រាជធានីភ្នំពេញ ៖ ថ្លែងពីទឹកដីខេត្តកំពង់ធំ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានឌឺដងផ្លែផ្កាចំអកទៅកាន់មេឧទ្ទាមក្រៅច្បាប់ និងបក្ខពួកខ្លួន ដែលនៅបរទេសថា កំពុងភ័យបុកពោះដេកព្រួយបារម្ភ…
រាជធានីភ្នំពេញ ៖ ថ្លែងពីទឹកដីខេត្តកំពង់ធំ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានឌឺដងផ្លែផ្កាចំអកទៅកាន់មេឧទ្ទាមក្រៅច្បាប់ និងបក្ខពួកខ្លួន ដែលនៅបរទេសថា កំពុងភ័យបុកពោះដេកព្រួយបារម្ភ ចំពោះកម្ពុជាដែលបាន និងកំពុងរៀបចំធ្វើវិសោធនកម្មដកសញ្ជាតិខ្មែរពីជនណាដែលបានឃុបឃិតជាមួយបរទេស មកបំផ្លាញប្រទេសជាតិខ្លួនឯង ។
ថ្លែងក្នុងពិធីបើកការដ្ឋានសាងសង់ទីស្នាក់ការ គណបក្សប្រជាជនកម្ពុជាខេត្តកំពង់ធំ នាព្រឹកថ្ងៃទី៣ ខែមិថុនា ឆ្នាំ២០២៥ សម្តេចបវរធិបតី ហ៊ុន ម៉ាណែត បានលើកឡើងថា បើសិនជាក្រុមប្រឆាំងនៅក្រៅប្រទេសឃុបឃិតសហការជាមួយបរទេស ដើម្បីបំផ្លាញជាតិខ្មែរ គឺពួកគេមិនសាកសមជាប្រជាពលរដ្ឋខ្មែរនោះទេ ព្រោះបើពលរដ្ឋខ្មែរពិតប្រាកដគេស្រឡាញ់ជាតិ ស្រឡាញ់ទឹកដី ការពារជាតិឲ្យបានរឹងមាំហើយ ។
ជាមួយគ្នានោះដែរ សម្តេចធិបតី នាយករដ្ឋមន្ត្រី ក៏បានផ្ញើសារចេញពីកម្ពុជាទៅវិញថា បើអ្នកពិតជាគ្មានបំណងបំផ្លាញជាតិខ្លួនទេ កុំចាំបាច់ភ័យបារម្ភ ។ សម្តេចធិបតី នាយករដ្ឋមន្ត្រី គូសបញ្ជាក់ទៅកាន់ក្រុមមនុស្សមួយចំនួនដែលតាំងខ្លួនឯងជាអ្នកស្នេហាជាតិ បែរទៅជារួមដៃជាមួយមិត្តបរទេសមកបំផ្លាញខ្មែរថា «ប៉ុន្មានថ្ងៃមកនេះ ឃើញគេមា នចេញព្រោងព្រាតនៅខាងក្រៅ ភ័យនៅពេលគ្រោងរៀបចំធ្វើវិសោធនកម្មរឿងដកសញ្ជាតិ ។ សំដៅលើអ្នកណា ជនជាតិខ្មែរណា ដែលប្រឆាំងនឹងផលប្រយោជន៍របស់ខ្មែរ ។
សម្តេចបញ្ជាក់បន្ថែមថា ៖«ឥឡូវអ្នកខំភ័យធ្វើអី បើអ្នកឯងស្នេហាជាតិ ប្តេជ្ញាចិត្ត ទោះបីជាដង្ហើមចុងក្រោយមិនធ្វើប្រឆាំងនឹងផលប្រយោជន៍ជាតិខ្មែរ អីចឹងកុំភ័យព្រួយពេក ។ បើសិនជាអ្នកមានផែនការបំផ្លាញ ឃុបឃិតជាមួយបរទេសបំផ្លាញផលប្រយោជន៍ជាតិខ្មែរ អាហ្នឹងអ្នកឯងភ័យចុះ ប៉ុន្តែបើអ្នកបែបហ្នឹងមិនគួរជាខ្មែរទេ» ។
សម្តេចធិបតី បន្តថា ការធ្វើវិសោធនកម្មច្បាប់ដកសញ្ជាតិនេះ មិនមែនមានតែនៅកម្ពុជាមួយប៉ុណ្ណោះទេ ប៉ុន្តែប្រទេសដែលជាសមាជិករបស់អង្គការសហប្រជាជាតិ១៩៥ប្រទេស គឺមាន១៥០ប្រទេស ហយដែលបានធ្វើច្បាប់ដកសញ្ជាតិ លើពលរដ្ឋខ្លួនដែលឃុបឃិតជាមួយបរទេសមកបំផ្លាញផលប្រទេសជាតិខ្លួនឯង ។
សម្តេចធិបតី បញ្ជាក់ថា សូម្បីតែសហរដ្ឋអាមេរិក ដែលជាប្រទេសមហាអំណាចលេខមួយលើពិភពលោកក៏មានច្បាប់ដកសញ្ជាតិដែរ ខណៈថ្មីៗនេះអាមេរិកបានតាក់តែងច្បាប់ថ្មីមួយ គឺដកសញ្ជាតិចំពោះបុគ្គលណាប្រព្រឹត្តអំពើភេរវកម្ម ឬក៏អត់មានសីលធម៌ ។
សូមជម្រាបថា កាលពីថ្ងៃទី២ ខែកក្កដា ក្រុមប្រឹក្សាធម្មនុញ្ញបានបើកកិច្ចប្រជុំពេញអង្គពិភាក្សានឹងការធ្វើវិសោធនកម្មមាត្រា៣៣នៃរដ្ឋធម្មនុញ្ញអំពីការដកសញ្ជាតិខ្មែរពីពលរដ្ឋណាដែលមានបំណងឃុបឃិតជាមួយបរទេសបំផ្លាញផលប្រយោជន៍ជាតិ ហើយក៏បានទូលថ្វាយអង្គព្រះមហាក្សត្រថា ការធ្វើវិសោធនកម្មមាត្រា ៣៣នៃរដ្ឋធម្មនុញ្ញប្រទេសកម្ពុជា «អាចធ្វើទៅបាន»៕
ចែករំលែកព័តមាននេះ