ខេត្តក្រចេះ ៖ ឃាតកដៃដល់ត្រូវបានវែកមុខបន្ទាប់ពីធ្វើសកម្មភាពកាប់សម្លាប់ទៅលើជនរងគ្រោះរយៈពេល៥ថ្ងៃក្រោយមក ហើយក៏ត្រូវកម្លាំងប៉ូលិសនៃអធិការដ្ឋានស្រុកសំបូរស្រាវជ្រាវចាប់ខ្លួន ។ ជនសង្ស័យក្នុងករណីឃាតកម្មនោះឈ្មោះសុខ រិ ហៅអន្ទិតឈិន អាយុ៣៣ឆ្នាំ រស់នៅក្នុងភូមិស្រែត្រែង ឃុំក្បាលដំរី ស្រុកសំបូរ ។ មូលហេតុដែលឈានដល់ការកាប់សម្លាប់នេះផ្តើមចេញពីរឿងគំនុំដែលជនរងគ្រោះធ្លាប់បានទៅលួចដើមដំឡូងរបស់ជនសង្ស័យកាលពីពេលកន្លងទៅ ។
គួររំលឹកថា កាលពីព្រឹកថ្ងៃទី២៨ កុម្ភៈ សាកសពបុរសម្នាក់ត្រូវគេប្រទះឃើញដេកស្លាប់នៅចំណុចអូរស្នួល ស្ថិតនៅខាងក្រោយភូមិស្រែត្រែង ឃុំក្បាលដំរី ស្រុកសំបូរ ដែលគេស្គាល់អត្តសញ្ញាណថា ឈ្មោះង៉ាល់ អន់អើយ អាយុ៥៣ឆ្នាំ ជនជាតិព្នង ជាអ្នកចំការ រស់នៅភូមិ-ឃុំកើតហេតុខាងលើ ។ សាកសពបុរសរូបនេះដេកស្លាប់ផ្កាក់មុខ និងមានស្នាមកាប់១ពូថៅចំពីលើក្បាល និងត្រូវភ្លើងព្រៃឆេះត្រឹមជង្គង់ខ្លោច
អស់ ។ ដោយនៅលើខ្លួនបុរសរងគ្រោះ ប៉ូលិសបានឆែកឆេររកឃើញមានលុយខ្មែរជាងដប់ម៉ឺន ព្រមទាំងពូថៅរបស់ជនរងគ្រោះដោយមានប្រឡាក់ឈាម ទើបសមត្ថកិច្ចសន្និដ្ឋានថា ការស្លាប់របស់បុរសរងគ្រោះគឺជាករណីឃាតកម្មលើរឿងអ្វីមួយ ដោយជនដៃដល់មិនបានប្លន់យកលុយជនរងគ្រោះទេ ហើយក៏មិនមែនស្លាប់ដោយឧប្បត្តិហេតុភ្លើងឆេះព្រៃដែរ ។
តាមប្រភពពីលោកវរសេនីយ៍ត្រីប៊ុន ឈឿន អធិការនគរបាលស្រុកសំបូរ បានឱ្យដឹងទៀតថា លោកបានដឹកនាំកម្លាំងចុះទៅស្រាវជ្រាវដល់កន្លែងកើតេហតុ ក៏បានកំណត់មុខសញ្ញារហូតដល់ថ្ងៃទី៣ មីនា ទើបឈានដល់ការឃាត់ខ្លួនជនសង្ស័យឈ្មោះសុខ រិ ហៅអន្ទិតឈិន មកកាន់ប៉ុស្តិ៍រដ្ឋបាលដើម្បីសាកសួរ ។ នៅចំពោះមុខសមត្ថកិច្ច ជនសង្ស័យបាននិយាយថា កន្លងមកជនរងគ្រោះធ្លាប់បានទៅលួចយកដើមដំឡូងរបស់ខ្លួន ហើយក៏មានគំនុំជាប់ជានិច្ច លុះដល់ថ្ងៃកើតហេតុ ខណៈដែលខ្លួនកំពុងតែជិះម៉ូតូក៏ឃើញជនរងគ្រោះ កំពុងតែដកដំឡូងនៅចំការក្នុងព្រៃម្នាក់ឯង ឃើញដូច្នោះខ្លួនក៏ឈប់ម៉ូតូ ហើយក៏ដើរកាត់ព្រៃឆ្លងអូរ យកពូថៅរបស់ជនរងគ្រោះលបកាប់ពីក្រោយចំកណ្តាលក្បាល បណ្តាលឱ្យជនរងគ្រោះរត់ដួលផ្កាប់មុខស្លាប់ នៅក្បែរដើមឈើមួយដើមដែលកំពុងតែឆេះ ដួល ។ បន្ទាប់ពីធ្វើសកម្មភាពរួច ខ្លួនក៏មិនបានរត់គេចទៅណាទេ ដោយនឹកស្មានថា គ្មាននរណាអាចស្រាវជ្រាវដឹងរឿងនេះ មិននឹកថា អំពើអាក្រក់ពិតជាគេចមិនរួចពីសមត្ថកិច្ចសោះ ៕
ចែករំលែកព័តមាននេះ