ខេត្ដសៀមរាប ៖ សាធារណរដ្ឋប្រជាមានិតចិន បានសម្រេចផ្ដល់ជំនួយជាថវិកាចំនួន៤០លានយន់ គឺប្រហែលជាង៦លានដុល្លារអាមេរិក មកឱ្យរដ្ឋាភិបាលកម្ពុជាដើម្បីធ្វើការជួសជុលប្រាសាទ ”តាកែវ” ដែលជាប្រាសាទដ៏សំខាន់មួយ នៃរមណីយដ្ឋានវប្បធម៌ប្រវត្ដិសាស្ដ្រអង្គរ ក្នុងរយៈពេល៨ឆ្នាំ ។ លោកឧបនាយករដ្ឋមន្ដ្រី សុខ អាន រដ្ឋមន្ដ្រី ទទួលបន្ទុកទីស្ដីការគណៈរដ្ឋមន្ដ្រីនៃប្រទេសកម្ពុជា និងលោក ឆៃ អ៊ូ រដ្ឋមន្ដ្រីក្រសួងវប្បធម៌ នៃសាធារណរដ្ឋប្រជាមានិតចិន កាលពីរសៀល ថ្ងៃសៅរ៍ ទី២៧ ខែវិច្ឆិកា បានកាត់ខ្សែបូ បើកសម្ពោធការដ្ឋានជួសជុលប្រាសាទ “តាកែវ” នេះ ដោយមានមន្ដ្រីជំនាញពាក់ព័ន្ធ និងប្រជាពលរដ្ឋរាប់ពាន់នាក់ចូលរួម ។ ថ្លែងទៅកាន់អ្នកចូលរួមនៅក្នុងពិធីនោះ លោកឧបនាយករដ្ឋមន្ដ្រី សុខ អាន បានមានប្រសាសន៍ថា យើងគ្រប់គ្នាសុទ្ធតែដឹងហើយ ថា “ប្រាសាទបុរាណគឺជាមរតកវប្បធម៌ដ៏ឧត្ដុង្គឧត្ដមនៃបុព្វការីជនខ្មែរនាសម័យអង្គរដ៏រុងរឿង និងតំណាងឱ្យព្រលឹងជាតិខ្មែរទាំងមូល ហើយក៏ជាប្រភពដ៏រស់រវើកសម្រាប់ការអភិវឌ្ឍវិស័យទេសចរណ៍ និងសេដ្ឋកិច្ចកម្ពុជាផងដែរ” ។ ដូច្នេះគំរោងការជួសជុសប្រាសាទតាកែវនេះ គឺពិតជាមោទនភាពនិងជោគជ័យជាប្រវត្ដិសាស្ដ្រដ៏ធំធេងមួយក្នុងការបំពេញបេសកកម្មនិងសហប្រតិបត្ដិការអន្ដរជាតិរវាងកម្ពុជាជាមួយសាធារណរដ្ឋប្រជាមានិតចិន ។
លោកឧបនាយករដ្ឋមន្ដ្រីបានបន្ថែមថា ការបើកការដ្ឋានជួសជុលប្រាសាទតាកែវនេះមិនមែនជាលទ្ធផលដំបូងនៃគំរោងជំនួយ និងកិច្ចសហប្រតិបត្ដិការរវាងកម្ពុជានិងរដ្ឋាភិបាល នៃសាធារណរដ្ឋប្រជាមានិតចិននោះទេ ។ កន្លង មក រដ្ឋាភិបាលចិនបានផ្ដល់គំរោងជំនួយជាច្រើនសម្រាប់ការអភិវឌ្ឍសេដ្ឋកិច្ច-សង្គមនៅកម្ពុជា ដូចជាកសាងស្ពាន ផ្លូវគមនាគមន៍ ប្រព័ន្ធធារាសាស្ដ្រ សាលារៀន មន្ទីរពេទ្យ និងគំរោងជួសជុលប្រាសាទចៅសាយទេវតាជាដើម ។ លោកឧបនាយករដ្ឋមន្ដ្រីបានបន្ដថា ការអភិរក្សប្រាសាទបុរាណមិនគ្រាន់តែជាមធ្យោបាយ ដើម្បីការពារប្រាសាទបុរាណតែប៉ុណ្ណោះទេ ប៉ុន្ដែគឺជាមូលដ្ឋានគ្រឹះដល់ការអភិវឌ្ឍ ប្រកបដោយចីរភាព និងបង្កើតការងារជូនប្រជា ពលរដ្ឋក្នុងតំបន់ ជាពិសេសលើកកំពស់ភាពប្រកួតប្រជែងក្នុងវិស័យទេសចរណ៍របស់ប្រទេសកម្ពុជាឱ្យមានកំរិតកាន់តែខ្ពស់ថែមទៀត ដែលវិស័យនេះបានរួមចំណែកយ៉ាងសំខាន់ក្នុងកំណើនសេដ្ឋកិច្ចកម្ពុជា ។ នៅក្នុងឱកាសបើកសម្ពោធការដ្ឋានជួសជុលប្រាសាទតាកែវជាប្រវត្ដិសាស្ដ្រនេះ លោក ឆៃ អ៊ូ បានថ្លែងថា គំរោងការអភិរក្ស និងជួសជុលប្រាសទតាកែវ គឺជាគំរោងការធំទី២ បន្ទាប់ពីបានជួយឧបត្ថមថវិកាប្រមាណ១៤លានយន់ សំរាប់ជួសជុលប្រាសាទចៅសាយទេវតា ក្នុងឆ្នាំ២០០០ ដែលត្រូវបានចាត់ទុកថាជាកិច្ច ការចំបងមួយសំរាប់រឹតបន្ដឹងចំណងមិត្ដភាព រវាងប្រទេសកម្ពុជា ជាមួយប្រទេសចិន ដែលមានជាយូរឆ្នាំមកហើយ ។
