យោងតាមសេចក្តីប្រកាសព័ត៌មានរបស់អង្គការ WWF បានព្រមានថា ការសាងសង់កំពុងមានដំណើរការទៅមុខនៅតំបន់ទំនប់សាយ៉ាបូរី ស្ថិតនៅភាគខាងជើងប្រទេសឡាវ ហើយហាក់កំពុងមិនផ្តល់តម្លៃដល់សេចក្តីសម្រេចកាលពីខែធ្នូ ដោយបណ្តាប្រទេសនៃតំបន់មេគង្គប៉ែកខាងក្រោម ស្តីពីការពន្យារការសាងសង់ទំនប់សាយ៉ាបូរីនេះនៅលើដងទន្លេមេគង្គ ដោយរង់ចាំការសិក្សាបន្ថែមទៀតសិនស្តីពីការប៉ះពាល់ផ្សេងៗដែលអាចកើតចេញពីគម្រោងសាងសង់ទំនប់ដ៏ចម្រូងចម្រាសមួយនេះ ។
កាលពីសប្តាហ៍មុន គណៈប្រតិភូអន្តរជាតិមួយក្រុម ដែលមានវត្តមានឯកអគ្គរាជទូត ម្ចាស់ជំនួយ និងតំណាងអង្គការមិនមែនរដ្ឋាភិបាល ក្នុងនោះមានតំណាងអង្គការ WWF ផងដែរ បានចូលរួមកិច្ចប្រជុំមួយជាមួយរដ្ឋាភិបាលឡាវដើម្បីស្តាប់នូវបទបង្ហាញស្តីពីគម្រោងសាងសង់ទំនប់ និងដើម្បីចុះពិនិត្យជាក់ស្តែងដល់តំបន់ទំនប់សាយ៉ាបូរីផ្ទាល់ ។ កិច្ចប្រជុំនេះ ត្រូវបានរៀបចំឡើងបន្ទាប់ពីមានការសម្តែងនូវក្តីព្រួយបារម្ភ និងការតវ៉ាជាច្រើនសន្ធឹកសន្ធាប់អំពីការឈូសឆាយដី និងការបន្តដំណើរការសាងសង់នៅតំបន់នេះ ។
លោកបណ្ឌិត ជិនហូ ម៉េង អ្នកជំនាញផ្នែកនិរន្តរភាពវារីអគ្គិសនីនៃអង្គការ WWF បានថ្លែងថា «ថ្វីដ្បិតតែឡាវយល់ព្រមរៀបចំទស្សនកិច្ចទៅកាន់តំបន់សាងសង់ទំនប់ វាច្បាស់ណាស់ថាការសាងសង់កំពុងមានដំណើរការទៅមុខ»។ លោកបណ្ឌិត ជិនហូ ម៉េង បន្តថា «យោងតាមប្រសាសន៍លោកវីរ៉ាផន វីរ៉ាវ៉ុង អនុរដ្ឋមន្ត្រីក្រសួងថាមពល និងរែ៉ឡាវ ប្រព័ន្ធសម្រាប់បង្ហូរទឹកទន្លេចេញពីតំបន់សាងសង់ នឹងត្រូវគេស្ថាបនាហើយមិនឱ្យហួសពីដំណាច់ឆ្នាំនេះ។ វានឹងជាកិច្ចការនៃដំណាក់កាលដំបូងដែលគេត្រូវធ្វើនៅលើដងទន្លេ ហើយវានឹងជាលទ្ធផលមួយនៃដំណើរការសាងសង់ទំនប់នេះ»។
លោកបណ្ឌិត ជិនហូ ម៉េង បានថ្លែងទៀតថា ឥឡូវគឺជាពេលវេលាដ៏សំខាន់សម្រាប់រដ្ឋាភិបាលនៃប្រទេសមេគង្គបែ៉កខាងក្រោម ក្នុងការបង្ហាញនូវគោលជំហរដ៏ច្បាស់លាស់របស់ខ្លួនលើរឿងទំនប់សាយ៉ាបូរី ដើម្បីបញ្ជាក់អំពីក្តីបារម្ភនានា ដែលខ្លួនមានឱ្យបានច្បាស់ ។យោងតាមប្រសាសន៍របស់លោក វីរ៉ាវ៉ុង និងក្រុមហ៊ុនអភិវឌ្ឍន៍ថៃ Ch Karnchang ដែលគម្រោងរបស់ខ្លួនមានទឹកប្រាក់៣,៨កោដិដុល្លារអាមេរិក ទំនប់មួយនេះកំពុងមានដំណើរការទៅមុខស្របតាមផែនការរបស់ពួកគេ ដោយគេនឹងធ្វើការកែប្រែផ្សេងៗនៅពេលដែលការសាងសង់ប្រព្រឹត្តទៅមុខ ។
