រាជធានីភ្នំពេញ ៖ ទីបំផុតអាថ៌កំបាំងរវាងតារាចម្រៀងលោក អឹុង ប៊ុនលាភ និងភរិយាបានឡើងដល់តុលាការ ហើយស្វាមីភរិយាមួយគូនេះបានទៅតទល់មុខគ្នានៅសាលាដំបូងរាជធានីភ្នំពេញកាលពីថ្ងៃទី១២ កក្កដា ២០១២ តាមបណ្តឹងរបស់លោក អុឹង ប៊ុនលាភ ដែលប្តឹងភរិយាគឺអ្នកស្រី ម៉ុក ភក្តី កុំឱ្យរំខានជីវិតឯកជនរបស់ខ្លួន បន្ទាប់ពីមានការផ្សព្វផ្សាយដ៏គួរឱ្យភ្ញាក់ផ្អើលក្រោយពីការបាត់ខ្លួនតារាចម្រៀងរូបនេះ។
ជួបសម្ភាសន៍ជាមួយកោះសន្តិភាពកាលពីម្សិលមិញ(ថ្ងៃទី១៣ កក្កដា) អ្នកស្រី ម៉ុក ភក្តី ដែលជាភរិយាលោក អឹុង ប៊ុនលាភ បាននិយាយថា រវាងអ្នកស្រី និងស្វាមីបានជួបមុខគ្នារួចហើយនៅសាលាដំបូងរាជធានីភ្នំពេញកាលពីថ្ងៃទី១២ កក្កដា តាមពាក្យបណ្តឹងរបស់លោក អុឹង ប៊ុនលាភ ជាប្តី ហើយពាក្យបណ្តឹងនោះបានធ្វើឡើងក្រោយពេលដែលស្វាមីអ្នកស្រីចុះចេញពីផ្ទះដោយមិនមានដំណឹងអ្វីសោះ ។
អ្នកស្រី ម៉ុក ភក្តី បញ្ជាក់ថាប្រឈមជាមួយពាក្យបណ្តឹងរបស់ស្វាមីនេះ អ្នកស្រីបានប្តឹងតបវិញដែរទាមទារទ្រព្យសម្បត្តិដែលលោក អឹុង ប៊ុនលាភ បានបំផ្លាញកាលពីនៅរួមរស់ជាមួយគ្នា ជាថ្នូរនឹងការព្រមផ្តិតមេដៃលែងលះ ។
យោងតាមពាក្យបណ្តឹងតបចុះថ្ងៃទី១១ កក្កដា ២០១២ អ្នកស្រី ម៉ុក ភក្តី បានស្នើសុំឱ្យតុលាការផ្តាច់សង្វាស់រវាងអ្នកស្រី និងលោក អឹុង ប៊ុនលាភ និងបង្គាប់ឱ្យលោកប្រគល់រថយន្តចំនួន៦គ្រឿងក្នុងនោះម៉ាកឡិចស៊ីស៣០០ ពណ៌ខ្មៅ ចំនួន២គ្រឿង ពណ៌ស្ករចំនួន២គ្រឿង និងពណ៌ផ្ទៃមេឃចំនួន១គ្រឿង និងម៉ាកឡង់គ្រីស័្សរ ពណ៌ស ចំនួន១គ្រឿង ម៉ូតូ XL ពណ៌ខ្មៅ ចំនួន១គ្រឿង រួមទាំងខ្សែដៃ ខ្សែក និងចិញ្ចៀនពេជ្រមួយចំនួន ។ ក្រៅពីនេះក្នុងពាក្យបណ្តឹងក៏ទាមទារឱ្យលោក អុឹង ប៊ុនលាភ សងលុយដែលយកទៅធ្វើផ្ទះឱ្យម្តាយចំនួន៣ម៉ឺនដុល្លារអាមេរិកផងដែរ ដែលសរុបជាប្រាក់ចំនួនប្រមាណ២០ម៉ឺនដុល្លារ។
អ្នកស្រី ម៉ុក ភក្តី បញ្ជាក់ថា អ្វីៗដែលអ្នកស្រីទាមទារក្នុងពាក្យបណ្តឹងនោះ គឺជាទ្រព្យសម្បត្តិរបស់អ្នកស្រីដែលត្រូវប្តីយកទៅបញ្ចាំស៊ីចាយលេងល្បែងផ្ទាល់ខ្លួន និងបំផ្លាញអស់ពីខ្លួនក្នុងរយៈពេលរស់នៅជាមួយគ្នាចំនួន៨ឆ្នាំ ។ ដូច្នេះអ្នកស្រីត្រូវទាមទារឱ្យប្តីយកទ្រព្យសម្បត្តិទាំងអស់នោះមកឱ្យវិញ ។
