ខេត្តកំពត ៖ បន្ទាប់ពីព្រះតេជគុណចៅអធិការវត្តភ្នំពេញធម៌ ហៅវត្តដុបច្រាំងក្រហម ស្ថិតក្នុងភូមិច្បារអំពៅ ឃុំព្រៃថ្នង ស្រុកទឹកឈូ ខេត្តកំពត បានបង្ហោះសារតាមបណ្ដាញសង្គមថា វត្តដែលមានព្រះសង្ឃចំនួន៩អង្គនៅក្នុងពិធីបុណ្យកាន់បិណ្ឌវេនទី៥នេះ…
ខេត្តកំពត ៖ បន្ទាប់ពីព្រះតេជគុណចៅអធិការវត្តភ្នំពេញធម៌ ហៅវត្តដុបច្រាំងក្រហម ស្ថិតក្នុងភូមិច្បារអំពៅ ឃុំព្រៃថ្នង ស្រុកទឹកឈូ ខេត្តកំពត បានបង្ហោះសារតាមបណ្ដាញសង្គមថា វត្តដែលមានព្រះសង្ឃចំនួន៩អង្គនៅក្នុងពិធីបុណ្យកាន់បិណ្ឌវេនទី៥នេះ គឺកំពុងខ្វះចង្ហាន់ឆាន់ ។
តាមរយៈអ្នកយកព័ត៌មានកោះសន្តិភាពប្រចាំខេត្តកំពត គឺបានចុះទៅដល់ទីអារាមខាងលើ កាលពីព្រឹកថ្ងៃទី១២ ខែកញ្ញា ឆ្នាំ២០២៥ បានពិនិត្យឃើញថា គឺវត្តនៅដាច់ឆ្ងាយពីទីប្រជុំជន និងពិតជាខ្សត់ខ្សោយចង្ហាន់មែន ។
ព្រះតេជគុណ ឈិន គន្ធា មានព្រះជន្ម៣៨វស្សា មានសង្ឃដីកាថា នៅវត្តភ្នំពេញធម៌ ហៅវត្តដុបច្រាំងក្រហមនេះ មានព្រះសង្ឃគង់ចាំព្រះវស្សាចំនួន៩អង្គ ហើយក្នុងពិធីបុណ្យកាន់បិណ្ឌនេះវេនទី៥នេះ មានចង្ហាន់តែមួយស្រាក់ប៉ុណ្ណោះ ។
ព្រះតេជគុណឈិន គន្ធា មានសង្ឃដីកាបន្តថា នៅជុំវិញវត្តមិនសូវមានញាតិញោមទេ ព្រោះវត្តនេះនៅដាច់ពីទីប្រជុំជន ហើយនៅជុំវិញវត្តនេះក៏មានវិហារព្រះយីស៊ូ ហើយបងប្អូនខ្មែរឥស្លាមវិញក៏មានច្រើនផងដែរ។
ព្រះតេជគុណឈិន គន្ធា ដែលជាចៅអធិការវត្ត មានសង្ឃដីកាបន្តថា ការនិមន្តបិណ្ឌបាតរបស់ព្រះសង្ឃពីវត្តទៅដល់ថ្នល់ជាតិលេខ៣ មានចម្ងាយ១០គីឡូ ទៅ១៥គីឡូ ព្រោះនៅអមសងខាងផ្លូវជាតិក្នុងភូមិសាស្ត្រឃុំព្រៃថ្នង សំបូរណាស់បងប្អូនខ្មែរអ៊ិស្លាម ។
ព្រះតេជគុណចៅអធិការវត្តបន្តថា នៅវេលាដែលអាត្មាភាពបង្ហោះតាមបណ្ដាញសង្គមនោះ ពេលព្រះអង្គឆាន់ចង្ហាន់ត្រង់ ក៏មានញាតិញោមខ្លះបានយកចង្ហាន់មកប្រគេនព្រះសង្ឃបានឆាន់មួយពេល មិនលំបាកដល់លោកយាយជី និងលោកតាជី ធ្វើចង្ហាន់អោយព្រះសង្យឆាន់ ។
ដូច្នេះ នេះជាដំណឹងជម្រាបដល់បងប្អូនទាំងអស់ ចូលរួមយកចង្ហាន់មកប្រគេនព្រះសង្ឃនៅវត្តខាងលើនេះផង ។
ចែករំលែកព័តមាននេះ