រាជធានីភ្នំពេញ ៖ ម៉ូតូអត់មានភ្លើងបំភ្លឺផ្លូវបើកបរពេលយប់ភាគច្រើនជាម៉ូតូកញ្ចាស់ ដោយឡែកម៉ូតូណៃហតមួយគ្រឿងនេះជិះពេលយប់អត់មានភ្លើងបំភ្លឺផ្លូវ បណ្តាលឱ្យបុកអ្នកដើរឆ្លងផ្លូវរងរបួសធ្ងន់រហូតសន្លប់ កាលពីវេលាម៉ោង៩និង៤០នាទីយប់ថ្ងៃទី២ កក្កដា នៅតាមផ្លូវលេខ៥៩៨ ក្រុម៧ ភូមិទំនប់ សង្កាត់ភ្នំពេញថ្មី ខណ្ឌសែនសុខ ។
ជនរងគ្រោះឈ្មោះសេត បូរ៉ា ភេទប្រុស អាយុ២៩ឆ្នាំ ជាជាងកាត់ដេរ ស្នាក់នៅផ្ទះជួលភូមិកើតហេតុខាងលើ មានស្រុកកំណើតនៅភូមិទួលធាតុ ឃុំពាមប្រធ្នោះ ស្រុកកោះសូទិន ខេត្តកំពង់ចាម រងរបួសបោកក្បាលហូរឈាមតាមត្រចៀកសន្លប់ឈឹង ។ អ្នកឃើញហេតុការណ៍បានឱ្យដឹងថា មុនពេលកើតហេតុម៉ូតូណៃហត ពណ៌ខ្មៅ ជិះតាមផ្លូវលេខ៥៩៨ ពីជើងទៅត្បូងអត់ភ្លើងបំភ្លឺផ្លូវទេ ខណៈមកដល់ចំណុចខាងលើបានបុកអ្នកដើរឆ្លងផ្លូវពីកើតទៅលិច អូសជិត២០ម៉ែត្រ បណ្តាលឱ្យដួលបោកក្បាលឈាមហូរតាមត្រចៀកសន្លប់ស្តូកស្តឹង ។
ក្រោយពេលកើតហេតុ អ្នកជិះម៉ូតូបានរត់គេចខ្លួនចោលម៉ូតូបាត់ ចំណែកជនរងគ្រោះត្រូវបានគេបញ្ជូនទៅព្យាបាលនៅគ្លីនិកឯកជន ។ ម៉ូតូបង្កហេតុត្រូវសមត្ថកិច្ចយកទៅរក្សាទុកនៅខណ្ឌសែនសុខរង់ចាំឱ្យម្ចាស់ម៉ូតូចូលខ្លួនទៅដោះស្រាយ ៕
ចែករំលែកព័តមាននេះ