ទាក់ទងនឹងអាពាហ៍ពិពាហ៍អ្នកស្រី ម៉ុក ភក្តី បញ្ជាក់ថា អ្នកស្រី និងលោកអឹុង ប៊ុនលាភ បានរៀបអាពាហ៍ពិពាហ៍ជាមួយគ្នា ហើយបានចុះសំបុត្រអាពាហ៍ពិពាហ៍ត្រឹមត្រូវតាមច្បាប់នៅសហរដ្ឋអាមេរិក គឺមិនមែនជាស្នេហាលួចលាក់ទេ ។ ប៉ុន្តែនៅថ្ងៃទី២៤ ឧសភា ឆ្នាំ២០១២ នៅវេលាម៉ោងប្រមាណជា៥ និង៣០នាទីល្ងាចស្វាមីរបស់អ្នកស្រីបានចុះចេញពីផ្ទះ និងបាត់ខ្លួនគ្មានដំណឹងធ្វើឱ្យអ្នកស្រីជាភរិយាមានការព្រួយបារម្ភយ៉ាងខ្លាំង ។ ដោយខ្លាចស្វាមីមានគ្រោះថ្នាក់នោះ អ្នកស្រីបានដាក់ពាក្យបណ្តឹងទៅកាន់ក្រសួងមហាផ្ទៃ និងផ្សព្វផ្សាយតាមរយៈសារព័ត៌មានផងដែរ ប៉ុន្តែរយៈពេលជាងមួយខែនៅតែគ្មានដំណឹង ។ មិនតែប៉ុណ្ណោះអ្នកស្រីបានទទួលការព្រមានពីមនុស្សស្រីដែលមិនស្គាល់ឈ្មោះតាមរយៈទូរស័ព្ទទៀងផង ។ អ្វីដែលអ្នកស្រីមានការហួសចិត្តនោះស្រាប់តែស្វាមីបានដាក់ពាក្យប្តឹងអ្នកស្រីមិនឱ្យរំខានជីវិតឯកជនរបស់ខ្លួនទៅវិញធ្វើឱ្យអ្នកស្រីមានការរំជួលចិត្តយ៉ាងខ្លាំងដោយមិននឹកស្មានដល់ ។
អ្នកស្រី ម៉ុក ភក្តី អះអាងថា ទោះជាយ៉ាងណាអ្នកស្រីនឹងមិនព្រមផ្តិតមេដៃយល់ព្រមលែងលះឡើយដរាបណាលោកអឹុង ប៊ុនលាភ មិនព្រមសងនូវអ្វីដែលអ្នកស្រីទាមទារនោះ ។ ជាងនេះទៅទៀតការប្តឹងលែងលះនេះ ត្រូវធ្វើឡើងនៅសហរដ្ឋអាមេរិកមិនមែនធ្វើត្រឹមតែស្រុកខ្មែរទេ ព្រោះអ្នកស្រី និងលោកអុឹង ប៊ុនលាភ បានចុះសំបុត្រអាពាហ៍ពិពាហ៍ត្រឹមត្រូវនៅអាមេរិក។ ចំពោះការទាមទារទ្រព្យសម្បត្តិមកវិញនោះគឺដោយសារអ្នកស្រីយល់ថាលោកអឹុង ប៊ុនលាភ បានបោកប្រាស់អ្នកស្រីគ្រប់បែបយ៉ាងរួមទាំងខ្លួនប្រាណផងដែរ ។
អ្នកស្រី ម៉ុក ភក្តី បានអំពាវនាវដល់តុលាការឱ្យជួយរកយុត្តិធម៌និងដោះស្រាយតាមនីតិវិធី ព្រោះអ្នកស្រីគឺជាជនរងគ្រោះក្នុងរឿងក្តីនេះ ។
អ្នកស្រីដដែលនេះបញ្ជាក់ថា អ្នកស្រីបានដាក់ពាក្យបណ្តឹងនៅស្ថានទូតអាមេរិករួចហើយដើម្បីការពារសុវត្ថិភាពផ្ទាល់ខ្លួនរបស់អ្នកស្រីខណៈពេលផ្ទះដែលអ្នកស្រីធ្វើឱ្យម្តាយលោកអឹុង ប៊ុនលាភ នោះត្រូវបានគេបញ្ជាឱ្យឈូសចោល រួមទាំងរថយន្តមួយគ្រឿងផងដែរ ៕
ចែករំលែកព័តមាននេះ