ខេត្តប៉ៃលិន ៖ យុវជន២នាក់បានត្រូវពស់ស្រកាចាស់ និងពស់ពព្លាក់ចឹកកាលពីថ្ងៃទី៧ មិថុនា ដោយម្នាក់ចំជើងខាងឆ្វេង និងម្នាក់ទៀតចំជើងស្តាំ ហើយត្រូវបានគេបញ្ជូនមកសង្គ្រោះនៅមន្ទីរពេទ្យបង្អែកខេត្ត ។ ករណីទី១ ត្រូវបានដឹងថា យុវជនម្នាក់ឈ្មោះអួន ខា អាយុ២៦ឆ្នាំ មានស្រុកកំណើតនៅភូមិអូរម៉ាល់ សង្កាត់អូរម៉ាល់ ក្រុងបាត់ដំបង ត្រូវពស់ស្រកាចាស់ចឹកស្មងជើងខាងឆ្វេង ខណៈពេលដើរចេញពីពំនូកដំឡូងមីដែលចិញ្ច្រាំមួយកន្លែងបម្រុងទៅចិញ្ច្រាំមួយពំនូកទៀតនៅចម្ងាយពីគ្នាប្រហែល១០ម៉ែត្រ ។
ពេលដើរចេញបានប្រមាណ៣ម៉ែត្រជាន់លើដើមដំឡូងមីងាប់ៗ ស្រាប់តែពស់ចឹកចំជើង លុះពេលបញ្ចាំងភ្លើងពិលមើលឃើញដឹងថាជាពស់ស្រកាចាស់ ក៏ហៅបងប្រុសឈ្មោះអួន អាត អាយុ៣៤ឆ្នាំ ឱ្យជួយដោះអាវរុំផ្នែកខាងលើមុខរបួសដើម្បីឃាត់កុំឱ្យពិសជ្រាបចូលដល់បេះដូង ក្រោយមកកូនចៅម្ចាស់ចម្ការលើកដាក់ម៉ូតូបញ្ជូនមកមន្ទីរពេទ្យបង្អែកខេត្ត ។ ហេតុការណ៍នេះបានកើតឡើងនាវេលាម៉ោង៧យប់នៅក្នុងចម្ការដំឡូងមីមួយកន្លែងក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ។
ជនរងគ្រោះបាននិយាយប្រាប់ថា រូបគេរស់នៅឯខេត្តបាត់ដំបង តែដោយនៅទីនោះទំនេរគ្មានការងារធ្វើទើបបងប្រុសឈ្មោះអួន អាត បបួលមកធ្វើការស៊ីឈ្នួលនៅខេត្តប៉ៃលិន ឮដំណឹងថា ប្រជាពលរដ្ឋភាគច្រើននៅក្នុងខេត្តនេះ គេដាំដំឡូងមីច្រើន ហើយប្រមូលផលមិនទាន់រួចរាល់នៅឡើយ ។ ពួកគេត្រូវការកម្លាំងកម្មករជាច្រើននាក់ទៀត ដើម្បីឱ្យមកធ្វើការនៅក្នុងចម្ការដំឡូងមីរបស់ពួកគេ ។ គ្រាន់តែដឹងភ្លាម រូបគេក៏បានរៀបចំខ្លួនយ៉ាងប្រញាប់ប្រញាល់ រួចទាំង២នាក់បងប្អូនក៏ឡើងជិះរថយន្តឈ្នួលមកដល់ចម្ការរបស់ថៅកែម្នាក់នៅកន្លែងមួយ ស្ថិតក្នុងភូមិភ្នំកុយ ស្រុកសាលាក្រៅ ។ លុះមកធ្វើការងារនៅទីនោះបានត្រឹមតែ២ថ្ងៃប៉ុណ្ណោះក៏ត្រូវពស់ស្រកាចាស់ចឹកជើងខាងឆ្វេងធ្វើឱ្យឈឺចុកចាប់ស្ទើរតែទ្រាំមិនបាន ។
