រាជធានី​ភ្នំពេញ ៖​​ ទស្សនិកជនរាប់​លាន​នាក់បានបើកប៉ុស្តិ៍ទូរទស្សន៍​ CTN កាលពីរាត្រី ថ្ងៃសៅរ៍ទី​២៦ ឧសភា  ដើម្បី​ទស្សនា​ការ​សម្ដែង​របស់កញ្ញា ឡូរ៉ា ម៉ម និងក្រុម The Like Me’s ដែលជាការសម្ដែងផ្ទាល់តាម​កញ្ចក់ទូរ​ទស្សន៍​លើក​ដំបូងបង្អស់​របស់​ក្រុមនេះនៅក្នុង​ប្រទេស​កម្ពុជា ។

ក្រុមតន្ត្រី The Like Me’s បានប្រគំបទ ចម្រៀងចំនួនបីបទ គឺបប«បេះដូងគ្មានកង្វល់»​«ផ្កាព្រហាមរីកពព្រាយ»និងបទ«ស៊ីក្លូ» នៅ​មុខ​ទស្សនិកជនដែលទស្សនាផ្ទាល់នៅក្នុងស្ទូឌីយ៉ូ​របស់ទូរទស្សន៍ CTN​ នៅឫស្សីកែវ​ រាជធា​នីភ្នំ​ពេញ ។​ទស្សនិកជនដែល​ទស្សនាផ្ទាល់ប្រមាណ ៥០០នាក់ បានទះដៃបន្ទរ ខណៈដែលក្រុមតន្ត្រី The Like Me’s សម្ដែង ។

បន្ទាប់ពីបទចម្រៀងទីមួយដែលមានចំណង​ជើងថា «បេះដូងគ្មានកង្វល់» ក្រុមតន្ត្រី The Like Me’sបានផ្ដល់បទសម្ភាសន៍នៅ​លើឆាក​ជូន​​ទស្សនិកជនដោយមានការសាកសួរសំណួរ​ពី​សំណាក់ពិធីករកម្មវិធីរាត្រីកម្សាន្ត គឺកញ្ញា ជីជី និងលោករតនៈ ។ នៅលើឆាកនេះ គេក៏ឃើញ​វត្ត​មានម្ដាយរបស់កញ្ញា ឡូរ៉ា គឺអ្នកស្រី ធីតា ផង​ដែរ ។

នៅក្នុងវគ្គសម្ភាសន៍ដែលមានរយៈពេល ១៥​​​នាទី​ កញ្ញា​ ឡូរ៉ា និងម្ដាយបានរៀបរាប់អំពី​ការ​​ចិញ្ចឹម​​បីបាច់កញ្ញា​ ឡូរ៉ា​ នៅក្នុងសហ​រដ្ឋ​អាមេរិក​ ព្រមទាំងការធ្វើដំណើរមកលេង​ស្រុក​ខ្មែរជាញឹកញាប់របស់គ្រួសារនេះ ។​ ពួកគាត់​ក៏បានណែនាំឲ្យទស្សនិកជនស្គាល់ប្អូនប្រុសរបស់​កញ្ញា ឡូរ៉ា ឈ្មោះ Adrew ដែលអង្គុយជាមួយ​ទស្ស​និកជន​ និងមិត្តភក្ដិរបស់ ឡូរ៉ា ផងដែរ ។

អ្នកស្រី ធីតា បានថ្លែងទៅកាន់ទស្សនិកជន​ខណៈដែលក្រុមតន្រ្តីត្រៀមខ្លួនចាកចេញពីឆាកបន្ទាប់ពីប្រគំនិងច្រៀង​បទ«ស៊ីក្លូ»​ចប់យ៉ាង​ដូច្នេះថា​ «សូមជួយគាំទ្រដល់កូនស្រី​របស់​ខ្ញុំ និង​បទចម្រៀងរបស់នាងផង»។ ទស្ស​និកជនឆ្លើយ​តបដោយសំឡេង​ទះដៃសាទរដោយ​ក្ដីរំភើបរីក​រាយ ។​ថ្មីៗកន្លង​ទៅនេះក្រុមតន្ត្រី The Like Me’s បានចេញផ្សាយបទចម្រៀង«ផ្កាព្រហាម​រីក​ពព្រាយ​»និងបទ«ស្វារាំមុនឃីស»​​ នៅក្នុង​ប្រទេសកម្ពុជា ។​ ក្រុមនេះនឹងចេញផ្សាយ​វីដេអូ​ចម្រៀងបន្ទាប់គឺបទ«​បេះដូងគ្មានកង្វល់»​ នៅ​ថ្ងៃ​ទី៣០​ ​ឧសភា ​។

The​ Like​ Me’s គឺជាក្រុមតន្ត្រីដែលមាន​សមាជិកសុទ្ធតែស្រី និងមានមូលដ្ឋាន​នៅរដ្ឋ​កាលី​​ហ្វ័រនីញ៉ាភាគខាងជើង។ សមាជិក​ក្រុម​​តន្ត្រី រួមមាន ឡូរ៉ា ម៉ម​ ហេឡិណា ហុង​ Monique Coquilla និង Loren Alonzo ។ ឡូរ៉ា និង ហេឡិណា​ ទាំងពីរនាក់ គឺ​ជា​អាមេរិ​កាំង​ដើម​កំណើតខ្មែរ ។ ចំណែកឯ Monique Coquilla និង Loren​ Alonzo គឺជា​អាមេរិកាំង​ដើម​កំណើតហ្វ៊ីលីពីន។

ក្រុមតន្ត្រី The Like Me’s បានទទួល​ប្រជា​ប្រិយភាពទាំងនៅក្នុងស្រុក​ និងក្រៅស្រុកនៅ​លើ​អ៊ីនធើរណេត ជាមួយនឹងការ​យក​បទ​ចម្រៀង​ខ្មែរបុរាណទៅច្រៀងតាមបែបទំនើប ។ បេសក​កម្មរបស់ក្រុមតន្ត្រីនេះ​ គឺដើម្បីធ្វើឲ្យឆាកតន្ត្រីរបស់ប្រទេសកម្ពុជារស់​ឡើងវិញ តាមរយៈ​ការ​ផលិតបទចម្រៀងដើមដោយខ្លួនឯង ។

អ្នកចូលចិត្តបទចម្រៀង ដែលមាន​បំណង​ចង់ទាញយកបទចម្រៀងរបស់កញ្ញា ឡូរ៉ា និង​ក្រុម The Like Me’s​សម្រាប់​ទូរស័ព្ទដៃ​អាច​ផ្ញើ SMS លេខកូដខាងក្រោមនេះ ទៅកាន់លេខ 2727៖
បទផ្កាព្រហាមរីកពព្រាយ​ ​លេខកូដ 703405
បទស្វារាំមុនឃីស​ លេខកូដ​ 703408
បទបេះដូងគ្មានកង្វល់ លេខកូដ 703409 (ចេញផ្សាយចាប់ថ្ងៃពុធទី​៣០​ ឧសភា ទៅ)៕