាតជើងសព្រាតដោយសារខ្លាចក្មេងស្ទាវវាយ ។ ហេតុការណ៍នេះកើតឡើងកាលពីវេលាម៉ោង៨និង៥០នាទីយប់ថ្ងៃទី៨ សីហា ២០១២ តាមមហាវិថីព្រះនរោត្តមកែងផ្លូវលេខ១៧៨ ក្នុងសង្កាត់ជ័យជំនះ ខណ្ឌដូនពេញ ។
បន្ទាប់ពីបុករ៉ឺម៉កម៉ូតូដួលក្រឡាប់ផ្ងារជើងហើយស្រាប់តែក្រុមក្មេងស្ទាវនោះ បានដោះខ្សែក្រវាត់រកវាយទៅលើម្ចាស់រ៉ឺម៉កម៉ូតូទៀត ឃើញក្រុមស្ទាវមានគ្នាច្រើននាក់មិនអាចតបតឈ្នះអ្នកបើករ៉ឺម៉កម៉ូតូបានរត់បាតជើងសព្រាត ចំណែកក្រុមស្ទាវរងរបួសទាំង២នាក់ត្រូវមិត្តភក្តិដឹកតាមម៉ូតូយកទៅសង្គ្រោះ និងព្យាបាលនៅមន្ទីរពេទ្យ។ ប្រភពដដែលបន្តទៀតថា មូលហេតុដែលក្រុមស្ទាវនោះជិះម៉ូតូលឿនដោយសារតែពួកគេបើករត់គេចពីក្រុមស្ទាវមួយក្រុមទៀតដែលជិះម៉ូតូដេញតាមវាយក្រុមរបស់ពួកគេ លុះពេលជិះលឿនក៏ជ្រុលទៅបុករ៉ឺម៉កម៉ូតូក្រឡាប់ផ្ងារជើងធ្វើឱ្យពួកគេខឹងក៏រករឿងម្ចាស់រ៉ឺម៉កម៉ូតូទៀត ។
ក្រោយពេលកើតហេតុរ៉ឺម៉កម៉ូតូរងការខូចខាត និងម៉ូតូខ្ទេចក្បាលខាងមុខនោះត្រូវបានសមត្ថកិច្ចយកទៅរក្សាទុកនៅខណ្ឌដូនពេញ ដើម្បីធ្វើការដោះ ស្រាយ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