រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភាបានគូសបញ្ជាក់ថា កម្ពុជាគួរកុំទិញឱ្យសោះចំពោះអ្វីដែលជាផ្នែកយុទ្ធសាស្ត្រពីថៃ ហើយមលដល់ពេលនេះ កម្ពុជា បានបញ្ឈប់ការនាំចូលអ៊ីនធើរណេត…
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភាបានគូសបញ្ជាក់ថា កម្ពុជាគួរកុំទិញឱ្យសោះចំពោះអ្វីដែលជាផ្នែកយុទ្ធសាស្ត្រពីថៃ ហើយមលដល់ពេលនេះ កម្ពុជា បានបញ្ឈប់ការនាំចូលអ៊ីនធើរណេត អគ្គិសនី និងប្រេងឥន្ធនៈ ទាំងស្រុងពីប្រទេសថៃហើយ ។
ថ្លែងក្នុងពិធីជួបសំណេះសំណាលជាមួយ សិស្ស និស្សិត លោកគ្រូ អ្នកគ្រូ នៅមជ្ឈ មណ្ឌលអប់រំ និងបណ្ដុះបណ្ដាល ជា ស៊ីម កំចាយមារ ខេត្តព្រៃវែង នៅថ្ងៃទី៣ ខែកក្កដា ឆ្នាំ២០២៥ សម្ដេចតេជោហ៊ុន សែន បានលើកឡើងថា កម្ពុជាគួរកុំទិញឱ្យសោះ ចំពោះអ្វីដែលជាផ្នែកយុទ្ធសាស្ត្រពីថៃ ។ ទោះបីវាតិចក៏ដោយ កុំពឹង! គួររកប្រភពផ្សេង កុំឱ្យមានភាពច្រំដែលកើតឡើង ។
សម្តេចតេជោបានបញ្ជាក់ថា «អ្វីដែលជាទំនិញយុទ្ធសាស្ត្រកុំទិញឲ្យសោះ ទី១-អគ្គិសនី ដាច់ខាតកុំទិញ អតីតរដ្ឋមន្ត្រីការពារជាតិ ឥលូវជារដ្ឋមន្ត្រីមហាផ្ទៃ អត់ឆ្លើយសំណួរ ខ្ញុំបានទេ…កាលនៅព្រះវិហារខ្ញុំថា បើអ្នកឯងឆ្លើយនឹងសំណួរខ្ញុំបានទេ អ្នកឯងមិនមែនជា មនុស្សទេ។ ទី២-អ៊ីនធើរណេត កុំទិញឲ្យសោះ និងទី៣-ប្រេងឥន្ធនៈ និងឧស្ម័នកុំទិញ»។
ជាមួយគ្នានោះដែរ សម្ដេចតេជោបានគូសបញ្ជាក់ជាថ្មីថា កម្ពុជាគួរប្រុងប្រយ័ត្នឱ្យបានមែនទែន ចំពោះការទិញអ្វីដែលជាផ្នែកយុទ្ធសាស្ត្រពីប្រទេសថៃ ជាពិសេស អគ្គិសនី, អ៊ីនធើរណេត, ប្រេងឥន្ធនៈនិងឧស្ម័ន ។
ក្រៅពីនេះ សម្ដេចតេជោ ហ៊ុន សែន ក៏បានរំលឹកសារជាថ្មីឱ្យកម្ពុជា បញ្ឈប់ការចាក់ផ្សាយភាពយន្តរបស់ថៃផងដែរ ។ សម្ដេចតេជោ ក៏បានឱ្យដឹងដែរថា កន្លងមក កម្ពុជាធ្លាប់បញ្ឈប់ការចាក់ផ្សាយភាពយន្តថៃម្ដងរួចមកហើយដែរ កាលពីអំឡុងមានភាពតានតឹងជាមួយថៃក្នុងឆ្នាំ២០០៣ តែដោយមានការទទូចស្នើសុំពីភាគីថៃ, កម្ពុជាក៏សម្រេចចាក់ផ្សាយភាពយន្តថៃឡើងវិញ ក្នុងឆ្នាំ២០១៦ ឬឆ្នាំ២០១៧។
យ៉ាងណា សម្តេចតេជោបានបញ្ជាក់ថា កម្ពុជាបានបញ្ឈប់ការនាំចូលអ៊ិនធើរណេតអគ្គិសនី និងប្រេងឥន្ធនៈទាំងស្រុងពីប្រទេសថៃហើយ ក្រោយការគំរាមផ្ដាច់ពីភាគីថៃ ដែលជាអ្វីសម្ដេចតេជោលើកឡើងថា «ខាងនោះអ្នកលេង ខាងនេះអ្នកមែន» ៕
ចែករំលែកព័តមាននេះ