រាជធានីភ្នំពេញ ៖ អាចថា ជាលើកទី១ដែលមជ្ឈមណ្ឌលវប្បធម៌បារាំង បានរៀបចំពិព័រណ៍ផ្ទាំងគំនូរស្នាដៃស្ត្រីចំនួន៨រូបដែលបង្ហាញអំពីលក្ខណៈនៃវប្បធម៌ប្រពៃណីខ្មែរ និងអបអរសាទរចំពោះខួបលើកទី១០០ទិវាអន្តរជាតិនារី៨ មីនា ។ លោកអូលីវីយេ ប្លង់សុង (Olivier Plan chon) នាយកមជ្ឈមណ្ឌលវប្បធម៌បារាំងបានថ្លែងថា ការរៀបចំពិព័រណ៍នាពេលនេះ គឺដើម្បីឱ្យទស្សនិកជនបានឃើញនូវសមត្ថភាពរបស់ស្ត្រីខ្មែរក្នុងការបង្កើតស្នាដៃថ្មីៗ សំខាន់ការបង្ហាញនូវខ្លឹមសារនៃវប្បធម៌ប្រពៃណីខ្មែរ ។ តាមពិត ទៅ ការងារខ្លះរបស់ស្ត្រីខ្មែរយើងគឺល្អជាងមនុស្សប្រុសទៅទៀត ដែលគួរឱ្យកោតសរសើរផងដែរ ។ ការរៀបចំពិព័រណ៍បែបនេះ គឺសំដៅចូលរួមអបអរខួបលើកទី១០០ នៃទិវាអន្តរជាតិនារី ៨ មីនា ។
លោកអូលីវីយេ ប្លង់សុង បានបញ្ជាក់ថា ស្ត្រីខ្មែរចំនួន៨រូបដែលចូលរួមក្នុងពិព័រណ៍នេះគឺម្នាក់ៗមានរូបភាពច្នៃប្រឌិតពី៤ ទៅ៥ផ្ទាំង ហើយសុទ្ធសឹងតែមានអត្ថន័យបែបវប្បធម៌ និងប្រពៃណី ។ ស្ត្រីទាំង៨រូបនេះរួមមានឈ្មោះប៊ុត ច័ន្ទអនោជា, ខ្ចៅ ទូច, ចាន់ ពិសី, ភិន សោភ័ណ, នួន បូរីណា, ងួន សាកល, ទេស វណ្ណា និងយ៉ឹម ម៉ាលីន ។ ផ្ទាំងគំនូរទាំងអស់សុទ្ធសឹងបង្ហាញនូវវប្បធម៌ និងប្រពៃណីប្លែកៗពីគ្នាដូចជាប្រពៃណីនៃការរៀបអាពាហ៍ពិពាហ៍, ពិធីចូលម្លប់ដែលប្តូរពីជីវិតកុមារីទៅជាមនុស្សពេញវ័យ វប្បធម៌គោរពព្រះពុទ្ធសាសនា គោរពគ្រួសាររបស់ស្ត្រី, ជីវិតស្ត្រីដែលរស់នៅក្នុងភាពឯករាជ្យ និងសេរីភាពប្រកបដោយសុភមង្គល រួមទាំងរូបភាពដែលបង្ហាញពីតួនាទីស្ត្រីក្នុងសង្គម និងត្រូវគោរពបំផុត ។
ពិព័រណ៍ខាងលើនេះ ចាប់បើកពីថ្ងៃទី៧ មីនា ឆ្នាំ២០១១ ដែលមានរយៈពេលជាងមួយខែ និងបើកឱ្យទស្សនិកជនចូលទស្សនាដោយមិនគិតថ្លៃ ។ កញ្ញាចាន់ ពិសី អតីតសិស្សអង្គការហ្វាពន្លឺសិល្បៈ ដែលមានផ្ទាំងគំនូរចូលរួមក្នុងពិព័រណ៍បាននិយាយថា នេះជាលើកទី១របស់នាងក្នុងការបង្ហាញស្នាដៃគំនូរបែបវប្បធម៌ និងប្រពៃណី ។ ប្រធានបទ ដែលនាងចូលរួមនាពេលនេះគឺ «ស្ត្រីចូលម្លប់» ដែលចង់បង្ហាញអំពីទំនៀមទម្លាប់នៃការចូលម្លប់របស់ស្ត្រីខ្មែរនាសម័យដើម ។ នាងយកផ្ទាំងគំនូរនោះដើម្បីពន្យល់ឱ្យស្ត្រីខ្មែរបានដឹងពីពិធីចូលម្លប់ ដែលប្តូរពីជីវិតកុមារីទៅជាមនុស្សពេញវ័យក្រមុំ ដែលបច្ចុប្បន្នមិនសូវមានការប្រារព្ធធ្វើទៀតទេ ។ នាងបញ្ជាក់ថា រយៈពេលនៃការចូលម្លប់អាចមានច្រើនសបា្តហ៍ និងមានគោលបំណងបង្ហាត់បង្រៀនស្រីពេញក្រមុំឱ្យត្រៀមខ្លួនដើរតួនាទីជាម្តាយ និងទទួលខុសត្រូវទុកដាក់ផ្ទះសម្បែង ។ អ្វីជាសំខាន់នោះ គឺនាងចង់ឱ្យយុវវ័យខ្មែរនាជំនាន់នេះបានស្វែងយល់ និងស្គាល់អំពីវប្បធម៌ប្រពៃណីខ្មែរនាសម័យមុន ៕
ចែករំលែកព័តមាននេះ