ដំណើរទស្សនកិច្ចទៅកាន់តំបន់សាងសង់ទំនប់ ត្រូវបានធ្វើឡើងបន្ទាប់ពីមានការលើកឡើងផ្សេងៗស្តីពីទំនប់នេះ ។ រដ្ឋមន្ត្រី ការបរទេសឡាវ បានបញ្ជាក់កាលពីពេលថ្មីៗនេះក្នុងជំនួបជាមួយលោកស្រី ហ៊ីលឡារី គ្លីនតុន រដ្ឋមន្ត្រីការបរទេសនៃសហរដ្ឋអាមេរិកថា គម្រោងត្រូវបានផ្អាកខណៈពេលដែលនាយកក្រុមហ៊ុន Ch Karnchang លោក អាស្វិន កុងសិរិ បានប្រកាសថា ពួកគេបានកំណត់ពេលវេលាសម្រាប់ការពន្យារ ប៉ុន្តែរំពឹងថាគម្រោងនេះនឹងបញ្ចប់នៅឆ្នាំ ២០២០ ដូចដែលបានគ្រោងទុក ។
លោកបណ្ឌិត ជិនហូ ម៉េង បានបន្ថែមថា «ឡាវសង្ឃឹមថា រដ្ឋាភិបាលនៃប្រទេសជិតខាងខ្លួន នឹងគាំទ្រឆន្ទៈផ្ទាល់របស់ខ្លួនក្នុងការកាត់បន្ថយហេតុប៉ះពាល់ចេញពីការសាងសង់ទំនប់មុនពេលដែលខ្លួនស្វែងយល់ឱ្យបានពេញលេញអំពីអ្វីខ្លះទៅជាហេតុប៉ះពាល់នោះ »។
ក្រុមគណៈប្រតិភូដែលបានធ្វើទស្សនកិច្ចនៅតំបន់ទំនប់ បានស្តាប់បទបង្ហាញរបស់ក្រុមហ៊ុន ពយរី ជាក្រុមហ៊ុនហ្វាំងឡង់ ដែលជាអ្នកផ្តល់ប្រឹក្សាដល់ភាគីឡាវស្តីអំពីការសាងសង់ទំនប់ ។ ក្រុមហ៊ុន ពយរី បានធ្វើរបាយការណ៍ថា ការសិក្សាបន្ថែមកំពុងដំណើរការរហូតដល់ដំណាច់ឆ្នាំ ២០១២ ហើយបានធ្វើការសន្និដ្ឋានថា គម្រោងសាងសង់ទំនប់នឹងមិនមានហេតុប៉ះពាល់អវិជ្ជមានណាមួយដែលអាចទទួលយកបានទេ ។
លោកបណ្ឌិត ជិនហូ ម៉េង បន្តថា «ឡាវរំពឹងឱ្យប្រទេសជិតខាងខ្លួនជ្រើសរើសជោគវាសនាមួយដ៏សែនគ្រោះថ្នាក់ ហើយឱ្យជឿជាក់ថារាល់ហេតុប៉ះពាល់នានា ដែលចេញពីគម្រោងនេះ នឹងត្រូវបានគេដោះស្រាយនៅពេលដែលការសាងសង់ទំនប់មានដំណើរការទៅមុខ»។ លោកបានបន្តថា «វិធីសាស្ត្រដែលគ្មានភាពច្បាស់លាស់នេះ មិនត្រឹមតែធ្វើការសន្និដ្ឋានទុកជាមុនលើការសិក្សាស្តីពីហេតុប៉ះពាល់ ដែលកំពុងមានដំណើរការបច្ចុប្បន្នប៉ុណ្ណោះទេ ប៉ុន្តែវាផ្ទុយទាំងស្រុងទៅនឹងបទដ្ឋានជាអន្តរជាតិ»។