ជនរងគ្រោះបានបន្តទៀតថា មុនពេលត្រូវពស់់ស្រកាចាស់ចឹកនេះ រូបគេបានដកដំឡូងមីឱ្យថៅកែមួយកន្លែងដោយមានគ្នា៦នាក់ តាំងពីព្រឹកដល់ល្ងាចបានជាច្រើនពំនូករួច ក៏នាំគ្នាឈប់សម្រាកដើម្បីចិញ្ច្រាំដំឡូងមីទុកហាលថ្ងៃ ។ ពេលពួកគេទាំង៦នាក់ចិញ្ច្រាំអស់មួយពំនូកធំ ក៏នាំគ្នាដើរមកចិញ្ច្រាំមួយពំនូកទៀត ដែលមានចម្ងាយពីគ្នាប្រហែលជា១០ម៉ែត្រ ។ ពេលនោះ មេឃចាប់ផ្តើមងងឹតរូបគេបញ្ចាំងពិលមើលទៅតែខាងមុខ មិនបានមើលក្រោមទេ លុះដើរជាន់លើមែកដំឡូងមីងាប់ ស្រាប់តែពស់ហក់មកចឹកស្មងជើងខាងឆ្វេងជាប់ ។
ករណីទី២ យុវសិស្សម្នាក់ឈ្មោះគុជ ចិត្រា អាយុ២០ឆ្នាំ រៀននៅថ្នាក់ទី៩ នៃអនុវិទ្យាល័យបរយ៉ាខា បានត្រូវពស់ពព្លាក់ចឹកជើងខាងស្តាំ ខណៈពេលរូបគេដើរមកពីយកទូរស័ព្ទដែលបានបញ្ចូលភ្លើងនៅផ្ទះអ្នកជិតខាងបានចម្ងាយប្រមាណ១០ម៉ែត្រ ។ ហេតុការណ៍នេះបានកើតឡើងនៅវេលាម៉ោង៨យប់ ស្ថិតក្នុងភូមិរោងចក្រ សង្កាត់បរយ៉ាខា ក្រុងប៉ៃលិន ។ ក្រោយពីដឹងថា ពស់ចឹកក៏បញ្ចាំងភ្លើងពិលមើលដឹងថាជាពស់ពព្លាក់ ទើបអ្នកជិតខាងនាំគ្នាផ្អើលមកមើលឈូឆររួចត្រូវបានលោកគ្រូ វន្ថា នាយកសាលាបឋមសិក្សាបរយ៉ាខា ដឹកយកមកព្យាបាលនៅមន្ទីរពេទ្យបង្អែកខេត្ត ។
គ្រូពេទ្យបានឱ្យដឹងថា ពស់ទាំង២ក្បាលនេះជាសត្វដែលមានគ្រោះថ្នាក់បំផុត ព្រោះសុទ្ធតែមានពិសដូចៗគ្នា ហើយបើពិសរបស់វាជ្រាបចូលដល់បេះដូង គឺអាចស្លាប់ភ្លាមៗនៅនឹងកន្លែង ឬបើសិនជាព្យាបាលតាមវិធីសាស្ត្រខ្មែរដោយមិនបានបន្សាបជាតិពិសឱ្យអស់ទេ ដោយ ទុកនៅផ្ទះយូរពេកហួសពេលជនរងគ្រោះក៏អាចស្លាប់ ។ បើនាំយកមកមន្ទីរពេទ្យគឺមានសុវត្ថិភាពជាង ដូច្នេះទើបជនរងគ្រោះទាំង២នាក់ពេលមកដល់មន្ទីរពេទ្យបង្អែកភ្លាម ត្រូវបានគ្រូពេទ្យបូមយកជាតិពិសពីក្នុងមុខរបួសចេញរួចក៏ចាក់ថ្នាំបន្សាបព្យាបាលរួចផុតពីគ្រោះថ្នាក់ ៕
ចែករំលែកព័តមាននេះ