ខេត្តបន្ទាយមានជ័យ ៖ តាមប្រភពព័ត៌មានពីច្រកតំបន់បឹងត្រកួន ស្រុកថ្មពួក បានឱ្យដឹងថា ភាគីថៃនៅតែទទូចស្នើសុំការជួសជុលដំបូលអគារអន្តោប្រវេសន៍របស់គេ ដែលស្ថិតក្បែរបង្គោលសីមាព្រំដែនលេខ៣៦ ដែលជាបង្គោលព្រំដែនមិនប្រក្រតី ក្នុងភូមិខ្លងផែង ឃុំតាប់ប្រាយ៉ា ស្រុកតាប់ប្រាយ៉ា ខេត្តស្រះកែវ ឈមនឹងភូមិបន្ទាយមានឫទ្ធិ ឃុំគោករមៀត ស្រុកថ្មពួក ។
ទោះជាមានការទទូចសុំម្តងហើយម្តងទៀតពីសំណាក់ភាគីថៃយ៉ាងណាក្តីក៏កម្លាំងជួរមុខកម្ពុជាធ្វើការបដិសេធជារៀងរហូត ។ មានការកត់សម្គាល់ថា រយៈពេលត្រឹមតែជាង២សប្តាហ៍ខាងភាគីថៃបានស្នើសុំចំនួនដល់ទៅ៣ដងសម្រាប់ធ្វើការជួសជុលអគារអន្តោប្រវេសន៍ដែលការទទូចស្នើសុំនេះ លើកទី១កាលពីវេលាម៉ោង១និង៣០នាទីរសៀលថ្ងៃទី៣០ ឧសភា លើកទី២នៅវេលាម៉ោង៤និង៣០នាទីរសៀលថ្ងៃទី៩ មិថុនា និងលើកទី៣ធ្វើឡើងនៅវេលាម៉ោង៤និង៣០នាទីរសៀលថ្ងៃទី១៥ មិថុនា ។ បើទោះបីជាភាគីថៃទទូចស្នើសុំយ៉ាងនេះក្តី ប៉ុន្តែភាគីកម្ពុជាពុំបានអនុញ្ញាតឱ្យជួសជុលនោះទេ ដោយយល់ថា បង្គោលសីមាព្រំដែនលេខ៣៦ នេះមានភាពមិនប្រក្រតី ហើយអ្នកស្រុកនិយាយថា ដីខ្មែរអាចស្ថិតចូលទៅក្នុងបង្គោលសីមាបច្ចុប្បន្នជាងមួយគីឡូម៉ែត្រឯណោះ ។
ជុំវិញបញ្ហាខាងលើលោកអនុសេនីយ៍ទោ ម៉ង់ ស៊ី មេប៉ុស្តិ៍ច្រកបឹងត្រកួននៃប៉ូលិសការពារព្រំដែនគោកវរសេនាតូចលេខ៨០៧ បានប្រាប់តាមទូរស័ព្ទនៅព្រឹកថ្ងៃទី១៧ មិថុនា ថា ភាគីថៃកាលពីរសៀលថ្ងៃទី១៥ មិថុនា ពិតជាបានមកសុំជួសជុលដំបូលអគារអន្តោប្រវេសន៍ ប៉ុន្តែត្រូវខាងលោកបដិសេធមិនអនុញ្ញាតទេ ។
តាម MOUឆ្នាំ២០០០ ភាគីកម្ពុជា-ថៃបានព្រមព្រៀងគ្នាថា ចំណុចណាដែលមិនទាន់ច្បាស់លាស់មិនត្រូវធ្វើអ្វីដល់ចំណុះនោះទេ រហូតមានការកំណត់ពីបន្ទាត់ព្រំដែនត្រឹមត្រូវ ។ សម្រាប់បង្គោលព្រំដែនលេខ៣៦ កាលក្នុងសង្គ្រាមទសវត្សទី៨០ ចំណុចនេះជាជំរំឫទ្ធិសែន ដែលគ្រប់គ្រងដោយលោក សឺន សាន និងលោក សក់ ស៊ុតសាខន ហើយបង្គោលព្រំដែនមិនបានស្ថិតនៅលើទីតាំងបច្ចុប្បន្នទេ ៕
ចែករំលែកព័តមាននេះ