ក្រុមហ៊ុ ពយរី បានទទួលរងនូវការរិះគន់យ៉ាងខ្លាំងកាលពីឆ្នាំទៅ ខណៈក្រុមហ៊ុននេះបានផ្តល់ប្រឹក្សាឱ្យភាគីឡាវថា គម្រោងសាងសង់ទំនប់សាយ៉ាបូរី អាចមានដំណើរការទៅមុខ បើទោះបីជាការសិក្សារបស់ខ្លួនផ្ទាល់បានបង្ហាញអំពីតម្រូវការនូវព័ត៌មានមូលដ្ឋានបន្ថែមទៀតស្តីពីប្រព័ន្ធជីវសាស្ត្រ ប្រព័ន្ធអេកូឡូស៊ី និងយន្តការស្តារការរស់នៅ និងការចិញ្ចឹមជីវិតរបស់ប្រជាជន ព្រមទាំងតម្រូវការនូវព័ត៌មានបន្ថែមពាក់ព័ន្ធនឹងផ្លូវសម្រាប់ឱ្យត្រីចរាចរ ដែលគម្រោងបានស្នើឡើង ។ ត្រីជាង៧០០ប្រភេទ កំពុងរស់នៅ និងចរាចរក្នុងទឹកនៃទន្លេមេគង្គ ក្នុងនោះមានត្រីរាជដែលជាប្រភេទត្រីកំពុងគ្រោះថ្នាក់ជិតផុតពូជ និងជានិមិត្តរូបសម្រាប់ទន្លេនេះ ។
លោកបណ្ឌិត ជិនហូ ម៉េង បានបន្ថែមថា «ការកំណត់ជោគវាសនាទន្លេមេគង្គដោយផ្អែកលើការសិក្សាដែលគ្មានភាពច្បាស់លាស់ និងកង្វះខាតនូវព័ត៌មានសំខាន់ៗ អាចបង្កឱ្យមានផលវិបាកយ៉ាងធ្ងន់ធ្ងរសម្រាប់ការរស់នៅរបស់ប្រជាជនរាប់លាននាក់នៅក្នុងតំបន់នៃអាងទន្លេមេគង្គ»។ លោកបានបន្តថា «ការពឹងផ្អែកទៅលើការសិក្សាដែលខ្វះភាពអាចទុកចិត្តបានរបស់ក្រុមហ៊ុនពយរី មិនមែនជាវិធីសាស្ត្រប្រកបដោយការទទួលខុសត្រូវឡើយ»។
គណៈប្រតិភូដែលបានចុះត្រួតពិនិត្យតំបន់សាងសង់ទំនប់ ក៏បានស្តាប់នូវបទបង្ហាញដោយក្រុមហ៊ុនបារាំង Compagnie Nationale du Rhóne ដែលឡាវជួលឱ្យផ្តល់នូវការវិភាគបន្ថែម ។ ក្រុមហ៊ុននេះ បានបញ្ចេញរបាយការណ៍របស់ខ្លួនដែលពិពណ៌នាអំពីលទ្ធភាពផ្សេងៗសម្រាប់លំហូរដីល្បាប់ឆ្លងកាត់ទំនប់ ។ ទោះបីជាយ៉ាងណាក៏ដោយ របាយការណ៍នេះ ផ្អែកភាគច្រើនតែទៅលើទ្រឹស្តី ដែលមិនធ្លាប់ត្រូវបានគេយកមកអនុវត្តជោគជ័យនៅក្នុងតំបន់មេគង្គឡើយ ហើយក្រុមហ៊ុនបារាំងនេះ បានធ្វើការសន្និដ្ឋានដោយខ្លួនឯងដែរថា គេត្រូវតែប្រមែប្រមូលនូវព័ត៌មានបន្ថែមជាច្រើនទៀត ដើម្បីអាចបញ្ជាក់ពីលទ្ធភាពនៃការសាងសង់ ។
លោកបណ្ឌិត ជិនហូ ម៉េង បានបន្តទៀតថា «បរិមាណដីខ្សាច់ដ៏ច្រើនសន្ធឹកសន្ធាប់មានតម្លៃសម្រាប់រក្សាលំនឹងក្នុងប្រព័ន្ធ អេកូឡូស៊ី ព្រមទាំងអធិបតេយ្យភាពនៃតំបន់ដីសណ្តមេគង្គ ត្រូវការហូរកាត់ទំនប់មួយនេះ ជាបញ្ហាប្រឈមមួយដ៏ធំសម្រាប់គម្រោងសាងសង់វារីអគ្គិសនីនេះ ។មេគង្គប៉ែកខាងក្រោមដែលជាប្រព័ន្ធទន្លេនៅមានលក្ខណៈធម្មជាតិចុងក្រោយមួយនៅលើពិភពលោក ផ្គត់ផ្គង់នូវផលនេសាទដ៏សម្បូរបែបដល់ប្រជាជនប្រមាណ៦០លាននាក់ ។ ដើម្បីធ្វើចរាចរណ៍ចុះឡើងក្នុងដងទន្លេ ត្រីត្រូវការហែលឆ្លងកាត់ទំនប់តាមរយៈផ្លូវសម្រាប់ចរាចរណ៍ត្រីដែលគម្រោងបានស្នើឡើង ។