លោកឆៃ អ៊ូ បានបញ្ជាក់ថា កាលពីឆ្នាំ ២០០៦ លោកវេន ជាបាវ នាយករដ្ឋមន្ដ្រីនៃ សាធារណរដ្ឋប្រជាមានិតចិន និងសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានចុះហត្ថលេខា លើអនុស្សរណៈ នៃការយោគយល់គ្នា ដែលបញ្ជាក់ឱ្យឃើញថា“រដ្ឋាភិបាលទាំងពីរ ជួយថែរក្សា និងជួសជុលឡើងវិញនូវប្រាសាទតាកែវ ដែលជាគំរោងទីពីររបស់ប្រទេសចិនក្នុងការជួយថែរក្សាអង្គរបេតិកភណ្ឌពិភពលោក ឱ្យ បានល្អ” ។ អគ្គនាយកអាជ្ញាធរជាតិអប្សរា លោក ប៊ុន ណារិទ្ធ ដែលបានចូលរួមក្នុងពិធីបើកការដ្ឋានជួសជុលប្រាសាទតាកែវនេះបានថ្លែងថា ថវិកាដែលរដ្ឋាភិបាលនៃសាធារណរដ្ឋប្រជាមានិត ចិនផ្ដល់ឱ្យរាជរដ្ឋាភិបាលកម្ពុជាសំរាប់ជួសជុល ប្រាសាទតាកែវដែលជាប្រាសាទសំខាន់មួយនៃរមណីយដ្ឋានវប្បធម៌ប្រវត្ដិសាស្ដ្រអង្គរ បេតិកភណ្ឌពិភពលោកនាពេលនេះមានចំនួន៤០លានយន់ (ប្រហែលជាង៦លាន ដុល្លារអាមេរិក) ដែលមានរយៈពេល៨ឆ្នាំ គឺចាប់ពីពេលនេះ រហូតដល់ឆ្នាំ២០១៨ខាងមុខ ។ លោក សឺន គង់ អគ្គនាយករងអាជ្ញាធរជាតិអប្សរា ក៏បានថ្លែងដែរថា ក្រៅពីគំរោងការជួសជុលប្រាសាទតាកែវ និងប្រាសាទចៅសាយទេវតា ក្រោមជំនួយរបស់សាធារណរដ្ឋប្រជាមានិតចិន ទាំងពីរលើកនេះនៅមានការដ្ឋានជួសជុលប្រាសាទក្រោមជំនួយអន្ដរជាតិ ជាច្រើនទៀតដូចជាឥណ្ឌាកំពុងជួសជុលផ្នែក ខ្លះនៃប្រាសាទតាព្រហ្ម ជប៉ុនជួសជុលប្រាសាទ បន្ទាយក្ដី និងនៅអង្គរវត្ដមានក្រុមអាល្លីម៉ង់ ជួសជុលរូបអប្សរា ហើយក្រុមបារាំងជួសជុល ប្រាសាទបាពួន និងអ៊ីតាលីកំពុងជួសជុល កាំជណ្ដើរស្ពាននាគ ។
លោកបានបញ្ជាក់ថា សព្វថ្ងៃនេះនៅមានប្រាសាទច្រើនណាស់ដែលត្រូវការជួសជុល ប៉ុន្ដែដោយបញ្ហាកង្វះថវិកា យើងធ្វើការជួសជុលបានតែប្រាសាទណាដែលមានសភាពទ្រុឌទ្រោមជាងគេប៉ុណ្ណោះ ។ ការដ្ឋានភាគច្រើនគឺ ជាគំរោងចំណាយរបស់អន្ដរជាតិដែលជា ប្រទេសជាមិត្ដរបស់យើងគេជួយ ចំពោះខ្មែរយើងមានតែការជួសជុលតិចតួចទេ ទៅតាមលទ្ធភាពដែលអាជ្ញាធរអប្សរាអាចធ្វើបាន ព្រោះការជួសជុលនេះទាមទារសំភារទាមទារ ជំនាញខ្ពស់ ទាមទារលុយកាក់ច្រើនសម្បើមណាស់ ។ មានការរំពឹងទុកថា បទពិសោធន៍ទាំងអស់ដែលកើតចេញពីការជួសជុលប្រាសាទទាំងក្រោមជំនួយបរទេសជាមិត្ដ ទាំងថវិកាក្នុងស្រុកនឹងក្លាយទៅជាចំណេះដឹងជាមូលដ្ឋាន និងសម្រាប់កូនខ្មែរយកទៅអនុវត្ដក្នុងគំរោងអភិរក្ស និងជួសជុលប្រាសាទបុរាណនៅតាមតំបន់ដែលមានចំនួនរាប់ពាន់ផ្សេងទៀត ។ ប្រាសាទតាកែវដែលបើកការដ្ឋានជួសជុល ក្រោមជំនួយរបស់សាធារណរដ្ឋប្រជាមានិតចិន នាពេលនេះគឺត្រូវបានកសាងឡើងនៅចន្លោះ សតវត្សទី១០-១១ នៃគ្រិស្ដសករាជ ដែលជា សំណង់ដ៏អស្ចារ្យមួយនាសម័យមហានគរ ហើយពេលនេះបានក្លាយទៅជាប្រាសាទ សំខាន់មួយក្នុង រមណីយដ្ឋានវប្បធម៌ប្រវត្ដិសាស្ដ្រអង្គរដែល ជាបេតិកភណ្ឌពិភពលោក ៕
ចែករំលែកព័តមាននេះ