លោកបណ្ឌិត អេរិក បារេន នៃអង្គការ World Fish Center ប្រចាំប្រទេសកម្ពុជា បានថ្លែងថា «នៅប្រទេសនៃតំបន់ត្រូពិក មិនទាន់ធ្លាប់មានការស្ថាបនាផ្លូវសម្រាប់ចរាចរណ៍ត្រីបានជោគជ័យនៅឡើយទេ សម្រាប់ទំនប់ដែលមានទំហំប៉ុនទំនប់សាយ៉ាបូរីនេះ ។ លោកបន្ថែមថា «វាជារឿងមិនសមហេតុផល ការដែលគេសន្មតថា គំរូផ្លូវសម្រាប់ចរាចរណ៍ត្រីដែលគេបានស្នើឡើងនេះនឹងមានប្រសិទ្ធភាព ខណៈពេលដែលគ្មានភស្តុតាងបង្ហាញពីការអនុវត្តជោគជ័យសម្រាប់បរិបទស្រដៀងគ្នានេះ និងគ្មានការសិក្សាស្តីពីប្រភេទត្រីដែលរស់នៅក្នុងតំបន់នោះ»។
ការពិភាក្សាលើគម្រោងទី១ សម្រាប់ការសាងសង់ទំនប់វារីអគ្គិសនីក្នុងក្របខណ្ឌនៃដំណើរការពិគ្រោះយោបល់នៃគណៈកម្មការទន្លេមេគង្គ នឹងជាការសាកល្បងចំពោះប្រសិទ្ធភាពរបស់គណៈកម្មការទន្លេមេគង្គ រីឯសេចក្តីសម្រេចកុងសង់ស៊ីស ដោយរដ្ឋមន្ត្រីនៃប្រទេសពាក់ព័ន្ធ នឹងក្លាយជាគំរូសម្រាប់គម្រោងសាងសង់ទំនប់ចំនួន១០ដទៃទៀត ដែលគេបានស្នើឡើងនៅលើដងទន្លេមេគង្គប៉ែកខាងក្រោមនេះ។
លោកបណ្ឌិត ជិនហូ ម៉េង បានសន្និដ្ឋានថា «ប្រទេសទាំង៤ នៃមេគង្គបែ៉កខាងក្រោម ត្រូវធ្វើការឯកភាពរួមគ្នាថា តើគេគួរ ឬមិនគួរសាងសង់ទំនប់សាយ៉ាបូរី ដោយផ្អែកលើបទដ្ឋានស្តង់ដាវិទ្យាសាស្ត្រ និងមិនមែនផ្អែកលើការគិតបែបសុទិដ្ឋិនិយមនោះទេ»។ អង្គការ WWF ស្នើសុំដ៏ទទូចឱ្យរដ្ឋមន្ត្រីនៃប្រទេសពាក់ព័ន្ធ ពន្យារការសម្រេចចិត្តរយៈពេល១០ឆ្នាំ លើការសាងសង់ទំនប់ ដើម្បីធានាការប្រមែប្រមូលនូវព័ត៌មានសំខាន់ៗ ហើយថាការសម្រេចចិត្តត្រូវធ្វើឡើងដោយផ្អែកលើបទដ្ឋានស្តង់ដា និងការវិភាគបែបវិទ្យាសាស្ត្រ ។
អង្គការ WWF សុំផ្តល់ប្រឹក្សាដល់ប្រទេសនៃតំបន់មេគង្គប៉ែកខាងក្រោមឱ្យពិចារណា ផ្តោតគម្រោងសាងសង់ទំនប់វារីអគ្គិសនីនៅលើដៃទន្លេមេគង្គមួយចំនួន ព្រោះវាមានភាពងាយស្រួលជាងក្នុងការវាយតម្លៃ ហើយមានហេតុប៉ះពាល់ និងគ្រោះថ្នាក់ទាបជាង ៕
ចែករំលែកព័តមាននេះ